ស្ទឹងត្រែង ៖ ខេត្តស្ទឹងត្រែងធ្វើការសិក្សាពីបច្ចេកទេសបង្កាត់ពូជផ្កាពីខេត្តយ៉ាឡាយ ប្រទេសវៀតណាម និងគ្រោងបង្កើតឲ្យមានសហគមន៍ដាំផ្កានៅក្នុងខេត្តក្នុងពេលដែលពិនិត្យឃើញថា ផ្កាគ្រប់ប្រភេទត្រូវឈ្មួញនាំចូលមកលក់ក្នុងខេត្ត មានតម្លៃខ្ពស់នៅលើទីផ្សារ ជាពិសេសនៅថ្ងៃបុណ្យចូលឆ្នាំ។ ក្នុងឱកាសចុះសិក្សាពីបច្ចេកទេសដាំផ្កានៅភូមិអៀរគឿង ស្រុក/ខេត្តយ៉ាឡា ប្រទេសវៀតណាមកាលពីកន្លងមកថ្មីៗនេះ លោកស្រី គង់ ស៊ីផា អភិបាលរងខេត្តស្ទឹងត្រែងមានប្រសាសន៍ថាខេត្តនឹងរៀបចំឲ្យបងប្អូនប្រកបអាជីវកម្មលក់ផ្កានៅក្នុងខេត្តស្ទឹងត្រែង បានចុះទៅសិក្សាយកនូវបច្ចេកទេសបង្កាត់ពូជផ្កាគ្រប់ប្រភេទ បង្កើតធ្វើឲ្យមានភូមិផលិតផលមួយសម្រាប់ធ្វើអាជីវកម្មក្នុងស្រុកដើម្បីបម្រើសេចក្តីត្រូវការជូនប្រជាពលរដ្ឋកុំឲ្យចំណាយថវិកាច្រើនទិញផ្កាថ្លៃក្នុង១ដុំចាប់ពី៣ដុល្លារទៅ១០ដុល្លារមកប្រើប្រាស់ក្នុងកម្មវិធីបុណ្យ ឬសែនព្រេន។
លោកស្រីបង្ហាញថា នេះជាមូលដ្ឋានមួយអាចឲ្យអាជីវករមកសិក្សាយកបទពិសោធន៍ទៅពង្រឹងនៅតាមទីតាំងអាជីវកម្មរបស់ខ្លួន និងយកពូជផ្កាប្លែកៗទៅធ្វើការដាំដុះ។ ទីនេះគឺជាសួនបណ្ដុះផ្កាលក់នៅខេត្តយ៉ាឡាយ ដែលមានផ្កាគ្រប់ប្រភេទ មានគុណភាព មានសម្រស់ ហើយនាងខ្ញុំត្រឡប់ទៅខេត្តវិញ និងជូនដំណឹងនេះទៅដល់អាជីវករដែលគាត់មានចំណង់ចំណូលចិត្ត ដើម្បីបណ្ដុះផ្កាដើម្បីជួយដល់ជីវភាពដល់ពួកគាត់មកទស្សនាដកស្រង់បទពិសោធន៍នៅក្នុងសួនផ្កានេះ យកទៅធ្វើការដាំដុះ បន្តនៅជីវភាពខ្វះខាត និងជួយលើកជីវភាពរបស់គាត់នៅក្នុងខេត្តរបស់យើង ហើយជាពិសេសទៀតនោះ គឺយកពូជផ្កាថ្មីៗប្លែកៗល្អៗពីកន្លែងនេះដើម្បីយកទៅធ្វើការបណ្ដុះពូជ នៅក្នុងខេត្តស្ទឹងត្រែងយើងនេះ។
លោក សៀវ មិញ មន្ត្រីមន្ទីរការបរទេសនៃខេត្តយ៉ាឡាយបានអះអាងថា លោកនឹងទទួលយកនូវការចុះមកសិក្សាពីបច្ចេកទេសក្នុងការបង្ហាត់ និងបណ្ដុះពូជផ្កាទាំងនេះ ពីព្រោះខេត្តទាំងពីរស្ទឹងត្រែង យ៉ាឡាយ ធ្លាប់បានជួយគ្នាទៅវិញទៅមករួចមកហើយ។
លោកបានបញ្ជាក់ថា នៅខេត្តយ៉ាឡាយមានតែទីតាំងមួយនេះទេ ដែលខេត្តទើបបង្កើតជាសហគមន៍ដាំផ្កាដើម្បីទាក់ទាញរកទីផ្សារលក់ដូរ ប្រយោជន៍ជំរុញសហគមន៍ដាំផ្កានេះឲ្យមានការរីកចម្រើនទៅថ្ងៃមុខ។
សូមបញ្ជាក់ថា ពូជផ្កាដែលសហគមន៍ភូមិអៀរគឿង កំពុងធ្វើការដាំដុះនេះ នឹងចែកចាយដល់អតិថិជនមានផ្កាចំរុះពណ៌ ក្នុងនោះមាន ផ្កាស្បៃរឿង ផ្កាអ័រគីដេ ផ្កាកូឡាប ផ្ការំយោលរួត ផ្កាកន្ទុយមាន់ ផ្កាចាក់ ស្មុគ ផ្កាពររីករាយ ផ្កាកន្ទុយក្ងោក ផ្កាកន្ទុយមាន់ ផ្កាអង្គារសិល្ប៍ ផ្កាបំពងបៃតងនិងដើមផ្លែក្រូចឃ្វិចជាដើម៕
ងិន លីម
0 Comments