ព្រះសីហនុ ៖ ជនសង្ស័យជាជនបរទេសស្បែកខ្មៅចំនួនពីរនាក់ ត្រូវបានប៉ូលិសការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋានខេត្តព្រះសីហនុចាប់ឃាត់ខ្លួនកាលពីរសៀលថ្ងៃទី០៥ ខែមករា ឆ្នាំ២០១៥ នៅចំណុចសណ្ឋាគារកាំសាប ស្ថិតក្នុងសង្កាត់លេខ៣ ក្រុង/ខេត្តព្រះសីហនុ ក្រោយពីទទួលបានពាក្យបណ្ដឹងពីឈ្មោះ TANAKA SHINYA ភេទប្រុស អាយុ៦១ឆ្នាំ ជាជនជាតិជប៉ុន កាន់លិខិតឆ្លងដែនT ២ ០៦៨៦៧៩៨ ចុះថ្ងៃទី៧ ខែឧសភា ឆ្នាំ២០១០ មុខរបរទេសចរណ៍ ស្នាក់នៅសណ្ឋាគារកាំសាប បានប្ដឹងពីបទឆបោកប្រាក់៣.០០០ដុល្លារ។
លោក សាន់ ប៊ុនថន ស្នងការរងទទួលបន្ទុកប្រធានការិយាល័យកណ្ដាលប្រឆាំងបទល្មើសនៃស្នងការដ្ឋាននគរបាលខេត្តព្រះសីហនុបានឱ្យដឹងថា ដោយមានបណ្ដឹងពីជនរងគ្រោះ កម្លាំងការិយាល័យប្រឆាំងបទល្មើសសេដ្ឋកិច្ច សហការជាមួយកម្លាំងជំនាញការិយាល័យអន្តោប្រវេសន៍ បានធ្វើការឃាត់ខ្លួនជនសង្ស័យចំនួន០២នាក់ ទី១-មានឈ្មោះ EMMITT G DARBEY ភេទប្រុស អាយុ៤១ឆ្នាំ ជាជនជាតិ LEBERIAN និងម្នាក់ទៀតមានឈ្មោះ FODAY KAMARA ភេទប្រុស អាយុ ៣៨ឆ្នាំ ជាជនជាតិ SIERRA LEOMEAN មុខរបរជាកីឡាបាល់ទាត់ (អ្នកទាំងពីរជាជនជាតិស្បែកខ្មៅ) និងដកហូតបានប្រាក់ដុល្លារក្លែងក្លាយមួយកញ្ចប់ធំ។
លោកស្នងការរងបានឱ្យដឹងថា យោងតាមពាក្យបណ្ដឹងរបស់ជនរងគ្រោះបានឲ្យដឹងថា ជនសង្ស័យទាំងពីរនាក់បានយកពេជ្រ និងមាសមកបង្ហាញនិងនិយាយពីរឿងរកស៊ីធំ រយៈពេលពីរបីថ្ងៃក្រោយជនសង្ស័យទាំងពីរនាក់បានផ្ញើឥវ៉ាន់ជាកញ្ចប់ដែលមានតម្លៃមួយលានប្រាំបីសែនដុល្លាររ(១.៨០០.០០០ដុល្លារ) ពីប្រទេសBAHAMA ជនសង្ស័យប្រាប់ជនរងគ្រោះថា គេត្រូវការលុយ ៣.០០០ដុល្លារ យកទៅឱ្យប្រធានកាកបាទក្រហម ទើបឥវ៉ាន់ដែលផ្ញើមកនោះគេអត់ឆែកឆេរទេ ពេលនោះរូបលោកក៏យល់ព្រមបង់លុយចំនួន២.០០០ដុល្លារកាលពីថ្ងៃទី២៥ ខែធ្នូ ឆ្នាំ២០១៤ និងថ្ងៃបន្ទាប់បង់លុយឲ្យទៅជនសង្ស័យចំនួន១.០០០ដុល្លាបន្ថែមទៀត ទើបជនសង្ស័យប្រគល់ប្រអប់ឱ្យរូបលោក។ ខណៈពេលបើកមើលប្រអប់ ឃើញមានម្សៅពណ៌ស និងក្រដាសពណ៌ខ្មៅ។ បន្ទាប់មកជនសង្ស័យក៏បានយកធុងទឹកលាយជាមួយម្សៅពណ៌ស និងទឹកថ្នាំគីមីយកមកលាងលុយ ក៏ចេញជាលុយដុល្លារមានក្រដាសប្រាក់ប្រភេទ១០០ដុល្លារ ៥០ដុល្លារ ២០ដុល្លារ និង១០ដុល្លារ ពេលឃើញដូច្នេះរូបលោកក៏ឱ្យជនសង្ស័យលាងឱ្យបានច្រើន ចំណែកជនសង្ស័យបាននិយាយថា ទឹកថ្នាំលាងលុយអស់ហើយ ដោយទឹកថ្នាំនៅខ្សោយ ពួកគេចង់ឡើងទៅភ្នំពេញ ដើម្បីទំនាក់ទំនងស្ថានទូតអាមេរិកយកទឹកថ្នាំលាងដែលខ្លាំងមកលាងលុយឱ្យបានច្រើន រួចពួកគេក៏ចេញបាត់ទៅ។
ប៉ូលិសបាននិយាយឱ្យដឹងបន្តទៀតថា មួយថ្ងៃក្រោយមកគេឃើញជនសង្ស័យទាំងពីរត្រឡប់ មកវិញ និងមានតារាងតម្លៃទឹកថ្នាំគីមីមកបង្ហាញជនរងគ្រោះ និងយកថ្នាំដបតូចមួយដបមកធ្វើគំរូរួច យកក្រដាសប្រាក់១០០ដុល្លារមកលាងក្លាយជាក្រដាសប្រាក់១០០ដុល្លារ ដោយមិនចាំបាច់យកម្សៅស មកលាយដូចលើកមុន។
លោក ចៅ ម៉េង នាយការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តព្រះសីហនុបានឱ្យដឹងថា ជនសង្ស័យទាំងពីរនាក់ រួមនិងវត្ថុតាង(ក្រដាសប្រាក់ដុល្លារក្លែងក្លាយមួយកញ្ចប់ធំ) ត្រូវបានកសាងសំណុំរឿងបញ្ជូនទៅកាន់សាលាដំបូងខេត្តព្រះសីហនុ ដើម្បីចាត់វិធានការទៅតាមផ្លូវច្បាប់៕ ស៊ុយ ចាន់ធា
0 Comments