ស្ទឹងត្រែង ៖ ជនសង្ស័យ២នាក់ពាក់ព័ន្ធនិងការប្រើឧបករណ៍នេសាទឆក់ត្រីខុសច្បាប់ដែលកំលាំងខណ្ឌរដ្ឋបាលជលផលស្ទឹងត្រែង សហការជាមួយឆ្មាំទន្លេត្បូងខ្លា ឆ្មាំទន្លេកោះជ្រឹម ចុះឃាត់ខ្លួនកាលពីព្រលប់ថ្ងៃ៧ មករា ឆ្នាំ២០១៥នៅចំណុចកោះឈើទាល ស្ថិតក្នុងភូមិត្បូងខ្លា ឃុំអូរម្រះ ស្រុកសៀមបូកនោះ នៅល្ងាចថ្ងៃទី៩មករានេះ ត្រូវបានតុលាការសម្រេចឃុំខ្លួនជាបណ្តោះអាសន្ន។
លោកដៀប បូរ៉ានាយរងខណ្ឌរដ្ឋបាលជលផលស្ទឹងត្រែងបានឲ្យដឹងថា ជនសង្ស័យ២នាក់ដែលមន្ត្រីជលផលឃាត់ខ្លួនមានទី១ឈ្មោះសាវែង បុន្នី អាយុ៣០ឆ្នាំ ទី២-ឈ្មោះសាន់ ចាន់ថនអាយុ២៦ឆ្នាំអ្នកទាំងពីរមានទីលំនៅភូមិហាងខូបាន សង្កាត់សាមគ្គី ក្រុងស្ទឹងត្រែង ពួកគេបានប្រព្រឹត្តបទល្មើសជាក់ស្តែងនៅចំណុចឃាត់ខ្លួនខាងលើ។
លោកនាយរងខណ្ឌរដ្ឋបាលជលផលខេត្តស្ទឹងត្រែងបានបញ្ជាក់ថា ការឃាត់ខ្លួនជនសង្ស័យ២នាក់គឺខាងលើយោងទៅតាមសេចក្តីប្រកាសហាមសាជាថ្មីដល់អ្នកនេសាទឲ្យបញ្ឈប់ការ ប្រើប្រាស់ឧបករណ៍ខុសច្បាប់និងការធ្វើនេសាទនៅតាមអន្លង់អភិរក្សពូជត្រីនិងត្រីផ្សោតដើម្បីយើងរួមគ្នាថែរក្សាធនធានមច្ឆាជាតិឲ្យសំបូរឡើងវិញ តែជនសង្ស័យ២នាក់នេះ នៅតែប្រព្រឹត្តត្រូវតែប្រឈមចំពោះមុខច្បាប់។
លោកដៀបបូរ៉ានាយរងខណ្ឌរដ្ឋបាលជលផលខេត្តស្ទឹងត្រែងបានបញ្ជាក់ទៀតថា កន្លងមកអាជ្ញាធរពាក់ព័ន្ធបានធ្វើការផ្សព្វផ្សាយនូវច្បាប់ជលផលជូនដល់បងប្អូនប្រជាពលរដ្ឋបានជ្រួតជ្រាបដល់មូលដ្ឋានរួចអស់ហើយ តែបុគ្គលមួយចំនួននៅតែលួចលាក់ ប្រើប្រាស់ឧបករណ៍នេសាទខុសច្បាប់ ដូចជាឧបករណ៍ ឆក់អួននិងដាយជាដើមទើបឆ្មាំទន្លេរកឃើញធ្វើការឃាត់ខ្លួនបែបនេះ។
លោកនាយរងខណ្ឌបានហាមដល់ប្រជាអ្នកនេសាទទាំងអស់ឲ្យបញ្ឈប់ ការប្រើ ឧបករណ៍ខុសច្បាប់ និងធ្វើនេសាទតាមកន្លែងអន្លង់អភិរក្ស ហើយប្រើប្រាស់ឧបករណ៍ស្របច្បាប់ជាលក្ខណៈគ្រួសារវិញ ខ្ញុំសូមអំពាវនាវដល់បងប្អូនប្រជាពលរដ្ឋទាំងអស់ សូមឲ្យប្រើប្រាស់ឧបករណ៍ជាលក្ខណៈគ្រួសារ ហើយហ្នឹងហាមផ្តាច់គឺមិនឲ្យប្រើឧបករណ៍ខុសច្បាប់ ដូចជាឆក់ត្រី គប់គ្រាប់បែក ឆ្នាំបំពុល ជាពិសេសហាមផ្តាច់មិនប្រើនៅអន្លង់អភិរក្សតាមដងទន្លេមេគង្គនិងតាមដងទន្លេដទៃទៀត។
លោកមិនានៅភូមិឃុំត្បូងខ្លាស្រុកសៀមបូកខេត្តស្ទឹងត្រែងបាននិយាយថា ពិតជាមានអ្នកដែលលួចលាក់ធ្វើនេសាទខុសច្បាប់ ទោះជាមានមន្ត្រីជលផលចាប់ខ្លួនជនល្មើសបានជាបន្តបន្ទាប់ក៏ដោយ ហើយសកម្មភាពល្មើសទាំងនេះ សូមកុំឲ្យកើតមានទៀត សុំឲ្យងាកមកចូលរួម អនុវត្តច្បាប់ទាំងអស់គ្នា បើយើងធ្វើខុសច្បាប់អាចបំផ្លាញអស់ធនធានមច្ឆាជាតិ អញ្ចឹងយើងរួមគ្នាទុកថែរក្សាទាំងអស់គ្នាកុំឲ្យមានដូចជាប្រដាប់ឆក់ដូចជាអួន,មងនិងដាយសុំកុំឲ្យមាន។
ជាក់ស្តែងដូចជាជនសង្ស័យ២នាក់ខាងលើ ពាក់ព័ន្ធនិងការប្រើឧបករណ៍នេសាទខុសច្បាប់ ដោយសារមានការផ្សព្វផ្សាយនៅពេលថ្មីៗនេះហើយ គឺពួកគេនៅតែប្រព្រឹត្ត ទើបប្រឈមនិងច្បាប់។ នៅល្ងាចថ្ងៃទី៩ខែមករានេះ ជនសង្ស័យ២នាក់ត្រូវបានតុលាការសម្រេចឃុំខ្លួននៅព័ន្ធធនាគារកាំងមេម៉ាយជាបណ្តោះអាសន្នដើម្បីរង់ចាំធ្វើការស៊ើបអង្កេតបន្ត៕
ងិន លីម
0 Comments