បន្ទាយមានជ័យ ៖ កាលព្រឹកថ្ងៃទី២២ ខែកុម្ភៈ ឆ្នាំ២០១៥នេះ នៅមជ្ឈមណ្ឌលអង្គការកុមារមេគង្គ ស្ថិតនៅភូមិអរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ បានបើកវេទិកាតម្រង់ទិសដល់សិស្ស ចាប់ពីថ្នាក់ទី១២ដល់ថ្នាក់ទី៧ មកពីខេត្តបន្ទាយមានជ័យ ឧត្តរមានជ័យ កំពង់ធំ បាត់ដំបង ប៉ៃលិន ព្រះវិហារ ដែលមានសិស្សចូលរួមចំនួន៨៩០នាក់បានមកស្តាប់ស្ដីពីមជ្ឈមណ្ឌលនេះបានបណ្តុះបណ្តាលវិជ្ជាជីវៈ។ ពិធីនេះមានការចូលរួមលោក អ៊ុង អឿន ប្រធានក្រុមប្រឹក្សាខេត្តបន្ទាយមានជ័យ លោក ម៉ាតាំងឆាលម៉ាំងឌីយោ នាយកជាតិអង្គការកុមារមេគង្គប្រចាំប្រទេសកម្ពុជា និងមន្ត្រីអ្នកមុខអ្នកការជាច្រើននាក់ទៀត។ លោកម៉ាតាំងបានមានប្រសាសន៍ថាគោលដៅរបស់អង្គការកុមារមេគង្គជួយដល់កុមារក្រីក្រកុមារងាយរងគ្រោះ តែកុមារទាំងអស់នោះមានឆន្ទៈខ្ពស់ក្នុងសិក្សារៀនសូត្រដើម្បីឲ្យទទួលបាននូវការអប់រំប្រកបដោយគុណភាព និងតម្លាភាព។ លោកបានបន្តថា នៅប្រទេសកម្ពុជាយើងនេះ អង្គការកុមារមេគង្គមានគម្រោងធំៗចំនួន៦ដូចជា កម្មវិធីអប់រំក្រៅប្រព័ន្ធ កម្មវិធីសាងសង់ និងជួសជុលអាគារសិក្សា កម្មវិធីផ្តល់កន្លែងស្នាក់នៅសម្រាប់សិស្សតាមស្រុកមកពីតំបន់ដាច់ស្រយាល កម្មវិធីចែកម្សៅទឹកដោះគោដល់ទារកមកពីគ្រួសារក្រីក្រ ហើយម្តាយគ្មានទឹកដោះឲ្យបៅ ឬម្តាយមានផ្ទុកមេរោគអេដស៍ កម្មវិធីជីកស្រះសង់ផ្ទះនិងបង្គន់អនាម័យសម្រាប់សិស្សកូនធម៌ក្រក្រី។ លោកបានបន្តថា សម្រាប់វិស័យអប់រំក្នុងឆ្នាំ២០១៥នេះអង្គការកុមារមេគង្គក្នុងខេត្តបន្ទាយមានជ័យយើងនេះបានជួយឧបត្ថម្ភដល់សិស្សមត្តេយ្យ សិស្សបឋម និងសិស្សមធ្យមជាដើម សាលាបណ្តុះបណ្តាលវិជ្ជាជីវៈ គរុនិស្សិត និងនិស្សិត សកលវិទ្យាល័យក្រីក្រសរុបមានចំនួន១.៧៥៧នាក់។ លោក អ៊ុង អឿន បានមានប្រសាសន៍ដែរថា សូមក្មួយៗទាំងអស់ត្រូវខិតខំរៀនសូត្រ និងធ្វើការស្រាវជ្រាវរាល់គ្រប់មុខវិជ្ជាដើម្បីយកចំណេះទៅបង្រៀនសិស្សដទៃទៀតក្នុងការសិក្សាការបង្កើននូវវប្បធម៌នៃការជឿជាក់លើខ្លួនឯង ដើម្បីតម្លាភាពក្នុងការប្រឡង និងការដាក់ពិន្ទុដើម្បីឆ្លើយតបក្នុងការបង្រៀនប្រកបដោយការទទួលខុសត្រូវ។ លោកបានបន្តថា អ្វីដែលគួរឲ្យកត់សម្គាល់នោះគឺ សិស្សថ្នាក់ទី១២ដែលរស់នៅក្នុងមណ្ឌល៤៨នាក់ក្នុងចំណោមសិស្ស៤៥នាក់បានប្រឡងជាប់នៅលើកទី១ និងលើកទី២ សរុបសិស្សប្រឡងជាប់៩៨%នេះគួរឲ្យកត់សម្គាល់ណាស់៕
គង្គា
0 Comments