ភ្នំពេញ ៖ លោក យី យ៉ូន រដ្ឋលេខាធិការ ក្រសួងសង្គមកិច្ច អតីតយុទ្ធជន និងយុវនីតិសម្បទា (ស.អ.យ) និងជាអនុប្រធានអចិន្ត្រៃយ៍គណៈកម្មាធិការជាតិ ដើម្បីសុខុមាលភាពមនុស្សចាស់ (គ.ម.ច) បានបើកសិក្ខាសាលាផ្សព្វផ្សាយ អំពីគោលនយោបាយវិស័យសុខុមាលភាពមនុស្សចាស់ ដល់សមាគមសហព័ន្ធមនុស្សចាស់ខេត្តបាត់ដំបង និងខេត្ដបន្ទាយមានជ័យ ដើម្បីស្វែងយល់ អំពីការបង្កើត និងគ្រប់គ្រងសមាគមមនុស្ស។
លោក យី យ៉ូន រដ្ឋលេខាធិការ ក្រសួងសង្គមកិច្ច អតីតយុទ្ធជន និងយុវនីតិសម្បទា បានមានប្រសាសន៍ក្នុងសិក្ខាសាលា ដោយអំពាវនាវដល់អាជ្ញាធរគ្រប់លំដាប់ថ្នាក់ ដែលមានកាតព្វកិច្ចពាក់ព័ន្ធឱ្យយកចិត្តទុកដាក់បន្ថែមទៀតជួយដល់បញ្ហាមនុស្សចាស់ក្រីក្រគ្មានទីពឹងនៅតាមសហគមន៍។ លោកបន្ដថា ក្រសួងសង្គមកិច្ច និងជាប្រធានគណៈកម្មការមនុស្សចាស់កំពុងត្រៀម រៀបចំកិច្ចប្រជុំគណៈកម្មការជាតិមនុស្សចាស់ ដើម្បីឈានទៅរៀបចំលេខាធិការដ្ឋាននិងអនុគណៈកម្មការមនុស្សចាស់ នៅតាមរាជធានីខេត្តទូទាំងប្រទេស ហើយក្រសួងសង្គមកិច្ចក៏កំពុងរៀបចំ កែសម្រួលគោលនយោបាយមនុស្សចាស់ ឆ្នាំ២០០៣ឡើងវិញ ឱ្យស្របតាមស្ថានភាព នៃការរីកចម្រើនសេដ្ឋកិច្ច។
លោក ទុំ វីរ៉ា នាយកស្តីទីអង្គការមនុស្សចាស់កម្ពុជា បានឲ្យដឹងថា រាជរដ្ឋាភិបាលបានចេញអនុក្រឹត្យតាំង ពីខែកក្កដា ឆ្នាំ២០១១ ស្តីពីការបង្កើតគណៈកម្មាធិការជាតិកម្ពុជា ដើម្បីមនុស្ស ចាស់ ដោយផ្តល់ការងារសំខាន់ៗ ដូចជា សហការសម្របសម្រួលក្រសួង ស្ថាប័ន អាជ្ញាធរ អង្គការជាតិ អន្តរជាតិ និងសប្បុរសជនជាដើម ដើម្បីជួយមនុស្សចាស់ ប៉ុន្តែហាក់ដូចជាមិនសូវដំណើរការទាល់តែសោះ។
លោក យី យ៉ូន រដ្ឋលេខាធិការបានបន្ថែមថា រាជរដ្ឋាភិបាលក្រោមការដឹកនាំ ប្រកបដោយគតិបណ្ឌិតរបស់សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងអាណត្តិនីមួយៗ តែងតែបានដាក់ចេញនូវកម្មវិធីនយោបាយ និងយុទ្ធសាស្ត្រជាច្រើនសំដៅលើកកម្ពស់សុខុមាលភាពប្រជាពលរដ្ឋដោយរួមទាំងមនុស្សចាស់ផង៕
ពេជ្រ
0 Comments