ព្រះសីហនុ ៖ លោក នូ សុផល ប្រធានមន្ទីរទេសចរណ៍ខេត្តព្រះសីហនុបានឲ្យដឹងថា ក្នុងរយៈពេលពិធីបុណ្យចូលឆ្នាំចិន-វៀតណាម រយៈពេល៣ថ្ងៃ គីពីថ្ងៃទី១៨ ដល់ថ្ងៃទី២០ ខែកុម្ភៈ ឆ្នាំ២០១៥ ខេត្តព្រះសីហនុទទួលបានភ្ញៀវទេសចរជាតិ និងអន្តរជាតិមានចំនួន៦២.៩៧៦នាក់ កើនឡើងជាងពិធីបុណ្យចូលឆ្នាំចិន-វៀតណាម២០១៤ ចំនួន២៧.២២% បើប្រៀបធៀបរយៈពេលដូចគ្នានឹងឆ្នាំ២០១៤ភ្ញៀវទេសចរជាតិមានចំនួន៥៦.០៦០នាក់ កើនឡើងចំនួន២៩.៤២% និងភ្ញៀវអន្តរជាតិមានចំនួន៦.៩១៦នាក់ កើនឡើង១១.៧៨%។
លោកប្រធានមន្ទីរបានបញ្ជាក់ទៀតថា ភ្ញៀវទេសចរនៅតែមានហូរចូលមកខេត្តព្រះសីហនុ ជាបន្តបន្ទាប់ ព្រោះនៅរដូវបុណ្យចូលឆ្នាំចិន២០១៥នេះ ចំពេលថ្ងៃចុងសប្ដាហ៍ ភ្ញៀវទេសចរនឹងមានពេលវេលាវែងក្នុងការធ្វើដំណើរជាមួយក្រុមគ្រួសារមកលេងកំសាន្តនៅតាមឆ្នេរសមុទ្រ តាមតំបន់រមណីយដ្ឋានក្នុងខេត្តព្រះសីហនុ ពិសេសម្ហូបអាហារសមុទ្រស្រស់ដែលមានរសជាតិឆ្ងាញ់។
កំណើនភ្ញៀវកើនឡើងដោយសារខេត្តព្រះសីហនុជាខេត្តទេសចរតភ្ជាប់ជាមួយខេត្តកំពត និងខេត្តកែប ព្រោះភ្ញៀវទេសចរមកសម្រាកលេងកំសាន្តនៅខេត្តព្រះសីហនុ រួចហើយបន្តទៅទស្សនានៅបូកគោ ក្នុងខេត្តកំពត និងបន្តទៅកំសាន្តនៅខេត្តកែប ឬអ្នកទេសចរពួកគេធ្វើដំណើរចូលលេងឆ្នេរកែប បន្តទៅកំសាន្តនៅបូកគោ ក្នុងទឹកដីខេត្តកំពតរួច និងមកលេងកំសាន្តនៅខេត្តព្រះសីហនុជាខេត្តចុងក្រោយមុននឹងចាកចេញទៅកាន់លំនៅដ្ឋានរៀងៗខ្លួន។
ខេត្តព្រះសីហនុជាខេត្តដែលមានតំបន់ទេសចរធម្មជាតិមានឆ្នេរខ្សាច់ស្រស់ សរស្អាតពីធម្មជាតិ និងមានរមណីយដ្ឋានទឹកធ្លាក់ក្បាលឆាយ និងទឹកធ្លាក់ថ្មរោង ក្នុងស្រុក កំពង់សិលា ជាពិសេសខេត្តព្រះសីហនុសម្បូរទៅដោយប្រជុំកោះជាច្រើនដែលបានអនុវត្តជាបណ្ដើរៗធ្វើឲ្យភ្ញៀវទេសចរជាតិ និងអន្តរជាតិមានចំណាប់អារម្មណ៍ជិះទូកទៅលេងកំសាន្តនៅតាមកោះ មានដូចជាកោះតួច ក្នុងទឹកដីសង្កាត់កោះរុង និងមានភូមិជាច្រើនទៀតនៅលើដីកោះត្រូវបានកែលំអជារមណីយដ្ឋានទេសចរ។ ដោយបច្ចុប្បន្នភ្ញៀវទេសចរបរទេសលេងកំសាន្តនៅខេត្តព្រះសីហនុ មិនភ្លេចទៅដេកសម្រាកនៅលើកោះ ក្នុងសង្កាត់កោះរុងនោះឡើយ។ ម្យ៉ាងទៀតសេវាដឹកជញ្ជូនទៅកាន់ដីកោះមានសុវត្ថិភាព និងមានភាពងាយស្រួលចំណាយពេលតែពី៤០ទៅ៥០នាទីប៉ុណ្ណោះ មិនដូចពីពេលមុនយើង ចង់ទៅកំសាន្តនៅលើកោះ ត្រូវចំណាយពេល២ម៉ោងកន្លះ ទៅ៣ម៉ោងទេ។
ពិធីបុណ្យចូលឆ្នាំចិន-វៀតណាម ឆ្នាំ២០១៤ ខេត្តព្រះសីហនុទទួលបានភ្ញៀវទេសចរជាតិ និងអន្តរជាតិចំនួន៤៩.៥០០នាក់ ក្នុងនោះភ្ញៀវទេសចរជាតិមានចំនួន៤៣.៣១៣នាក់ និងអន្តរជាតិមានចំនួន៦.១៨៧នាក់៕
ស៊ុយ ចាន់ធា
0 Comments