ភ្នំពេញ ៖ ដោយសារមើលឃើញពីភាពអនាធិបតេយ្យការដឹកជញ្ជូនអាចម៍ដី ថ្មនិងខ្សាច់បង្កផលប៉ះពាល់ដល់ប្រជាពលរដ្ឋអ្នកធ្វើដំណើរទូទៅតាមដងផ្លូវសហព័ន្ធរុស្ស៊ី ដូចជាធ្លាក់ដី ឫហូរទឹកកក្លេកក្លាក់និងធ្លាក់គ្រាប់ខ្សាច់ចូលភ្នែកប្រជាពលរដ្ឋជាដើមនោះ ទើបនគរបាលខណ្ឌពោធិ៍សែនជ័យដែលដឹកនាំបញ្ជាដោយលោកយឹម សារ៉ាន់បានអធិការនគរបាលខណ្ឌបានចុះឃាត់ក្រុមរថយន្ដទាំងយកមកអប់រំណែនាំនិងធ្វើកិច្ចសន្យាឲ្យមានការគ្របបិទបាំងឲ្យបានល្អប្រសើចៀសវាងប៉ះពាល់ដល់អ្នកធ្វើដំណើរទូទៅ។
ការចុះឃាត់រថយន្ដនេះធ្វើឡើងកាលពីព្រឹកថ្ងៃទី៦ខែមករាឆ្នាំ២០១៥នៅចំណុចមុខព្រលានយន្ដហោះអន្តរជាតិភ្នំពេញតាមបណ្ដោយផ្លូវសហព័ន្ធរុស្ស៊ីស្ថិតក្នុងភូមិក្បាលដំរីសង្កាត់កាកាបខណ្ឌពោធិ៍សែនជ័យ។
លោកយឹម សារ៉ាន់បានឲ្យដឹងថា ការចុះឃាត់រថយន្ដដឹកដីខ្សាច់និងថ្មនេះគឺដោយសាររថយន្ដទាំងនោះបង្កផលប៉ះពាល់ដល់ប្រជាពលរដ្ឋអ្នកធ្វើដំណើរតាមបណ្ដោយផ្លូវសហព័ន្ធរុស្ស៊ី មានពេលខ្លះដោយសារការដឹកជញ្ជូននេះមិនបានគ្រប ឬ បិទបាំងឲ្យបានត្រឹមត្រូវនោះវាបានធ្លាក់គ្រាប់ខ្សាច់ហុយចូលភ្នែកប្រជាពលរដ្ឋដែលជិះម៉ូតូតាមដងផ្លូវនេះ ជួនកាលទៀតដោយសារគេដឹកដាក់ពេញប្រៀបហួសហេតុពេកធ្វើឲ្យធ្លាក់ដុំដីឫកំទេចថ្មមកលើថ្នល់ជួនកាលក៏ត្រូវប្រជាពលរដ្ឋម្ដងម្កាលដែរ។ ជាងនេះទៅទៀតក្រុមរថយន្ដដឹកខ្សាច់ក៏បង្កផលប៉ះពាល់ដល់ប្រជាពលរដ្ឋដែរដូចជា ជាញឹកញាប់វាតែងហូរទឹកចេញពីខ្សាច់ប្រឡាក់ផ្លូវជួនកាលទៀតវាបានធ្វើឲ្យខ្ទាតប្រឡាក់សម្លៀកបំពាក់អ្នកធ្វើដំណើរជាដើម។
លោកបន្ដថា ការឃាត់រថយន្ដនេះមិនគិតថារថយន្ដនោះមានច្បាប់អនុញ្ញាតិចូលក្រុង ឬក៏អត់នោះទេគឺឃាត់ទាំងអស់ឲ្យតែរថយន្ដនោះបង្កផលប៉ះពាល់ដល់អ្នកធ្វើដំណើររឿងបញ្ហាឯកសារផ្សេងៗខាងអាជ្ញាធរខណ្ឌធ្លាប់បានត្រួតពិនិត្យរួចហើយគឺលោកមិនចង់ឲ្យប្រជាពលរដ្ឋធុញទ្រាន់ថាសមត្ថកិច្ចធ្វើការងារដដែលៗនោះទេ ហើយការឃាត់នេះគឺគ្រាន់តែធ្វើការអប់រំណែនាំដល់ពួកគាត់រៀបចំឲ្យបានត្រឹមត្រូវមុននឹងដឹកចេញមកតាមផ្លូវនោះ៕
វិទូ
0 Comments