ព្រៃវែង ៖ នៅព្រឹកថ្ងៃទី០៦ ខែមករា ឆ្នាំ២០១៥ នៅស្រុកបាភ្នំខេត្តព្រៃវែងបានប្រារព្ធខួប អនុស្សាវរីយ៍លើកទី៣៦ ទិវាជ័យជំនះថ្ងៃទី៧ ខែមករា ឆ្នាំ១៩៧៩-ថ្ងៃទី៧ ខែមករា ឆ្នាំ២០១៥ ក្រោមអធិបតីភាព លោក ព្រំ សុខា រដ្ឋលេខាធិការក្រសួងមហាផ្ទៃ សមាជិកគណៈកម្មាធិការកណ្ដាល និងជាប្រធានក្រុមការងារគណបក្សប្រជាជនកម្ពុជាស្រុកបាភ្នំ អមដំណើរមន្ត្រីក្រសួងមហាផ្ទៃ ប្រធានក្រុមប្រឹក្សាស្រុក អភិបាល អភិបាលរង ស្រុក មន្ត្រីរាជការជុំវិញសាលាស្រុក ព្រមទាំងប្រជាពលរដ្ឋ លោកគ្រូ អ្នកគ្រូ និងសិស្សានុសិស្សប្រមាណជិត៤.០០០នាក់។
លោក ម៉ៅ អៀង ប្រធានក្រុមប្រឹក្សាស្រុក និងជាប្រធានគណៈកម្មាធិការគណបក្សប្រជាជនស្រុកបាភ្នំឡើងអានសន្ទរកថា សម្ដេចអគ្គធម្មពោធិកសាល ជា ស៊ីម ប្រធានព្រឹទ្ធសភារួចមក លោកស្រី ឯម គឹមមន្ថា តំណាងឲ្យសមាជិក សមាជិកាក្នុងអង្គមិទ្ទិញទាំងមូលបានឡើងធ្វើចំណាប់អារម្មណ៍ និងប្ដេជ្ញាចិត្តទាំងអួលដើមកថា លោកស្រីនៅចងចាំជានិច្ចមិនអាចបំភ្លេចបានការធ្វើទារុណកម្មដ៏សាហាវព្រៃផ្សៃ បង្អត់អាហារហូបមិនគ្រប់គ្រាន់ធ្វើការហួសកម្លាំងឪពុកព្រាត់កូន កូនព្រាត់ម្តាយ គួរឲ្យសង្វេគរកអ្វីប្រៀបផ្ទឹមមិនបានឡើយ ហើយអ្នកស្រីប្ដេជ្ញាចងចាំជានិច្ចថ្ងៃទី៧ ខែមករា ជាទិវាជ័យជំនះលើរបបប្រល័យពូជសាសន៍មានថ្ងៃទី៧ ខែមករា ទើបមានអ្វីៗគ្រប់យ៉ាងមកដល់សព្វថ្ងៃនេះ។
លោក ព្រំ សុខា បានឡើងមានមតិសំណេះសំណាលក្នុងអង្គមិទ្ទិញទាំងមូលរំលឹកឡើងវិញនូវការឈឺចាប់សេចក្តីស្រេកឃ្លានរស់រង់ចាំថ្ងៃស្លាប់ដូចរស់ក្នុងនរកប្រាំបួនជាន់ ដូច្នេះប្រជាពលរដ្ឋខ្មែរនៅចងចាំមិនភ្លេចការធ្វើទារុណកម្មគ្រប់បែបយ៉ាងមកលើរូបរាងកាយ ហើយគួរឲ្យអាណិតអាសូរបំផុត ប្រជាពលរដ្ឋស្លូតត្រង់ជាង៣លាននាក់ដែលស្លាប់នៅក្នុងរបបប្រល័យពូជសាសន៍។
លោកបានលើកឡើងទៀតថា អ្នកដែលមិនទទួលស្គាល់ថ្ងៃ១៧ ខែមេសា ឆ្នាំ១៩៧៥ ដល់ថ្ងៃទី០៦ ខែមករា ឆ្នាំ១៩៧៩ គឺប្រជាជនខ្មែររស់ក្នុងនរក គឺក្នុងរបបប្រល័យពូជសាសន៍នេះឯង។ ដូច្នេះបើគ្មានថ្ងៃទី៧ ខែមករា នោះទេ ក៏ពួកយើងមិនអាចមានអ្វីៗគ្រប់បែបយ៉ាងដូចសព្វថ្ងៃនេះដែរ៕
សារ៉ាត់
0 Comments