បាត់ដំបង ៖ យ៉ាងហោចណាស់ក៏មានមនុស្សដែលរងរបួសធ្ងន់ចំនួន៣នាក់ដែរក្នុងចំណោមជនរងគ្រោះចំនួន៧នាក់ ក្រោយពេលដែលមានរថយន្តចំនួនពីរគ្រឿងបានព្រលះគ្នាយ៉ាងពេញទំហឹងនៅលើកំណាត់ផ្លូវជាតិលេខ៥ ត្រង់ចំណុចផ្លូវកោង ស្ថិតក្នុងភូមិកំពង់ព្រះ ឃុំកំពង់ព្រះ ស្រុកសង្កែ ខេត្ត
បាត់ដំបង កាលពីថ្ងៃទី២១ ខែកុម្ភៈ ឆ្នាំ២០១៥ វេលាម៉ោង៦និង៥នាទីល្ងាច រហូតដល់រួញក្បាលទាំងសងខាង។
យោងតាមរបាយការណ៍របស់លោកអធិការរងសណ្ដាប់ធ្នាប់នៃអធិការដ្ឋាននគរបាលស្រុកសង្កែបានបញ្ជាក់ថា ដំបូងមានរថយន្តមួយគ្រឿងម៉ាកកាមរីបាឡែន ពណ៌ទឹកប្រាក់ ពាក់ស្លាកលេខ
បន្ទាយមានជ័យ 2A 5479 បានបោះពួយយ៉ាងលឿនតាមបណ្តោយផ្លូវជាតិលេខ៥ ក្នុងទិសដៅពីកើត ទៅលិច ដែលមើលទៅហាក់ដូចជាប្រញាប់ខ្លាំង។
លោកអធិការរងបានបន្តថា លុះទៅដល់ចំណុចកើតហេតុដែលផ្លូវមានស្ថានភាពកោងខ្លាំង
ផងនោះ ធ្វើឲ្យរថយន្តបាឡែននេះខំប្រឹងបួងចង្កូតដើម្បីកុំឲ្យជ្រុលធ្លាក់ផ្លូវ ប៉ុន្តែតែក្នុងមួយប៉ប្រិចភ្នែក
ប៉ុណ្ណោះ ស្រាប់តែរថយន្តនេះបួងជ្រុល ក៏រេចូលជ្រុលទៅចំណែកផ្លូវខាងឆ្វេង ចៃដន្យនៅពេលនោះដែរ ក៏មានរថយន្តតួរីសមួយគ្រឿង ពណ៌ទឹកប្រាក់ ពាក់ស្លាកលេខភ្នំពេញ 2V 3800 ដែលកំពុងធ្វើដំណើរច្រាសទិសគ្នា ហើយក៏បានបុកយ៉ាងពេញទំហឹងបណ្ដាលឲ្យក្បាលរថយន្តទាំងពីរគ្រឿងរួញយ៉ាងដំណំដូចគ្នា និងបង្កឲ្យអ្នកដំណើរដែលជិះនៅក្នុងរថយន្តទាំងសងខាងរងរបួសជាច្រើននាក់។
ភ្លាមៗនោះដែរ សមត្ថកិច្ចបានបញ្ជូនអ្នករបួសដែលសរុបមានចំនួន៧នាក់ ក្នុងនោះធ្ងន់ចំនួន៣នាក់(ប្រុស២នាក់) ទៅកាន់មន្ទីរពេទ្យដើម្បីសង្គ្រោះ ចំណែករថយន្តទាំងពីរបានធ្លាក់ទៅលើចិញ្ចើមផ្លូវ ដោយរថយន្តបាឡែនត្រូវដាច់កង់មុខម្ខាង ដែលអ្នកបើកបរមានឈ្មោះ កួយ ថាវិ ភេទប្រុស អាយុ៣០ឆ្នាំ រស់នៅក្រុងប៉ោយប៉ែត ខេត្តបន្ទាយមានជ័យ រីឯផ្លែអំពិលទុំដែលរថយន្តតួរីសដឹកពេញ បានធ្លាក់រប៉ាត់រប៉ាយពេញផ្លូវ ដោយអ្នកបើកបរមានឈ្មោះ វ៉ិត ម៉ន ភេទប្រុស អាយុ៣៥ឆ្នាំ រស់នៅភូមិព្រៃដាច់ ឃុំព្រៃដាច់ ស្រុកលើកដែក ខេត្តកណ្តាល ហើយអ្នកបើកបរទាំងពីរនាក់នេះគឺរបួសធ្ងន់ដូចគ្នា។ ក្រោយពីបានធ្វើការវាស់វែងរួចមកសមត្ថកិច្ចបានស្ទូចយករថយន្តទាំងពីរគ្រឿងនេះទៅរក្សាទុករង់ចាំដោះស្រាយនៅអធិការដ្ឋានជាក្រោយ។
គួររំលឹកដែរថា នៅចំណុចផ្លូវកោង ត្រង់ស្ពានកំពង់ព្រះនេះ កន្លងមកគឺធ្លាប់មានគ្រោះថ្នាក់
ចរាចរកើតឡើងជាញឹកញាប់ ដោយសារតែស្ថានភាពផ្លូវ និងកត្តានៃការបើកបរ រហូតធ្វើឲ្យអាជ្ញាធរ និងកម្លាំងកងរាជអាវុធហត្ថស្រុក បានលើកជាស្លាកសញ្ញាដោយក្រើនរំលឹកដល់អ្នកបើកបរថា "បន្ថយល្បឿនចំណុចគ្រោះថ្នាក់" ប៉ុន្តែអ្នកបើកបរទាំងអស់ហាក់បីដូចជាមិនសូវយកចិត្តទុកដាក់លើបញ្ហានេះទាល់តែសោះ ដោយពួកគេនៅតែជាន់គ្មានបន្ថយល្បឿនសោះឡើយ រហូតធ្វើឲ្យមានគ្រោះថ្នាក់ចរាចរកើតឡើងជាញឹកញាប់បែបនេះ ដូច្នេះគួរតែអ្នកបើកបរទាំងអស់ត្រូវតែបង្កើននូវការប្រុងប្រយ័ត្នឲ្យបានខ្ពស់ ទើបអាចរក្សាសុវត្ថិភាពដល់អាយុជីវិតបាន៕
សោ និយមរ័ត្ន
0 Comments