មហាសេដ្ឋីហុងកុងលោកលី កាស៊ីង ដែលជាមនុស្សអ្នកមានបំផុតនៅអាស៊ីអស់រយៈពេលជិត២ទសវត្សរ៍មកហើយនោះ កាលពីថ្ងៃសុក្រ ទី០៩ ខែមករា បានប្រកាសអំពីការរៀបចំឡើងវិញនូវក្រុមហ៊ុនដ៏ធំរបស់លោកដែលលាតសន្ធឹងពីកំពង់ផែទៅដល់ទូរស័ព្ទចល័ត ទៅជាក្រុមហ៊ុនចុះបញ្ជីថ្មី២។
លោកលី និងសមាជិកគ្រួសាររបស់លោកបានត្រួតត្រាក្រុមហ៊ុន Cheung Kong និងសាខារបស់ខ្លួន Hutchison Whampoa ដែលបានចុះបញ្ជីនៅហុងកុង។ តាមរយៈធ្វើជំនួញភាគហ៊ុនបន្ដបន្ទាប់នោះ ក្រុមហ៊ុនដ៏ធំនេះនឹងត្រូវបានកើតឡើងវិញទៅជាក្រុមហ៊ុនមួយត្រួតត្រាមើលអចលនទ្រព្យពិតប្រាកដទាំងអស់របស់ខ្លួន និងក្រុមហ៊ុនទី២សម្រាប់ប្រកបមុខជំនួញដែលមិនមែនជាអចលនទ្រព្យ។
លោកលី អាយុ៨៦ឆ្នាំ បាននិយាយនៅក្នុងសេចក្ដីថ្លែងការណ៍មួយថា ការរៀបចំឡើងវិញនេះ គឺជាព្រឹត្ដិការណ៍មួយដែលនឹងផ្ដល់ផលចំណូលកាន់តែល្អសម្រាប់ម្ចាស់ភាគហ៊ុនទាំងឡាយ។ អ្នកវិនិយោគទុន មិនចូលចិត្ដរចនាសម្ព័ន្ធសាជីវកម្មដែលមានស្រាប់នេះទេ ពីព្រោះវាបានបញ្ចូលគ្នានូវមុខជំនួញផ្សេងៗគ្នាដែលធ្វើឲ្យពួកគេលំបាកក្នុងការវាយតម្លៃ។ ការប្រកាសនេះក៏ជាប្រផ្នូលនៃការផ្លាស់ប្ដូរនៅក្នុងការដឹកនាំផងដែរ ដែលលោកលី សង្ឃឹមថា នឹងប្រគល់ការដឹកនាំទៅឲ្យកូនប្រុសច្បងរបស់លោកឈ្មោះវិចទ័រ។
លោកលី មានទ្រព្យសម្បត្ដិ៣៣.៥ពាន់លានដុល្លារ។ នេះបើយោងទៅតាមទស្សនាវដ្ដី Forbes បានឲ្យដឹង។ គេបានដាក់ឈ្មោះក្រៅឲ្យគាត់ថា ស៊ូពើមែននៅហុងកុង ចំពោះទេពកោសល្យរកប្រាក់របស់គាត់។ មុខជំនួញរបស់គាត់មាននៅក្នុងប្រទេសជាង៥០ និងប្រើមនុស្ស២៧០,០០០នាក់៕
ថាលីយ៉ាន
0 Comments