ភ្នំពេញ ៖ លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានមាន ប្រសាសន៍ថា តាមការស្រាវជ្រាវនានា បានបង្ហាញថា ក្នុងចំណោមប្រទេសអាស៊ានទាំង ១០ ប្រទេសកម្ពុជាមានសក្ដានុពលខ្ពស់ក្នុងការទាក់ទាញវិនិយោគទុនបរទេស ហើយក៏នឹងក្លាយជាគោលដៅវិនិយោគរបស់ក្រុមហ៊ុននានា ជាពិសេសក្រុមហ៊ុន ចិន ជប៉ុន និងកូរ៉េ នៅដំណាច់ឆ្នាំនេះ បន្ទាប់ពីសមាហរណកម្មអាស៊ាន។
លោករដ្ឋមន្ត្រីបានមានប្រសាសន៍បែបនេះកាលពីថ្ងៃទី១៦មករាឆ្នាំ២០១៥ នៅក្នុងពិធីសំណេះសំណាលជាមួយតំណាងនិយោជក និងតំណាងកម្មករនិយោជិត នៃតំបន់សេដ្ឋកិច្ចពិសេសក្រុងព្រះសីហនុ(បិតត្រាំង)ប្រមាណជាង ១០០នាក់។
នៅក្នុងឱកាសនោះលោក អ៊ិត សំហេង បានសម្តែងនូវអំណរគុណ និងការកោតសរសើរខ្ពស់ចំពោះអ្នកវិនិយោគទាំងអស់ ដែលបានសម្រេចចិត្តជ្រើសរើសកម្ពុជា ជាទីតាំងបណ្ដាក់ទុនវិនិយោគ។ កត្តានេះ ជាទឡ្ហីករណ៍បញ្ជាក់ឲ្យឃើញនូវជំនឿទុកចិត្តពីសំណាក់អ្នកវិនិយោគបរទេស ទៅលើគោលនយោបាយដ៏ត្រឹមត្រូវរបស់រាជរដ្ឋាភិបាលកម្ពុជា ដែលធានាបាននូវបរិយាកាសវិនិយោគ ពាណិជ្ជកម្ម ស្ថិរភាពនយោបាយ និងកំណើនសេដ្ឋកិច្ច។ លោករដ្ឋមន្ត្រីមានប្រសាសន៏បន្តថា «តាមការស្រាវជ្រាវនានា បានបង្ហាញថាកម្ពុជា ក្នុងចំណោមប្រទេសអាស៊ានទាំង ១០ កម្ពុជាមានសក្តានុពលខ្ពស់ក្នុងការទាក់ទាញវិនិយោគទុនបរទេស ហើយនឹងក្លាយជាគោលដៅវិនិយោគរបស់ក្រុមហ៊ុននានា ជាពិសេស ចិន ជប៉ុន និងកូរ៉េ នៅដំណាច់ឆ្នាំនេះ បន្ទាប់ពីសមាហរណកម្មអាស៊ាន»។
លោក ចេន ជៀនហ្គេង ប្រធានក្រុមប្រឹក្សាភិបាលនៃតំបន់សេដ្ឋកិច្ចពិសេសក្រុងព្រះសីហនុ
(បិតត្រាំង)បានស្នើដល់លោករដ្ឋមន្ត្រីបង្កើតនូវមជ្ឈមណ្ឌលជាតិដើម្បី បណ្តុះបណ្តាលវិជ្ជាជីវៈជូនដល់កម្មករនិយោជិត ដែលមជ្ឈមណ្ឌល បណ្តុះបណ្តាលវិជ្ជាជីវៈនេះមានទីតាំងស្ថិតនៅក្នុងតំបន់សេដ្ឋកិច្ចពិសេសព្រះសីហនុ(បិតត្រាំង)នេះតែម្តង។ ឆ្លើយតបទៅនឹងការស្នើសុំនេះ លោករដ្ឋមន្ត្រី ក៏បានស្វាគមន៏ទទួលយកនូវសំណើរនេះ ដោយលោក យល់ឃើញថាមជ្ឈមណ្ឌលជាតិសំរាប់បណ្តុះបណ្តាលវិជ្ជាជីវៈនេះ អាចបណ្តុះបណ្តាលទាំងជំនាញទាបរយៈពេលខ្លី និងរហូតដល់ជំនាញជាន់ខ្ពស់រយៈពេលវែង ជូនដល់កម្មករនិយោជិតដែលរស់នៅក្នុងខេត្តនេះផ្ទាល់ និងបងប្អូនកម្មករដែលអញ្ជើញមកតាមបណ្តាខេត្តផ្សេងៗ។ លោករដ្ឋមន្ត្រីយល់ឃើញថា គំរោងបង្កើតនូវមជ្ឈមណ្ឌលបណ្តុះបណ្តាលនេះវានឹងធ្វើអោយកម្មកររបស់កម្ពុជា កាន់តែមានជំនាញបច្ចេកទេសខ្ពស់ ទទួលបាននូវប្រាក់ចំណូលកាន់តែប្រសើរ ហើយវាក៏អាចឆ្លើយតបទៅនឹងតំរូវការចាំបាច់ក្នុងការផ្គត់ផ្គង់កម្លាំងពលកម្មទៅដល់ រោងចក្រនៅក្នុងតំបន់សេដ្ឋកិច្ចពិសេសក្រុងព្រះសីហនុ(បិតត្រាំង) ក៏ដូចជារោងចកក្រនានាទៀត នៅក្នុងប្រទេសកម្ពុជា ផងដែរ។
គូសបញ្ជាក់ថា តំបន់សេដ្ឋកិច្ចពិសេសក្រុងព្រះសីហនុ(បិតត្រាំង) មានសកម្មភាពសេដ្ឋកិច្ចជាច្រើន ដែលមានចំនួន៥០ សហគ្រាស រួមមាន វិស័យវាយនភ័ណ្ឌ និងកាត់ដេរ វិស័យផលិតស្បែកជើង និងផលិតផលពីស្បែក ព្រមទាំងមានវិស័យផលិតកម្មផ្សេងៗទៀតជាច្រើន។ ក្នុងនោះមានកម្មករនិយោជិតសរុប ១០,៣៦២ ដែលមានជនជាតិកម្ពុជា ១០,០៣២នាក់ និងជនបរទេសមានចំនួន ៣៣០នាក់៕
0 Comments