កំពង់ឆ្នាំង ៖ កុមារីអាយុ៤ឆ្នាំម្នាក់រស់នៅក្នុងគ្រួសារក្រីក្របានធ្លាក់ចូលទឹកទន្លេលង់ស្លាប់ នៅពេលដែលជិះកាណូតមកពីរកអុសជាមួយឪពុកម្ដាយវិញ។ ហេតុការណ៍នេះបានកើតឡើងនៅវេលាម៉ោង៣និង៣០នាទី នាថ្ងៃទី០៥ ខែមករា ឆ្នាំ២០១៥ នៅចំណុចទន្លេក្រចាប់ ក្នុងភូមិត្រពាំងចាន់ ឃុំត្រពាំងចាន់ ស្រុកបរិបូណ៌។
ក្រុមគ្រួសារកុមារីរងគ្រោះបាននិយាយឲ្យដឹងថា កុមារីរងគ្រោះឈ្មោះ សៀង កញ្ញា
អាយុ៤ឆ្នាំ ជាកូនទី៣ក្នុងចំណោមបងប្អូន៤នាក់ ហើយមានឪពុកឈ្មោះ វី វិន អាយុ៣៦ឆ្នាំ និងម្តាយឈ្មោះ សៀង សារួន អាយុ៣២ឆ្នាំ មុខរបរជាកសិករ ដែលមានទីលំនៅរស់នៅក្នុងភូមិ/ឃុំកើតហេតុខាងលើ។ នៅថ្ងៃកើតហេតុ ឪពុកម្ដាយនាងបាននាំនាងជិះកាណូតទៅរកអុសដុត លុះដល់ពេលត្រឡប់មកវិញគាត់បានដាក់ឲ្យនាងជិះនៅកណ្ដាលកាណូតក្រោយខ្នងឪពុក ចំណែកឯម្តាយវិញជិះនៅកន្សៃកាណូត រីឯអុសគរដាក់កណ្ដាលកាណូតធ្វើឲ្យបាំងភ្នែកម្តាយមើលមិនឃើញកូនទេ។ ពេលបើកកាណូតមកដល់ចំណុចខាងលើ កុមារីរងគ្រោះនៅក្រោយខ្នងឪពុកក៏បានធ្លាក់ចូលទឹកទន្លេ ពេលនោះឪពុកក៏បានដឹងហើយត្រឡប់កាណូតបកក្រោយមុជរកកូនស្រីវិញ ប៉ុន្តែទម្រាំរកឃើញកូនស្រីនោះបានស្លាប់បាត់ទៅហើយ។ ក្រោយពេលកើតហេតុឪពុកម្ដាយក៏បានដឹកសពកូនមកលំនៅដ្ឋានវិញទាំងក្តីស្តាយស្រណោះយ៉ាងខ្លាំង។
នៅព្រឹកថ្ងៃទី០៦ ខែមករា ឆ្នាំ២០១៥ អ្នកស្រុកក្នុងភូមិត្រពាំងចាន់បានរ៉ៃអង្គាសប្រាក់គ្នាបានតិចតួច ហើយយកប្រាក់ទាំងនោះនាំគ្នាធ្វើបុណ្យសពជូនកុមារីរងគ្រោះតាមប្រពៃណី ហើយបាននាំគ្នាសែងសពកុមារីរងគ្រោះដោយថ្មើរជើងដែលមានចម្ងាយដីប្រហែលជាង៥គីឡូម៉ែត្រ និងដឹកតាមកាណូតបន្តទៀត ទើបទៅដល់កន្លែងបញ្ចុះសព ដែលនេះគឺជាភាពលំបាក និងភាពក្រីក្ររបស់គ្រួសារសព និងអ្នកភូមិ៕
( ឈៀង ថារិទ្ធ )
0 Comments