ភ្នំពេញ ៖ នៅរយៈពេលប៉ុន្មានខែចុងឆ្នាំ២០១៤និងដើមឆ្នាំ២០១៥នេះប៉ូលិសនៃនាយកដ្ឋានអន្តោប្រវេសន៍ក្រសួងមហាផ្ទៃនិងការិយាល័យអន្តោប្រវេសន៍នៃស្នងការរាជធានីភ្នំពេញ សហការជាមួយនឹងសមត្ថកិច្ចមូលដ្ឋាន បានធ្វើការងាររបស់ខ្លួនយ៉ាងសស្រាក់សស្រាំដោយចេញប្រតិបត្តិការស្រាវជ្រាវរុករកនិងធ្វើរដ្ឋបាលនៅទីតាំងសង្ស័យមួយចំនួននៅទូទាំងប្រទេសក៏ដូចជានៅហាងកាហ្វេជាច្រើននៅរាជធានីភ្នំពេញ ដើម្បីស្វែងរកជនអន្តោប្រវេសន៍ខុសច្បាប់ចាប់បញ្ជូនទៅប្រទេសកំណើតរបស់ខ្លួនវិញ ដែលមកដល់ម៉ោងនេះបានចំនួនរាប់ពាន់នាក់ហើយ។
ជាក់ស្តែងនៅព្រឹកថ្ងៃ ទី៦ ខែមករា ឆ្នាំ២០១៥ ផ្ទះលក់កាហ្វេ និងផ្ទះជួលនៅផ្លូវ៧០និងផ្លូវជាតិលេខ៥ចំនួន៣ទីតាំងក្នុងសង្កាត់ទួលសង្កែ ខណ្ឌឫស្សីកែវត្រូវនគរបាលនៃអគ្គនាយកដ្ឋានអន្តោប្រវេសន៍សហការជាមួយការិយាល័យអន្តោប្រវេសន៍ស្នងការរាជធានីភ្នំពេញ រួមជាមួយសមត្ថកិច្ចមូលដ្ឋានបានឆ្មក់ចុះត្រួតពិនិត្យរកលិខិតស្នាម ហើយឃាត់បានស្ត្រីជនជាតិវៀតណាមដែលមកស្នាក់នៅខុសច្បាប់សរុបចំនួន៦នាក់។
ហាងកាហ្វេដែលចុះឆែកឆេរទី១គឺ ហាងកាហ្វេង៉ុកងាន់២ ទី២ផ្ទះជួលមួយកន្លែងនៅផ្លូវ៧០និងទី៣ហាងកាហ្វេ យីហោ ង៉ុកងីង៥នៅតាមបណ្តោយផ្លូវជាតិលេខ៥ភូមិផ្សារតូចសង្កាត់ទួលសង្កែខណ្ឌឫស្សីកែវ។ ការចុះពិនិត្យរដ្ឋបាលរបស់សមត្ថកិច្ចជាលទ្ធផលឃាត់ខ្លួនស្ត្រីជនជាតិវៀតណាមបានចំនួន៦នាក់។ បន្ទាប់ពីធ្វើការឃាត់ខ្លួនសមត្ថកិច្ចបាននាំយកទៅសាកសួរនៅប៉ុស្តិ៍ទួលសង្កែរួចបញ្ជូនបន្តទៅការិយាល័យអន្តោប្រវេសន៍ស្នងការក្រុង ដើម្បីចាត់ការបន្តតាមផ្លូវច្បាប់។
លោកឧត្តមសេនីយ៍ទោ អ៊ុក ហៃសីលា ប្រធាននាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ ក្រសួងមហាផ្ទៃ បានមានប្រសាសន៍ប្រាប់កាសែតក្នុងស្រុកមួយកាលពីពេលកន្លងមកថា កម្លាំងនាយកដ្ឋានស៊ើបអង្កេត និងអនុវត្តនីតិវិធី ចាប់ខ្លួនជនជាតិវៀតណាមនិងជនបរទេសផ្សេងៗទៀតដែលមានលិខិតឆ្លងដែន ប៉ុន្តែប្រើខុសទិសដៅ និងមានលិខិតឆ្លងដែនត្រឹមត្រូវតែស្នាក់នៅខុសច្បាប់ ហើយចំពោះជនជាតិវៀតណាម ដែលគ្មានលិខិតឆ្លងដែន ខាងនាយកដ្ឋានស៊ើបអង្កេត និងអនុវត្តតាមនីតិវិធី នឹងអនុវត្តទៅតាមច្បាប់អន្តោប្រវេសន៍ ហើយប្រកាសបណ្ដេញពួកគេចេញពីប្រទេសកម្ពុជា។
លោក បន្តថា ចំពោះជនជាតិបរទេសណាដែលមានលិខិតឆ្លងដែន ប៉ុន្តែប្រើខុសទិសដៅ នៅពេលដែលពួកគេប្រើអស់ទិដ្ឋាការ ត្រូវត្រឡប់ទៅប្រទេសខ្លួនវិញ។
គួររំលឹកថា កន្លងមកអគ្គនាយកដ្ឋានអន្តោប្រវេសន៍ក្រសួងមហាផ្ទៃ បានចាប់ខ្លួនជនជាតិបរទេស ដែលចូលមករស់នៅកម្ពុជា គ្មានច្បាប់ត្រឹមត្រូវ បញ្ជូនទៅប្រទេសកំណើតវិញបានចំនួនជាង ១២០០នាក់ ក្នុងនោះមានជនជាតិវៀតណាមច្រើនជាងគេហើយក្នុងចំណោមជនអន្តោប្រវេសន៍ខុសច្បាប់ជាង ១២០០នាក់ គឺមាន២៩សញ្ជាតិ៕
ឌីរៀ
0 Comments