ភ្នំពេញ ៖ ព្រឹត្តិការណ៍ប្រកួតបាល់ទាត់ដណ្ដើមពានរង្វាន់សម្ដេចហ៊ុន សែន ឆ្នាំ២០១៥ ឬហៅថា« Hun Sen Cup 2015 » វគ្គជម្រុះ១៦ក្រុមចុងក្រោយឬ១ភាគ៨ផ្តាច់ព្រ័ត្រនោះ បានចាប់ផ្តើមនៅថ្ងៃទី២១ខែមករានេះហើយ។
ការប្រកួតក្នុងវគ្គ១ភាគ៨ផ្ដាច់ព្រ័ត្រនេះ មាន៤ពូលដែលរួមមាន៣២ប្រកួត គឺវគ្គវិលជុំជម្រុះក្នុងពូលមាន២៤ប្រកួត វគ្គ១ភាគ៤ផ្តាច់ព្រ័ត្រមាន៤ប្រកួត វគ្គពាក់កណ្ដាលផ្ដាច់ព្រ័ត្រមាន២ប្រកួត ដណ្ដើមចំណាត់ថ្នាក់លេខ៣ មាន១ប្រកួត និងការប្រកួតផ្ដាច់ព្រ័ត្រមាន១ប្រកួត។
វគ្គវិលជុំដើម្បីជម្រុះក្នុងពូលប្រកួតនៅទីលានសាលាបាល់ទាត់ទន្លេបាទី ចាប់ពីវគ្គ១ភាគ៤ផ្ដាច់ព្រ័ត្រទៅដល់ការប្រកួតដណ្ដើមចំណាត់ថ្នាក់លេខ៣ និងវគ្គផ្ដាច់ព្រ័ត្រប្រកួតនៅទីលានបាល់ទាត់ថ្មីរបស់ខេត្តស្វាយរៀង។
នេះជាវគ្គដ៏សំខាន់ដែលក្រុមខ្លាំងៗដែលនៅក្នុងពូលជាមួយគ្នានោះ អាចនឹងយំមិនចេញ ដោយសារតែជ្រុះធ្លាក់ហាលអាវចេញពីការប្រកួតនោះ។ វគ្គផ្ដាច់ព្រ័ត្រនេះមាន១៦ក្រុម ដែលជាក្រុមខ្លាំងៗ ដែលឈ្នះក្នុងការប្រកួតជម្រុះតាមតំបន់ និងក្រុមខ្លាំងទាំង៨ក្នុងLeagueឆ្នាំមុន។
សម្រាប់ពូលA មានក្រុមអគ្គស្នងការដ្ឋាននគរបាលជាតិ ដែលជាក្រុមជើងឯកឆ្នាំចាស់ ខេត្តក្រចេះ Albirex Niigata និងក្រុមខេត្តត្បូងឃ្មុំ។ តាមការរំពឹងទុកនោះ សម្រាប់ក្រុមអគ្គស្នងការដ្ឋាននគរបាលជាតិ នឹងឆ្លងផុតវគ្គនេះដោយស្រួល។
ពូល B មានក្រុមបៀលប្រាយយូណាយធីត ក្រុមត្រាយអាស៊ី គីរីវង់សុខសែនជ័យ និង ក្រុមខេត្តកំពត។ ក្រុមបៀលប្រាយ និងត្រាយអាស៊ី ទំនងជាមិនបារម្ភឡើយ តែក៏មិនអាចមើលស្រាលគីរីវង់សុខសែនជ័យបានទេ។
ពូល C គឺជាពូលដែលផ្តុំទៅដោយក្រុមខ្លាំងៗដែរ ព្រោះមានក្រុមចំការកៅស៊ូបឹងកេត ដែលជាក្រុមខ្លាំង ភ្នំពេញក្រោនជាក្រុមជើងឯក League ឆ្នាំចាស់ ក្រសួងការពារជាតិក៏ធ្លាប់ធ្វើជាម្ចាស់ពាន Hun Sen-Cup និងក្រុមសហភាពសហព័ន្ធយុវជនកម្ពុជាខេត្តបាត់ដំបង ដែលជាក្រុមចំណូលថ្មី។
ពូល D ក៏ជាពូលគ្រាន់បើដែរ ដែលមានក្រុម Naga Corp ខេត្តស្វាយរៀងធ្លាប់ធ្វើជាម្ចាស់ពាន Hun Sen- Cup ២ រដូវកាល និងធ្លាប់ជាម្ចាស់ជើងឯក League ក្រុមអាជ្ញាធរអប្សរាខេត្តសៀមរាប និង ក្រុមខេត្តព្រៃវែង។
សម្រាប់ការប្រកួតនៅថ្ងៃដំបូងថ្ងៃទី២១ ខែមករា នៅទីលានមជ្ឈមណ្ឌលបាទីនោះ មាន៤ប្រកួត ដែលពូលA មាន២ប្រកួតជាការជួបរវាងអគ្គស្នងការដ្ឋាននគរបាលជាតិជាមួយខេត្តត្បូងឃ្មុំ ហើយក្រុមខេត្តក្រចេះជាមួយ Albirex Niigata ។ ចំណែក២ប្រកួតក្នុងពូលBវិញនោះ បៀលប្រាយយូណាយធីតជាមួយខេត្តកំពត និងមួយ១ប្រកួតទៀតក្រុមត្រាយអាស៊ីជាមួយគីរីវង់សុខសែនជ័យ។
សូមបញ្ជាក់ថា ការប្រកួតជម្រុះក្នុងពូលនេះ នឹងបញ្ចប់នៅថ្ងៃទី២៨ ខែមករា។ តាមការគ្រោងទុក ការប្រកួតវគ្គ១ភាគ៤ផ្តាច់ព្រ័ត្រ ចាប់ផ្តើមពីថ្ងៃទី៣១ ខែមករា និងថ្ងៃទី០១ ខែកុម្ភៈ ហើយការប្រកួតពាក់កណ្ដាលផ្តាច់ព្រ័ត្រនៅថ្ងៃទី១១ ខែកុម្ភៈ និងការប្រកួតផ្តាច់ព្រ័ត្រនៅថ្ងៃទី១៤ ខែកុម្ភៈ ឆ្នាំ២០១៥៕
វិសិទ្ធ
0 Comments