សៀមរាប ៖ កាលព្រឹកថ្ងៃទី ០៧ ខែមករា ឆ្នាំ២០១៥ព្រឹកមិញនេះ នៅខេត្តសៀមរាប ទាំងព្រះសង្ឃ ថ្នាក់ដឹកនាំ មន្ត្រីរាជការ លោកគ្រូ អ្នកគ្រូ ក្រុមយុវជនកាយរិទ្ធ យុវជនកាកបាទក្រហម សិស្ស និស្សិត គរុសិស្ស កម្លាំងប្រដាប់អាវុធ និង ប្រជាពលរដ្ឋ ប្រមាណជាង៦ពាន់នាក់ បាននិមន្ត និង អញ្ជើញមកជួបជុំគ្នាប្រារព្ធធ្វើមិទ្ទិញអបអរសាទរខួបអនុស្សាវរីយ៍លើកទី៣៦ ស្មារតីថ្ងៃជ័យជំនះ៧មករា ១៩៧៩ -៧មករា ២០១៥ ដែលបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់លោក ទៀ បាញ់ សមាជិកគណៈអចិន្ត្រៃយ៍គណៈកម្មាធិការកណ្តាល និងជាប្រធានក្រុមការងារចុះជួយមូលដ្ឋានខេត្តសៀមរាប ដោយមានការអញ្ជើញចូលរួមពីសំណាក់ឯកឧត្តម លោកឧកញ៉ា លោកជំទាវ ជាសមាជិកព្រឹទ្ធសភា រដ្ឋសភា សមាជិកក្រុមការងារ និងគណៈអចិន្ត្រៃយ៍បក្សខេត្ត សមាជិកគណៈកម្មាធិការបក្សខេត្ត ក្រុមប្រឹក្សាខេត្តផងដែរ។
បន្ទាប់ពីការគោរពទង់ជាតិ និង គោរពវិញ្ញាណក្ខន្ឋ ដល់កម្មាភិបាល យុទ្ធជន យុទ្ធនារី ដែលបានពលីជីវិតក្នុង បុព្វហេតុរំដោះជាតិមាតុភូមិ និង វិញ្ញាណក្ខន្ឋជនរួមជាតិរាប់លាននាក់ ដែលបានបាត់បង់ជីវិតទៅយ៉ាងអយុត្តិធម៌ក្នុង របបដ៏យ៉ុងឃ្នង ប៉ុល ពត។ ក្នុងកិច្ចស្វាគមន៍របស់លោក ឃឹម ប៊ុនសុង ប្រធានគណៈកម្មាធិការនៃគណបក្សប្រជាជនខេត្ត និងជាអភិបាលនៃគណៈអភិបាលខេត្តសៀមរាប ក៏បានលើកឡើងពីលទ្ធផល និង ភាពជោគជ័យ ដែលសម្រេចបាននៅទូទាំងប្រទេស ដ៏ធំធេងរបស់គណបក្សប្រជាជនកម្ពុជា ក៏ដូចរាជរដ្ឋាភិបាលកម្ពុជាលើគ្រប់វិស័យ ជាសំខាន់នៅលើទឹកដីប្រវត្តិសាស្ត្រ នៃខេត្តសៀមរាបនាឆ្នាំ២០១៤កន្លងមកនេះ។
មានមតិសំណេះសំណាលជាមួយព្រះសង្ឃ មន្ត្រីរាជការ និង ប្រជាពលរដ្ឋ លោក ទៀ បាញ់ បានថ្លែងផងដែរ ថា ការជួបជុំគ្នានេះ ដើម្បីរំឮកនូវទិវាជ័យជំនះ ក្នុងស្មារតីគោរពដឹងគុណចំពោះវីរៈយុទ្ធជន យុទ្ធនារី និង អ្នកសេ្នហា ជាតិ ដែលបានធ្វើពលីកម្ម ក្នុងបុព្វហេតុរំដោះជាតិមាតុភូមិ និងអាយុជីវិតប្រជាជនពីរបបប្រល័យពូជសាសន៍ ប៉ុល ពត ទោះបីរយៈពេល៣៦ឆ្នាំបានកន្លងទៅហើយក្តី តែភាពឈឺចាប់ អារម្មណ៍តក់ស្លុតនិងការរន្ធត់ចិត្ត នៅដិតដាមក្នុងអារម្មណ៍របស់យើងទាំងអស់គ្នាហាក់បីដូចជានៅថ្មីៗ តែបើយើងពិនិត្យមើលក្នុងរយះកាលនៃរបបកម្ពុជាប្រជាធិបតេយ្យ ប្រទេសជាតិយើងនិង ប្រជាជនទទួលរងនូវវិនាសកម្មនិងសោកនាដកម្មដែលពុំធ្លាប់មានក្នុងប្រវត្តិសាស្ត្រមនុស្សលោក ដែលជាព្រឹត្តិការណ៍ប្រវត្តិសាស្ត្រ ដែលមានអត្ថន័យដ៏ធំធេង សម្រាប់ប្រជាជាតិខ្មែរគ្រប់ជំនាន់ ក៏ដូចមនុស្សជាតិដែលស្នេហាសន្តិភាព និង យុត្តិធម៌នៅលើពិភពលោក។ លោកក៏បានគូសបញ្ជាក់ផងដែរ ពីខ្លឹមសារនៃសុន្ទរកថារបស់សម្តេចសម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភា និង ជាប្រធានគណបក្សប្រជាជនកម្ពុជា បានលើកឡើងថា ថ្ងៃនេះជាថ្ងៃរំលឹកខួបអនុស្សាវរីយ៍លើកទី៣៦នៃទិវាជ័យជំនះ៧មករា ឆ្នាំ១៩៧៩ ជាថ្ងៃរំដោះជីវិតប្រជាជនពីសមុទ្រឈាមនៃរបបប្រល័យពូជសាសន៍ប៉ុល ពត ហើយក៏ជាថ្ងៃកំណើតទី២ ដែលបានកែប្រែសង្គម និង ប្រជាជាតិកម្ពុជា ទាំងមូលឲ្យរស់រានឡើងវិញហើយទុក្ខវេទនានេះក៏បានស្ថិតក្នុងក្រអៅបេះដូងរបស់ប្រជាពលរដ្ឋគ្រប់ៗ រូបផងដែរ ។ ដូច្នេះប្រមុខរាជរដ្ឋាភិបាលបច្ចុប្បន្ននេះ គឺជាតួអង្គស្ថាបនិកនៃការបង្រួបបង្រួមជាតិ ផ្សះផ្សាជាតិ ធ្វើឲ្យប្រទេសជាតិ មានសុខសន្តិភាព ក្រោមនយោបាយឈ្នះៗ ការស្ដារប្រទេសជាតិឲ្យមានកេរ្តិ៍ឈ្មោះលេចត្រដែតឡើងវិញ លើឆាកអន្តរជាតិ ហើយបាននិងកំពុងកែប្រែមុខមាត់ប្រទេសជាតិឲ្យមានការរីកចម្រើន ប្រជាជនមានជីវភាពធូរធារជាបន្តបន្ទាប់ បើគ្មាន ៧មករា ក៏យើងគ្មានថ្ងៃនេះដែរ។ ដូច្នេះស្មារតីថ្ងៃជ័យជំនះ៧មករា បានកំពុងជំរុញដល់កិច្ច អភិវឌ្ឍន៍ប្រទេសកម្ពុជា ឈានឆ្ពោះទៅរកភាពរីកចម្រើនរុងរឿងដូចបណ្តាប្រទេស
អច្ឆរិយលើលោកផងដែរ។
ក្នុងការឆ្លើយតបទៅនឹងការអភិវឌ្ឍន៍រីកចម្រើនរយៈពេល៣៦ឆ្នាំ ក្រោយជ័យជំនៈ៧មករា ជាប្រវត្តិសាស្ត្រ ក៏ មានតំណាង ព្រះសង្ឃ មន្ត្រីរាជការ សិស្ស កងកម្លាំងប្រដាប់អាវុធ និង ប្រជាពលរដ្ឋ បានធ្វើចំណាប់អារម្មណ៍ ព្រម ទាំងគាំទ្រនូវស្មារតី ថ្ងៃជ័យជំនះ ៧មករា និង ប្រសិទ្ធពរ សូមឲ្យស្មារតីថ្ងៃជ័យជំនះ ៧មករា ឲ្យស្ថិតនៅក្នុងក្រអៅ បេះដូងប្រជាជនគ្រប់រូបជាអមតៈផងដែរ។
បន្ទាប់ពីគណៈអធិបតី និង ភ្ញៀវកិត្តិយស បានធ្វើការ លែងព្រាប និង បង្ហោះប៉េងប៉ោង ដើម្បីសុំឲ្យប្រទេសកម្ពជា ជួបនូវសុខសន្តិភាព និង កិច្ចអភិវឌ្ឍន៍ រីកចម្រើនលើគ្រប់វិស័យរួចមក គណៈអធិបតី និង គណៈប្រតិភូ ក៏បាន អញ្ជើញចុះសួរសុខទុក្ខបងប្អូនអ្នកជម្ងឺ ដែលកំពុងសម្រាក់ព្យាបាលនៅ តាមមន្ទីរពេទ្យយោធភូមិភាគទី៤ និង មន្ទីរបង្អែកខេត្តសៀមរាប សរុបចំនួន ៤៤០នាក់ ដោយម្នាក់ទទួលបាន ទឹកដោះគោ ០១កំប៉ុង ស្កសរ ១គក្រ មី១០ កញ្ចប់ និង ថវិកាមួយម៉ឺនរៀល។ ឆ្លៀតក្នុងឱកាសព្រឹកនោះដែរឯ.ឧ ទៀ បាញ់ ក៏បានជួបធ្វើការសំណេះសំណាលជា មួយនិវត្តន៍ជន ជាមន្ត្រីរាជការស៊ីវិល កងកម្លាំងប្រដាប់អាវុធ និង គ្រួសារមានគុណ បំណាច់ចំពោះជាតិមាតុភូមិ ចំនួន៧១០រូប ដោយបានឧបត្ថម្ភនូវថវិកា ម្នាក់ៗ ៨ម៉ឺនរៀលផងដែរ៕
0 Comments