នៅព្រឹកថ្ងៃទី០៦មករានេះ មជ្ឈមណ្ឌលជាតិហ្វឹកហ្វឺនកីឡា ក្រសួងអប់រំយុវជន និងកីឡា បានប្រារព្ធបើកយុទ្ធនាការហាត់ហ្វឹកហ្វឺនក្រុមជម្រើសជាតិឆ្នាំ២០១៥ នៅវិទ្យាស្ថានជាតិអប់រំ ដែលមានការអញ្ជើញចូលរួមពីលោកហង់ជួន ណារ៉ុន រដ្ឋមន្ត្រីក្រសួងអប់រំយុវជន និងកីឡា។
តាមរបាយការណ៍របស់លោក ប៉ុន សុខ នាយកមជ្ឈមណ្ឌលជាតិហ្វឹកហ្វឺនកីឡា បានបង្ហាញថា ការប្រមូលផ្ដុំកីឡាជម្រើសជាតិចាប់ផ្ដើមពីថ្ងៃទី០៦មករា ដល់ ថ្ងៃទី០៥មិថុនាឆ្នាំ២០១៥។ ក្នុងឱកាសនៃកាប្រមូលផ្ដុំ ពួកគេត្រូវស្ថិតនៅក្នុងជំរំដើម្បីទទួលនូវការហ្វឹកហាត់ឲ្យដល់កម្រិតស្ដង់ដារសកល។
លោក ប៉ុន សុខ បានអោយដឹងទៀតថា ការរៀបចំអោយមានការប្រមូលផ្តុំនេះគឺជាការបង្វឹកហាត់ដល់ក្រុមកីឡាជម្រើសជាតិ អោយទទួលនូវសិទ្ធិផលកើនខ្ពស់ជាងមុន ដើម្បីត្រៀមលក្ខណៈចូលរួមការប្រកួតកីឡាSea Games លើកទី២៨នៅប្រទេសសិង្ហបូរី ដែលនឹងប្រព្រឹត្តទៅនាថ្ងៃទី០៥ ដល់ ថ្ងៃទី១៦មិថុនាឆ្នាំ២០១៥ ក៏ដូចជាការប្រកួតកីឡាសកលវិទ្យាល័យពិភពលោកនៅប្រទេសកូរ៉េ និងការប្រកួតកីឡាជាលក្ខណៈអន្តរជាតិនានា នាពេលខាងមុខនេះ។
ក្រុមជម្រើសជាតិដែលត្រូវចូលរួមប្រមូលផ្តុំក្នុងយុទ្ធនាការហាត់ហ្វឹកហ្វឺនឆ្នាំនេះ មានចំនួន៣៩២នាក់ ក្នុងនោះគ្រូបង្វឹក គ្រូជំនួយចំនួន៦២នាក់ អនុរក្ស២៦នាក់ កីឡាករ២៣៨នាក់និង កីឡាការិនីចំនួន៦៦នាក់ មកពីប្រភេទកីឡាចំនួន២៣ ដែលរួមមាន កីឡាតេក្វាន់ដូ(WTF&ITF) ប៉េតង់ សីប៉ាតាក្រ ប្រណាំងទូកប្រពៃណី វ៉ូស៊ូ យូដូ ប្រដាល់ វាយកូនបាល់ បាល់ទះ(ឆ្នេរខ្សាច់និងក្នុងសាល) បាល់ទាត់U23 អត្តពលកម្ម កាយសម្ព័ន្ធ ហែលទឹក ទ្រីយ៉ាត្លុង បាល់បោះ វាយកូនឃ្លីលើតុ វាយសី ប្រណាំងទោចក្រយាន គុនដាវ ចំបាប់ វ៉ូវីណាម សូរីនកាំប៉ូ និងការ៉ាតេដូ។
ការហ្វឹកហាត់រយៈពេល៥ខែនេះ ចែកចេញជា ៣ ដំណាក់កាលគឺដំណាក់កាលរៀបចំគឺហាត់ហ្វឹកហ្វឺនផ្នែកកម្លាំង ដំណាក់កាលត្រៀមប្រកួតគឺហាត់ហ្វឹកហ្វឺនផ្នែកបច្ចេកទេស និង ដំណាក់កាលប្រកួតហាត់ហ្វឹកហ្វឺនផ្នែកកលល្បិច។ ចប់ដំណាក់កាលនីមួយៗកីឡាករ-កីឡាការិនីទាំងអស់ត្រូវធ្វើតេស្ត បច្ចេកទេស សិទ្ធិផល(Performance) ដោយខានមិនបាន។
ការហ្វឹកហាត់នេះ កីឡាករ-ការិនីស្ថិតក្រោមយន្ដការត្រួតពិនិត្យរបស់គណៈកម្មការត្រួតពិនិត្យ និង វាយតម្លៃរបស់ក្រសួងអប់រំយុវជន និង កីឡា។ អនុរក្សចុះតាមដាន និង ត្រួតពិនិត្យការហ្វឹកហាត់ ការហូបចុក របស់កីឡាករ-ការិនីជាទៀតទាត់ ។ ក្រុមប្រឹក្សាវិន័យរបស់មជ្ឈមណ្ឌលជាតិហ្វឹកហ្វឺនកីឡា នឹងដាក់វិន័យចំពោះកីឡាករ-ការិនី ដែលប្រព្រឹត្តិផ្ទុយពីបទបញ្ជាផ្ទៃក្នុង។
កីឡាករ-កីឡាការិនីដែលខំប្រឹងប្រែងហាត់ហ្វឹកហ្វឺនទទួលបានសិទ្ធិផលខ្ពស់ និងមានសីលធម៌ល្អនោះ នឹងត្រូវបានលើកទឹកចិត្តឲ្យទៅចូលរួមប្រកួតជាលក្ខណៈអន្តរជាតិ។
ក្នុងអំឡុងនៃការប្រមូលផ្តុំនេះ ក្រសួងអប់រំបានសម្រេចបើកថវិកាបំប៉នសំរាប់ការហូបចុកប្រចាំថ្ងៃដល់ដៃកីឡាករ កីឡាការិនីនិងគ្រូបង្វឹកដោយផ្ទាល់ជាប្រចាំខែ ដើម្បីហូបចុកខ្លួនឯង ទៅតាមសំណូមពររបស់កីឡាករ កីឡាការិនីនិងគ្រូបង្វឹក។
គួរបញ្ជាក់ថា សម្រាប់កីឡាករ-កីឡាការិនីម្នាក់ៗ បានទទួលប្រាក់ឧបត្ថម្ភ២៥០.០០០រៀល ក្នុងមួយខែ គ្រូបង្វឹកបាន៣០០.០០០រៀលក្នុងមួយខែ និង អនុរក្សបាន១៥០.០០០រៀលក្នុងមួយខែ។ ក្រៅពីនេះប្រាក់អាហារូបត្ថម្ភម្នាក់ៗ បាន២៣.០០០រៀលក្នុងមួយថ្ងៃ។
លោក ហង់ជួន ណារ៉ុន រដ្ឋមន្ត្រីក្រសួងអប់រំយុវជន និងកីឡា បានមានប្រសាសន៍ថា ពីមួយឆ្នាំទៅមួយឆ្នាំការងារគ្រប់គ្រង ការដឹកនាំរបស់មជ្ឈមណ្ឌលជាតិហ្វឹកហ្វឺនកីឡាជាតិ កាន់តែមានការវិវត្តន៍រីកចំរើនតាមគោលការណ៍អភិបាលកិច្ចល្អ ដោយមានការចូលរួមពីគ្រប់មជ្ឈដ្ឋានពាក់ព័ន្ធ មានតម្លាភាព មានគណនីយភាព មានភាពទន់ភ្លន់ក្នុងការដឹកនាំ និងមានកិច្ចសហប្រតិបត្តិការបានល្អប្រសើរ។ លោកបន្តថា នេះជាជោគជ័យថ្មីមួយថែមទៀត ក្នុងវិស័យកីឡាក្នុងការរួមចំណែកអនុវត្តគោលនយោបាយកែទម្រង់វិស័យអប់រំ៨ចំណុច របស់ក្រសួងអប់រំយុវជននិងកីឡា និងជាពិសេសគឺជាការរួមចំណែកអនុវត្តកម្មវិធីនយោបាយនិងផែនការយុទ្ធសាស្ត្រចតុកោណដំណាក់កាលទី៣របស់រាជរដ្ឋាភិបាល។
លោករដ្ឋមន្ត្រីក្រសួងអប់រំយុវជន និងកីឡា បានក្រើនរំលឹកដល់លោកគ្រូអ្នកគ្រូបង្វឹក កីឡាករ កីឡាការិនីជម្រើសជាតិទាំងអស់ ត្រូវយកអស់កម្លាំងកាយកម្លាំងចិត្តក្នុងការបង្ហាត់និងហាត់អោយទទួលបាននូវសិទ្ធិផលខ្ពស់ ដើម្បីចូលរួមប្រកួតកីឡាSea Games លើកទី២៨នៅប្រទេសសិង្ហបូរី ដណ្តើមបានមេដាយកាន់តែច្រើន ស្របតាមការលើកទឹកចិត្តរបស់រាជរដ្ឋាភិបាល តាមរយៈការកែសម្រួលប្រាក់រង្វាន់នោះ៕
វិសិទ្ធ
0 Comments