កំពង់ធំ ៖ ផឹកស្រាក្លែមសម្ដី ឈានដល់បុរស២នាក់ ផ្ទុះហិង្សាដាក់គ្នា ដោយប្រើប្រាស់កាំបិតខ្វែងកាប់គ្នា តែសំណាងល្អជនរងគ្រោះគេចផុត មិនត្រូវ.ក បែរជាត្រូវភ្លៅ សំណាងល្អមិនគ្រោះថ្នាក់ដល់ជីវិត ទីបំផុតត្រូវបានជាប់ខ្នោះបញ្ជូនមកកាន់ស្នងការនគរបាលខេត្តកំពង់ធំ ពីបទប្រើអំពើហិង្សាដោយចេតនា។
លោក វរសេនីយ៍ឯក កែ ខាន់ណារ៉ា ស្នងការរងទទួលបន្ទុកព្រហ្មទណ្ឌបានឲ្យដឹងថា អំពើហិង្សាដោយចេតនានេះបានកើតឡើងនៅថ្ងៃទី២៣ ខែកុម្ភៈ ឆ្នាំ២០១៥ នៅវេលាម៉ោង១៩និង១០នាទី ស្ថិតនៅភូមិជាំ ឃុំតាំងក្រសៅ ស្រុកប្រាសាទសំបូរ ខេត្តកំពង់ធំ ដែលបានបង្កឡើងដោយជនសង្ស័យ ឈ្មោះ អៀត ហៀត ភេទប្រុស អាយុ៣៣ឆ្នាំ បានប្រើប្រាស់កាំបិត(ខ្វែវ កកុក) កាប់ទៅលើជនរងគ្រោះឈ្មោះ ម៉ន ហេង ភេទប្រុស អាយុ៤៥ឆ្នាំ បានកាប់សំដៅស្មា តែត្រូវជនរងគ្រោះគេចទាន់ បណ្ដាលឲ្យត្រូវរបួសភ្លៅខាងឆ្វេង ប្រវែង៩ សង់ទីម៉ែត្រ ជនរងគ្រោះរស់នៅភូមិ/ឃុំជាមួយគ្នា ។ ក្រោយពីកើតហេតុ លោក កែ ខាន់ណារ៉ា បានដាក់បទបញ្ជាឲ្យលោក យ៉េង សារ៉េន អធិការស្រុកប្រាសាទសំបូរ សហការជាមួយប៉ុស្តិ៍រដ្ឋបាលឃុំតាំក្រសៅចុះទៅកន្លែងកើតហេតុភ្លាមៗ ហើយបានឃាត់ខ្លួនជនដៃដល់បញ្ជូនមកអធិការដើម្បីធ្វើកំណត់ហេតុ បញ្ជូនមកស្នងការ និងកសាងសំណុំរឿងបញ្ជូនមកតុលាការចាត់ការតាមនីតិវិធីច្បាប់ ចំណែកជនរងគ្រោះត្រូវបានសាច់ញាតិដឹកមកសង្គ្រោះនៅមន្ទីរពេទ្យឯកជន។
មហាជនទូទៅបាននិយាយថា ចាប់តាំងពៅលោកឧត្តមសេនីយ៍ត្រី ជូ សំអាន ជាស្នងការនគរបាលខេត្តកំពង់ធំ សភាពការណ៍អសន្តិសុខនៅក្នុងខេត្តកំពង់ធំនាពេលបច្ចុប្បន្នមានសភាពស្ងប់ស្ងាត់ សមត្ថកិច្ចអាចចាប់បានជនបង្កហេតុបានជាច្រើនករណី ព្រមទាំងបង្ក្រាបបទល្មើសផ្សេងៗបានទាន់ពេលវេលា និងបានធ្វើឲ្យប្រជាពលរដ្ឋមានភាពកក់ក្តៅ ដោយសារតែការខិតខំប្រឹងប្រែង និងយកចិត្តទុកដាក់របស់ថ្នាក់ដឹកនាំ៕
ប៊ុន រដ្ឋា
0 Comments