ភ្នំពេញ ៖ ខឹក សុខឿន ជួប ងួន គា អ្នកប្រដាល់ ជិន រ៉ា សមាគមកីឡាប្រដាល់ក្រសួងការពារជាតិ និង ឆាយ មាស អ្នកប្រដាល់ក្លិបសំរោងកោងខេត្តបាត់ដំបង នឹងជួបប្រកួតគ្នាម្តងទៀតនៅលើសង្វៀនស្ទឹងមានជ័យ នាថ្ងៃសុក្រទី០២ ខែមករា ឆ្នាំ២០១៥នេះ។
អ្នកទាំងពីរនេះ ធ្លាប់ជួបគ្នាពីរលើករួចមកហើយ ដែលការជួបគ្នាលើកទី១-(ថ្ងៃទី០៣ ខែសីហា ឆ្នាំ២០១៣) ជិន រ៉ាវាយចាញ់ឆាយ មាស ដោយពិន្ទុ ហើយជួបគ្នាលើកទី២-កាលពីថ្ងៃទី២២ខែវិច្ឆិកា ឆ្នាំ២០១៤ លើសង្វៀនស្ទឹងមានជ័យ ហើយជិន រ៉ា បានវាយឈ្នះឆាយមាសដោយពិន្ទុវិញ។ ដូច្នេះលើកនេះ ជាការជួបគ្នាលើកទី៣ ដើម្បីជម្រះបញ្ជី តើនរណាជាអ្នកឈ្នះពិតប្រាកដនោះ។ ឆាយ មាស ជាអ្នកប្រដាល់ជើងចាស់ ដែលមានស្នៀតប្រដាល់ល្អ បើទោះបីជារូបគេរាងចាស់ជាង នាជីន បន្តិចក្តី។ អ្នកប្រដាល់ចាស់វស្សារូបនេះ មានកណ្ដាប់ដៃធ្ងន់ តែវាយចេញរាងយឺត ដោយសារគេវាយរាងសន្សំសំចៃកម្លាំងទុកវាយនៅក្នុងទឹកចុងក្រោយ។ ជិន រ៉ា គេជាអ្នកប្រដាល់ចាស់វស្សាដែរ តែនៅក្មេងជាងឆាយមាស មានកាយសម្បទារឹងមាំ និងមានល្បិចកល ព្រមទាំងមានបច្ចេកទេសនៅក្នុងពេលប្រកួត ហើយថែមទាំងមានផ្លែល្អថែមទៀត។ ជិន រ៉ា វាយភាគច្រើនឈ្នះគេដោយផ្ដួលដៃគូប្រកួតអោយសន្លប់ និងចុះចាញ់មុនចប់ទឹកទីប្រាំថែមទៀត។ គេប្រកួតចុងក្រោយ គឺវាយឈ្នះឆាយ មាស នេះឯង តែឈ្នះត្រឹមពិន្ទុប៉ុណ្ណោះ។ នៅពេលដែលប៉ះជាមួយ ឆាយមាសដែលគេវាយតាមប្លង់បច្ចេកទេសនោះ ជិន រ៉ា រាងយ៉ាប់ដែរ។
សំរាប់ការជួបគ្នារវាង ឆាយ មាស និង ជិន រ៉ាលើកនេះ មិនមានអ្នកណាហ៊ានទាយមុនថា អ្នកណាជាអ្នកឈ្នះនោះឡើយ ? ដោយសារតែអ្នកប្រដាល់ទាំងពីរមានស្នៀតប្រដាល់ល្អ និងបទពិសោធន៍ជោគជាំលើសង្វៀនដូចគ្នា ហើយណាមួយឥឡូវនេះ គេពុំទុកចិត្តឆាយ មាសព្រោះខ្លាចអន់ខ្សោយកម្លាំងមិនដូចមុន។ ចាំមើល តើជិន រ៉ា គេអាចយកឈ្នះឆាយ មាស បានដែលឬអត់ ? ឆាយ មាស គេប្រកួតចុងក្រោយនេះ វាយចាញ់ ជ័យ ស៊ីនេត អ្នកប្រដាល់ក្លឹបឃ្លាំងមឿងកីឡាដោយពិន្ទុ។ ងួន គា អ្នកប្រដាល់ក្លឹបតាឡីដំរីមានរិទ្ធ នឹងជួបប្រកួតជាមួយ ខឹក សុខឿន អ្នកប្រដាល់ក្លិបកងពលតូចទ័ពឆ័ត្រយោង៩១១ ដោយប្រកួតក្នុងទម្ងន់៥៧គីឡូក្រាម។ ងួន គានេះ ជាអ្នកប្រដាល់មិនមានឈ្មោះល្បីនោះទេ តែគេជាអ្នកប្រដាល់ដែលស៊ូចំពោះការប្រកួតមិនចេះដកថយទេក្នុងការប្រកួត។ ខឹក សុខឿន គេមិនមែនជាអ្នកប្រដាល់ថ្មីនោះឡើយ គឺគ្រាន់តែជាអ្នកប្រដាល់ស្រករក្រោយប៉ុណ្ណោះ។ សម្រាប់ការជួបគ្នារវាង ងួន គា និង សុខឿននេះ ពុំដឹងនរណាឈ្នះទេ ?
ការប្រកួតចុងក្រោយរបស់ សុខឿន គឺជាមួយគង់ ហ៊ូវ អ្នកប្រដាល់ជើងថ្មី ក្លឹបមជ្ឈមណ្ឌលកីឡខ.ភ.ម ប៉ុន្តែពុំមានប្រកាសលទ្ធផលឈ្នះចាញ់ទេ ដោយសារ សុខឿនប្រកួតមិនអស់ពីសមត្ថភាព ។ ឯការប្រកួតចុងក្រោយរបស់ ងួន គាវិញ គឺវាយចាញ់ពិន្ទុ ម៉ន ព្រំម៉ាញ អ្នកប្រដាល់ក្លឹបការិយាល័យទី៥កងទ័ពជើងគោក។ ឌុច ឌួង អ្នកប្រដាល់ក្លឹបបាត់ដំបងពាយ័ព្យ នឹងជួបប្រកួតសាកកណ្ដាប់ដៃជាមួយហាក់ ចាន់ធី អ្នកប្រដាល់ជើងថ្មី ក្លឹបរ៉ាហាប់ស្វាយប៉ាក។ ពួកគេមិនធ្លាប់ដែលជួបគ្នាទេកន្លងមក។ ហាក់ ចាន់ធី ថ្វីត្បិតតែជាអ្នកប្រដាល់ជើងថ្មី ប៉ុន្តែគេប្រកួតមានផ្លែល្អ ពិសេសគឺស្នៀតកែងនិងជង្គង់ ព្រោះគេមានកម្ពស់ខ្ពស់គួរសមដែរ។ អ្វីដែលគេបារម្ភជំនួស ឌុច ឌួង នោះគឺបញ្ហាកម្លាំងស៊ុហ្វខ្សោយ ដែលធ្វើអោយលទ្ធផលប្រកួតរបស់គេកន្លងមកមិនសូវបានល្អ។ ឌុច ឌួង ប្រកួតចុងក្រោយនេះ វាយចាញ់ចាន់ រក្សា អ្នកប្រដាល់ក្លឹបអេភូថងកីឡាដោយពិន្ទុ។
ចាន់ធី ថ្វីត្បិតតែជាអ្នកប្រដាល់ជើងថ្មី តែគេមិនជាមានស្នៀតប្រដាល់ល្អទេ។ ឯតិចនិកប្រកួត មិនជាប៉ុន្មានឡើយ។ គេវាយដោយលក្ខណៈផ្សងព្រេងដែរទេ។ អ្នកប្រដាល់រូបនេះ មានកម្លាំងកាយសម្បទាមិនជារឹងមាំនិងខ្លាំងប៉ុន្មានទេ ។ ទោះជាយ៉ាងណា ចាន់ធី ប្រកួតចុងក្រោយរបស់គេ គឺវាយចាញ់ ភិន សុទី ក្លឹបកងពលធំអន្តរាគមន៍លេខ៣ដោយពិន្ទុ។ ចាំមើល ឌុច ឌួងអាចផ្ដួលយកឈ្នះ ហាក់ ចាន់ធីបានឬអត់ទេ ? សម្រាប់ការជួបគ្នាលើកដំបូងនេះ។
ចំណែក ឯម ចំណាប់ក្លឹបឫទ្ធីពោធិសែនជ័យ នឹងជួបប្រកួតជាមួយ ជេត សីហា ក្លឹបកងរាជអាវុធហត្ថរាជធានីភ្នំពេញ។ ពួកគេពីរនាក់នេះ មិនដែលជួបគ្នាទេកន្លងមក ដូច្នេះការជួបគ្នាលើកដំបូងនេះ មិនដឹងថាអ្នកណាជាអ្នកឈ្នះនោះឡើយ៕ វិសិដ្ឋ(រូប៥)
0 Comments