សៀមរាប ៖ ក្រុមយុវជនជាតិ និងអន្តរជាតិ បានបោះជំរុំ ដើម្បីធ្វើពិធីដុតភ្លើងគុប សំដៅលើការរួមគ្នាជាកម្លាំង ដើម្បីជួយគ្នាលុបបំបាត់អំពើពុករលួយនៅក្នុងអាស៊ី ដែលមានការចូលរួមពីសំណាក់ យុវជនអន្តរជាតិចំនួន ៨ ប្រទេស បានចាត់ធ្វើឡើង នៅក្នុងបរិវេណសាលាគរុកោសល្យ នៃខេត្តសៀមរាប នៅយប់ថ្ងៃទី ៥ ខែ មករា ឆ្នាំ ២០១៥។
ពិធីនេះស្ថិតក្រោមអធិបតីភាព ឯកឧត្តម ម៉ៅ វុឌ្ឍី អភិបាលរងខេត្តសៀមរាប និងឯកឧត្តម ណុះ ស្លេះ អនុរដ្ឋ លេខាធិការ ក្រសួងអប់រំយុវជន និងកីឡា និងលោកស្រី Annette Kleinbrodប្រធានកម្មវិធីលើកកម្ពស់ការចូលរួមរបស់ប្រជាពលរដ្ឋ ប្រទេសអាឡឺម៉ង់ ព្រមទាំងលោកគ្រូ អ្នកគ្រូ និងយុវជនដែលបានមកពីប្រទេសនាចំនួន ៨ប្រទេសនៃអាស៊ី ក្នុងនោះមាន បង់ក្លាដេស , ប៉ាគីស្ថាន , ម៉ាឡេស៊ី, ឥណ្ឌូនេស៊ី, ហ្វីលីពីន, វៀតណាម, ប៉ូឡូញ ដែលបានរៀបចំឡើងដោយ អង្គការតម្លាភាពនៅកម្ពុជា។
លោក ព្រាប កុល នាយកប្រតិបត្តិអង្គការតម្លាភាពកម្ពុជា បញ្ហាអំពើពុករលួយកើតឡើង ពុំមានប្រទេសណា មួយ ដែលបដិសេធ ឬខ្វែងគំនិតគ្នា អំពីផលប៉ះពាល់នៃអំពើពុករលួយ និងកំពុងតែរិះរកមធ្យោបាយ និង យុត្តិសាស្ត្រនានា ដើម្បីប្រយុទ្ធប្រឆាំង ទប់ស្កាត់និងឈានទៅរកការលុបបំបាត់អំពើពុករលួយ និងមាន ប្រទេសចំនួន ១៧០ បានចុះហត្ថលេខា ផ្តល់សច្ចាប័ន ទៅលើអនុសញ្ញា អង្គការសហប្រជាជាតិ ប្រឆាំងនិង អំពើពុករលួយ ដែលជាក្របខណ្ឌច្បាប់អន្តរជាតិ អំពើពុករលួយកំពុងតែរីករាលដាលក្នុងប្រទេសក្រីក្រ និងប្រទេសកំពុងតែអភិវឌ្ឍន៍ ដែលជាឧបសគ្គ កាត់បន្ថយនូវសក្ដានុពលសម្រាប់ការអភិវឌ្ឍន៍ សេដ្ឋកិច្ច និងលទ្ធិប្រជាធិបតេយ្យដោយចិរភាព ធ្វើអោយអយុត្តិធម៌សង្គម ការរំលោភសិទ្ធិមនុស្ស កាត់បន្ថយប្រសិទ្ធភាព ការផ្តល់សេវាកម្មសាធារណៈ បង្កលក្ខណៈឲ្យមានការបំផ្លាញធនធានធម្មជាតិ និងគម្លាតយ៉ាងធំរវាងអ្នកមាន និងអ្នកក្រ។ បន្ទាប់ពីលោក លោកស្រី ថ្នាកើដឹកនាំនៃពិធីបានមានប្រសាសន៍សំណេះសំណាលរួចមក ឯកឧត្តម ម៉ៅ វុឌ្ឍី អភិបាលរងខេត្តសៀមរាប បានមានប្រសាសន៍ថា យើងត្រូវរួមគ្នាទប់ស្កាត់លុបបំបាត់ កុំឲ្យកើតឡើងនៅក្នុង ប្រទេសកម្ពុជា ព្រោះអំពើពុករលួយ បណ្តាឲ្យប៉ះពាល់ ដល់ប្រយោជន៍សង្គម និងជីវិតរស់នៅរបស់ប្រជាជន នាពេលបច្ចុប្បន្នប៉ុណ្ណោះទេ ក៏ប៉ុន្តែវាថែមទាំងពន្យឺតល្បឿន នៃការអភិវឌ្ឍន៍ប្រទេសជាតិ ថែមទាំងផង អំពើ ពុករលួយប្រៀបបានដូចជាជំងឺឆ្លង ដែលបានធ្វើឲ្យធ្លាក់ចុះខ្សោយ
នូវប្រព័ន្ធការងារ ជាសុចរិតភាព ដែល មានតួនាទី ទប់ស្កាត់អំពើពុករលួយ និងអំពើខុសច្បាប់ផ្សេងៗទៀត ដូចគ្នានឹងជំងឺអេដស៍ ដែលធ្វើឲ្យប្រព័ន្ធការពារមេរោគមានការចុះខ្សោយ និងបានធ្វើឲ្យជំងឺឱកាសនិយមផ្សេងៗទៀត អំពើពុករលួយអាច បំផ្លាញសង្គមជាតិបាន បើសិនជាមិនមានវិធានការទប់ស្កាត់ តែអាចចាត់វិធានការ និងយុត្តិសាស្ត្រដ៏ត្រឹមត្រូវ ពីសំណាក់រាជរដ្ឋាភិបាល និងការចូលរួមយ៉ាងសកម្មពីសង្គមទាំងមូល ជាពិសេសគឺការចូលរួមពីសំណាក់យុវជន៕
0 Comments