សៀមរាប ៖ ភ្ញៀវទេសចរណ៍ជនជាតិបារាំងម្នាក់ត្រូវសមត្ថកិច្ចអះអាងថា ស្រវឹងស្រានិងញៀនកញ្ឆា ហើយបានឡើងតាមកាំជណ្តើរក្នុងផ្ទះ ជួល មិនបានប្រុងប្រយ័ត្នក៏ផុងជើងនិងពិដានធ្លាក់ ចូលក្នុងបន្ទប់ទឹកកម្ពស់ ២ម៉ែត្រកន្លះ បណ្តាលឲ្យបាក់.ក.ស្លាប់ភា្លមៗនៅនឹងកន្លែង។
ហេតុការណ៍ បង្កឲ្យមានការភ្ញាក់ផ្អើលទាំងកណ្តាលអធ្រាត្រនេះកើតឡើងនៅម៉ោង១២និង៣០នាទី ឈានចូលថ្ងៃទី០៦ ខែមករា ស្ថិតនៅក្នុងផ្ទះជួលភូមិ តាភុល សង្កាត់ស្វាយដង្គំ ក្រុងសៀមរាប។
បើតាមសំដីពីមន្ត្រីប៉ុស្តិ៍នគរបាលសង្កាត់ស្វាយដង្គំបានឲ្យដឹងថា ជនរងគ្រោះមានឈ្មោះ ប៊ែលនី រ៉ូមែន ជាជនជាតិបារាំង ភេទប្រុស អាយុ២៦ឆ្នាំកាន់លិខិតឆ្លងដែនលេខ ១៤២Y១៩៥៧២ ហើយចូលមកកម្ពុជាជាភ្ញៀវទេសចរណ៍។ សមត្ថកិច្ចបន្តថា មូលហេតុដែលបណ្តាលឲ្យជនរងគ្រោះធ្លាក់ពីលើកាំជណ្ដើរចូលក្នុង បន្ទប់ទឹក បាក់.កស្លាប់បែបនេះគឺបណ្ដាលមកពី ស្រវឹងស្រា និងស្រវឹងកញ្ឆា ស្របពេលដែលឡើងជណ្ដើរផ្ទះកម្ពស់២ម៉ែត្រកន្លះ គ្មានបង្កាន់ដៃ គួបផ្សំនិងកាំជណ្ដើររាងចោតផងនោះ ក៏បណ្ដាលឲ្យរអិលជើងធ្លាក់ ដាំក្បាលមកក្រោមផុងចូលក្នុងបន្ទប់ទឹកបាក់.កស្លាប់ភ្លាមៗ នៅនឹងកន្លែង។
ម្ចាស់ផ្ទះជួលមាន ឈ្មោះអោមម៉ាឡា។ សមត្ថកិច្ចបន្តទៀតថា ជនរងគ្រោះ ទើបមកជួលស្នាក់នៅជាមួយមិត្តភ័ក្ដិបានរយៈពេលប៉ុន្មានថ្ងៃទេ ហើយនេះក៏ជាការធ្វេសប្រហែសរបស់ម្ចាស់ផ្ទះផងដែរ ព្រោះមិនបានរៀបចំឲ្យស្រួលបួល ជណ្តើរចោតហើយថែមទាំងមិនមានបង្កាន់ដៃ រីឯដំបូលបន្ទប់ទឹកដែលនៅជាប់ជណ្ដើរ មិនបានចាក់ប្លង់សេឲ្យរឹងមាំទៀតផង បែរជាយកស៊ីបព្រូស៊ីម៉ង់ស្ដើងៗមកគ្របពីលើបន្ទប់ទឹកបណ្តោះអាសន្ន ទើបបណ្ដាលឲ្យជនរងគ្រោះធ្លាក់ផុងជើងចូលក្នុងបន្ទប់ទឹកបាក់.ក ស្លាប់បែបនេះ។
បន្ទាប់ពីធ្វើកោសល្យវិច័យរួចរាល់ សមត្ថកិច្ចបានបង្ហាញថា គឺវាមិនមែនជាករណីឃាតកម្មនោះទេ ពោលគឺជាករណី ស្រវឹងជោកជាំហើយគ្រោះថ្នាក់ដោយខ្លួនឯង បច្ចុប្បន្នកម្លាំងជំនាញបានយកសាកសពទៅតម្កល់ទុកក្នុងមន្ទីរពេទ្យបង្អែកខេត្តសៀមរាប ដើម្បីរង់ចាំ ចាត់ចែងប្រគល់ឲ្យទៅស្ថានទូតបារាំង យកទៅឲ្យក្រុមគ្រួសារធ្វើបុណ្យតាមប្រពៃណី៕
0 Comments