ពោធិ៍សាត់ ៖ នាយទាហានម្នាក់នៅវរសេនាតូចលេខ១៤១បានរងរបួសធ្ងន់បែកក្បាលហូរឈាមបោកផ្ទប់និងផ្លូវកៅស៊ូរងរបួសយ៉ាងធ្ងន់ធ្ងរ ដោយសារតែមិនពាក់មួកការពារសុវត្ថិភាព ខណៈដែលជិះម៉ូតូទៅបុកក្មេងស្រីពីក្រោយជិះកង់ពេញមួយទំហឹងរួចមក។ ហេតុការណ៍នេះបានកើតឡើងកាលពីវេលាម៉ោង១១និង១២នាទីព្រឹក ថ្ងៃទី៦ ខែមករា ឆ្នាំ២០១៥ ក្នុងភូមិ/ឃុំព្រងិល ស្រុកភ្នំក្រវាញ ខេត្តពោធិ៍សាត់។
សាក្សីបានឱ្យឲ្យដឹងថា បុរសរបួសធ្ងន់នោះបានជិះម៉ូតូស្មាស់រីវោ ពណ៌ខ្មៅ ជិះពីជើងទៅត្បូង លើផ្លូវក្រាលកៅស៊ូនេះ ដោយប្រើប្រាស់ល្បឿនលឿន ហើយមិនមានការពាក់មួកការពារសុវត្ថិភាពឡើយ។ ក្រោយមកលុះដល់ចំណុចកើតហេតុ មិនដឹងយកអារម្មណ៍គិតទៅណា ក៏វេរចង្កូតម៉ូតូទៅបុកក្មេងស្រីម្នាក់នៅភូមិកើតហេតុនោះឈ្មោះ គង់ សៀងហៃ អាយុ១៣ឆ្នាំ ពីក្រោយកំពុងជិះកង់ស្របទិស បណ្ដាលឲ្យបុរសនោះដួលម៉ូតូខ្លួនឯងនៅលើផ្លូវនោះ ហើយបោកក្បាលផ្ទប់និងថ្នល់កៅស៊ូ បែកក្បាលហូរឈាមរបួសធ្ងន់ធ្ងរ ត្រូវបានបញ្ជូនទៅសង្គ្រោះនៅមន្ទីរពេទ្យតែម្ដង។
លោកអធិការនគរបាលស្រុកភ្នំក្រវាញបានឱ្យដឹងថា ក្មេងស្រីនោះរបួសស្រាល ហើយបុរសនោះ ត្រូវបានគ្នាគេប្រាប់ថាឈ្មោះ ធឿន ស អាយុ២៦ឆ្នាំ នៅឃុំផ្ទះរ៉ុង ស្រុកភ្នំក្រវាញ ខេត្តពោធិ៍សាត់ ជាមន្ត្រីយោធានៅវរសេនាតូចលេខ១៤១ ចំណុះឱ្យកងពល១៤បានរបួសធ្ងន់បញ្ជូនសង្គ្រោះបន្ទាន់ភ្លាមៗ ឯវត្ថុតាងទាំងពីរយកទៅរក្សាទុករង់ចាំការដោះស្រាយគ្នាជាក្រោយ៕លានគ្រន
0 Comments