នគរបាលខណ្ឌដង្កោបញ្ជូនជនជាប់ចោទម្នាក់ទៅឃុំខ្លួនបណ្តោះអាសន្ននៅគុកព្រៃស
ភ្នំពេញ ៖ នគរបាលផ្នែកព្រហ្មទណ្ឌ នៃអធិការដ្ឋាននគរបាលខណ្ឌដង្កោ កាលពីរសៀល ថ្ងៃទី១២ ខែមករា ឆ្នាំ២០១៥ បានដឹកបញ្ជូនជនជាប់ចោទម្នាក់ ទៅឃុំខ្លួនបណ្តោះអាសន្ននៅមណ្ឌលកែប្រែ (ម១) ហៅ គុកព្រៃស តាមដីកាបង្គាប់ឲ្យឃុំខ្លួនរបស់សាលាដំបូងរាជធានីភ្នំពេញ។
ជនជាប់ចោទត្រូវបានឃុំខ្លួនបណ្ដោះអាសន្ននៅគុកព្រៃស ដោយយោងទៅតាមដីកា បង្គាប់ឲ្យឃុំខ្លួនរបស់លោក ម៉ុង មុនីសោភា ចៅក្រមស៊ើបសួរសាលាដំបូងរាជធានីភ្នំពេញ លេខ ៧០ និង៧១ ត ព្រ ចុះថ្ងៃទី១១ ខែមករា ឆ្នាំ២០១៥។
ជនជាប់ចោទឈ្មោះរិទ្ធ សុខកែវ ហៅ ទិត្យ សុគា ភេទប្រុស អាយុ២៨ឆ្នាំ មុខរបរមិនពិតប្រាកដ រស់នៅភូមិទួលសំបូរ សង្កាត់ព្រៃវែង ខណ្ឌដង្កោ។ ចំណែកជនរងគ្រោះឈ្មោះ សន ស្រីពៅ ភេទស្រី អាយុ៣៣ឆ្នាំ មុខរបររើសអេតចាយ រស់នៅភូមិទួលសំបូរ សង្កាត់ព្រៃវែង ខណ្ឌដង្កោ។
សមត្ថកិច្ចប្រាប់ឲ្យដឹងថា កាលពីថ្ងៃទី៧ ខែមករា ឆ្នាំ២០១៥ វេលាម៉ោង ២១និង៤០នាទី ជនសង្ស័យឈ្មោះ រិទ្ធ សុខកែវ ហៅ ទិត្យ សុគា បានដើរមកផ្ទះជនរងគ្រោះ ដើម្បីសួររកស៊ីមទូរស័ព្ទដែលឈ្មោះ ចាន់ សុផល ត្រូវជាប្តីជនរងគ្រោះបានខ្ចីពីថ្ងៃមុន។ ពេលនោះជនរងគ្រោះបានឆ្លើយប្រាប់ជនសង្ស័យថា ប្តីរបស់គាត់ឈ្មោះ ចាន់ សុផល មិននៅផ្ទះទេ តែជនសង្ស័យមិនព្រមស្តាប់សំដីជនរងគ្រោះនោះទេ នៅតែទារកស៊ីទូរស័ព្ទពីប្តីរបស់ជនរងគ្រោះដដែលៗ។ ដោយឮបែបនេះជនរងគ្រោះក៏បាននិយាយទៅកាន់ជនរងសង្ស័យម្តងទៀតថា ចាំថ្ងៃស្អែករូបគាត់សន្យាទិញស៊ីមទូរស័ព្ទថ្មីសងវិញ គ្រាន់តែប៉ុណ្ណឹងធ្វើឲ្យជនសង្ស័យខឹង ក៏ដោះខ្សែក្រវ៉ាត់ពីចង្កេះវាយទៅលើជនរងគ្រោះ បណ្តាលឲ្យបែកចិញ្ចើមខាងឆ្វេងហូរឈាមពេញផ្ទៃមុខ មិនតែប៉ុណ្ណោះជនសង្ស័យបានស្ទុះទៅវាយកញ្ចក់តុដាក់ទូរទស្សន៍បណ្តាលឲ្យបែក និងផ្តាច់ខ្សែមុងរបស់ជនរងគ្រោះចោលទៀត។
សមត្ថកិច្ចប្រាប់បន្តថា គ្រានោះដែរជនរងគ្រោះ បានស្រែកហៅរកសាច់ញាតិជិតខាងឲ្យមកជួយ ពេលនោះប្អូនថ្លៃជនរងគ្រោះក៏បានរត់ចេញពីផ្ទះនៅក្បែរនោះដើម្បីមកជួយ ស្រាប់តែជនសង្ស័យបានឃើញដូច្នេះក៏ស្រវ៉ារត់គេចខ្លួនបាត់ស្រមោល។ លុះព្រឹកឡើងថ្ងៃទី៨ ខែមករា ឆ្នាំ២០១៥ ជនរងគ្រោះបានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលព្រៃវែង រហូតវេលាម៉ោង ១៥ និង៣០នាទី ថ្ងៃដដែល ទើបតាមស្រាវជ្រាវឃាត់ខ្លួនជនសង្ស័យបាន នៅចំណុចភូមិទួលសំបូរ សង្កាត់ព្រៃវែង ខណ្ឌដង្កោ រាជធានីភ្នំពេញ។
សមត្ថកិច្ចប្រាប់បញ្ជាក់ឲ្យដឹងថា ក្រោយពីសួរនាំនៅប៉ុស្តិ៍រដ្ឋបាលព្រៃវែងទៅលើជនសង្ស័យខាងលើ ក៏ធ្លាយ១រឿងផ្សេងទៀត គឺករណីលួចទូរស័ព្ទដៃចំនួន ០២គ្រឿង ក្នុងនោះ១គ្រឿង ម៉ាក ខេមហ្វូន និង១គ្រឿងទៀត ម៉ាក សាំស៊ុង របស់ជនរងគ្រោះ ឈ្មោះ សាយ សុខលី ភេទប្រុស អាយុ៥៣ឆ្នាំ មុខរបរលក់បន្លែ ទីលំនៅភូមិទួលសំបូរ សង្កាត់ព្រៃវែង ខណ្ឌដង្កោ ហើយជនរងគ្រោះក៏បានដាក់ពាក្យបណ្តឹងប្តឹងជនសង្ស័យផងដែរ៕
រ៉ាវុទ្ធ
){kind=link}
0 Comments