ភ្នំពេញ ៖ ទីតាំងបើកសិប្បកម្មឈើខុសច្បាប់មួយកន្លែងបំពាក់ដោយម៉ាស៊ីនអាឈើប្រភេទរៃ (ម៉ាស៊ីនយក្ស) និងឈើបេងជាច្រើនម៉ែត្រគូប ត្រូវបានកម្លាំងរដ្ឋបាលព្រៃឈើរាជធានីភ្នំពេញចុះបង្ក្រាបនៅរសៀលថ្ងៃទី៣ ខែកុម្ភៈ ឆ្នាំ២០១៥ ស្ថិតនៅដីឡូត៍លេខ២៩៧ ផ្លូវលេខ១០៣ ភូមិ៤ សង្កាត់ផ្សារដើមថ្កូវ ខណ្ឌចំការមន។
មន្ត្រីរដ្ឋបាលព្រៃឈើបានប្រាប់ឱ្យដឹងថា ទីតាំងសិប្បកម្មឈើមួយកន្លែងនេះជាកម្មសិទ្ធិរបស់ឈ្មោះ លឹម អ៊ីវ៉ាន់ ឆេង ភេទប្រុស អាយុ៦៨ឆ្នាំ បានធ្វើអាជីវកម្មផលិតគ្រឿងសង្ហារិម ដោយប្រើប្រាស់ឈើប្រណីតខុសច្បាប់ និងអស់សុពលភាពធ្វើអាជីវកម្មជាយូរមកហើយ។ លើសពីនេះទៀត ម្ចាស់អាជីវកម្មបានដឹកជញ្ជូនឈើខុសច្បាប់មកផលិតជាគ្រឿងសង្ហារិម និងសម្ភារៈប្រើប្រាស់ ផ្សេងៗទៀតផង ដូច្នេះហើយទើបកម្លាំងរបស់លោកសុំការអនុញ្ញាតពីព្រះរាជអាជ្ញាអមសាលាដំបូងរាជធានីភ្នំពេញដឹកនាំកម្លាំងបង្ក្រាបនាពេលនេះ។
លោកបានបន្តឱ្យដឹងទៀតថា ក្នុងកិច្ចប្រតិបត្តិការនេះ យើងរឹបអូសឈើបេងចំនួន១៥១សន្លឹក ស្មើនិង៣,២៦០ម៉ែត្រគូប ម៉ាស៊ីនរណារធំឥតច្បាប់១គ្រឿង និងរថយន្តដឹកជញ្ជូនឈើខុសច្បាប់ម៉ាក សាំយ៉ុង ពណ៌ស ពាក់ស្លាកលេខភ្នំពេញ 2N-7093 រួចយកទៅកាន់ទីស្នាក់ការខណ្ឌរដ្ឋបាលព្រៃឈើកណ្ដាល ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមច្បាប់។ បច្ចុប្បន្នទាំងរថយន្ត និងប្រណីតទាំងនោះ ត្រូវបានយកទៅរក្សាទុកនៅទីស្នាក់ការខណ្ឌរដ្ឋបាលព្រៃឈើកណ្ដាល ដែលមានទីតាំងនៅក្នុងសង្កាត់ទួលស្វាយព្រៃ១ ខណ្ឌចំការមន ដើម្បីរង់ចាំការដោះស្រាយ។
ប្រភពពីប្រជាពលរដ្ឋនៅក្បែរនោះបានឲ្យដឹងថា ទីតាំងស្តុកនិងអាឈើខុសច្បាប់នេះបានបើកដំណើរការជាច្រើនឆ្នាំមកហើយ ដោយគ្មានច្បាប់អ្វីឡើយ ចំណែកឯសមត្ថកិច្ចជំនាញក៏មិនបានត្រួតពិនិត្យអ្វីដែរ គឺសម្ងំសុខរាងៗខ្លួន។ លុះក្រោយមកនៅថ្ងៃទី៣ ខែកុម្ភៈ គេមិនដឹងថាសមត្ថកិច្ចនិងម្ចាស់ទីតាំងចរចាគ្នាមិនត្រូវឬបែបណាទេ គេឃើញសមត្ថកិច្ចរដ្ឋបាលព្រៃឈើដឹកនាំដោយព្រះរាជអាជ្ញារងអមសាលាដំបូងរាជធានីភ្នំពេញ លោក ជា ម៉េត និងលោក អ៊ុត សុវណ្ណារិទ្ធ នាយរងសង្កាត់រដ្ឋបាលព្រៃឈើរាជធានី ព្រមទាំងមានការចូលរួមពីអាជ្ញាធរដែនដីផងដែរ។
ប្រជាពលរដ្ឋសង្ឃឹមថា សមត្ថកិច្ចនឹងបន្តចុះបង្ក្រាបបន្តទៀត ព្រោះនៅភូមិសាស្ត្រខណ្ឌចំការមនមានទីតាំងជាច្រើនទៀតកំពុងបើដោយខុសច្បាប់៕
ឌួងវិរះជ័យ
0 Comments