ភ្នំពេញ ៖ មនុស្សក្មេង-ចាស់-ប្រុស-ស្រីចំនួន៦នាក់ដែលជាអ្នកលក់ទូរស័ព្ទដៃ និងអ្នកអង្គុយលេងនៅទីនោះ បានរងរបួសធ្ងន់និងស្រាលព្រមៗគ្នា បន្ទាប់ពីត្រូវរថយន្តម៉ាកសាំយ៉ុង ពណ៌ស្លែមួយគ្រឿងបើកបរស្រវឹងស្រាបានបើករេចង្កូតចូលទៅបុកសំយាបផ្ទះរបស់ប្រជាពលរដ្ឋ ព្រមទាំងទូតាំងដាក់លក់ទូរស័ព្ទដៃបណ្ដាលឲ្យមានអ្នករងរបួស និងខូចខាតសម្ភារៈមួយចំនួនតែមិនបណ្ដាលឲ្យរងគ្រោះដល់ស្លាប់នោះទេ។
ហេតុការណ៍នេះបានកើតឡើងកាលពីវេលាម៉ោង១៩យប់ ថ្ងៃទី២ ខែកុម្ភៈ ឆ្នាំ២០១៥ នៅតាមផ្លូវបេតុង ស្ថិតក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។ ក្នុងចំណោមជនរងគ្រោះទាំង៦នាក់មានក្មេងប្រុសម្នាក់ ឈ្មោះ ថា តឿ អាយុ៦ឆ្នាំ បានរងរបួសធ្ងន់ធ្ងរ និងក្មេងស្រីជំទង់ម្នាក់ទៀត ក៏រងរបួសធ្ងន់ដែរ។ ក្រៅពីនេះមានមនុស្សពេញវ័យ និងមនុស្សចាស់ក៏រងរបួសយ៉ាងដំណំដែរ។ រថយន្តបង្កម៉ាកសាំយ៉ុង ពណ៌ស្លែ ប្រភេទទេសចរណ៍១២កៅអី ពាក់ស្លាកលេខភ្នំពេញ2F1409 អ្នកបើកបរបានរត់គេចខ្លួនបាត់មិនត្រូវបានគេស្គាល់អត្តសញ្ញាណឡើយ។
តាមប្រភពព័ត៌មានបានឲ្យដឹងថា មុនពេលកើតហេតុគេឃើញរថយន្តបង្កបានបើកបរក្នុងទិសដៅពីជើងទៅត្បូង តាមបណ្ដោយផ្លូវបេតុង លុះទៅដល់ចំណុចកើតហេតុរថយន្តនេះបានរេចង្កូតទៅបុកចូលសំយាបផ្ទះរបស់ប្រជាពលរដ្ឋដែលនៅទីនោះមាន ទូតាំងលក់ទូរស័ព្ទ មានអ្នកអង្គុយលក់ទីនោះ និងមានក្មេង-ចាស់អង្គុយលេងនៅទីនោះផង បណ្ដាលឲ្យរងរបួសធ្ងន់និងស្រាលព្រមៗគ្នា មិនតែប៉ុណ្ណោះរថយន្តបានបុកធ្លាយជញ្ជាំងបន្ទប់ជួលនៅជាប់ៗគ្នានោះទៀតផង។
ប្រភពបន្តថា ខណៈពេលគេកំពុងតែភ័យស្លន់ស្លោទៅនឹងគ្រោះថ្នាក់នេះ ស្រាប់អ្នកបើកបររថយន្តមានឱកាសបានដាក់មេប្រូចបាត់ស្រមោល តែទោះជាយ៉ាងណានគរបាលចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញយករថយន្តទៅរក្សាទុកនៅការិយាល័យដើម្បីរង់ចាំស្រាវជ្រាវរកម្ចាស់ឲ្យចូលខ្លួនដោះស្រាយគ្នាតាមផ្លូវច្បាប់៕
វិទូ
0 Comments