ភ្នំពេញ ៖ ក្រុមចោរឆក់ម្នាក់ក្នុងចំណោមគ្នា៤នាក់ ត្រូវបានកម្លាំងនគរបាលប៉ុស្តិ៍ស្រះចកឃាត់ខ្លួនបន្ទាប់ពីពួកគេជិះម៉ូត២គ្រឿងតាមឆក់យកកាបូបលុយពីនិស្សិតម្នាក់បានសម្រេច ហើយបើករត់ទៅបុកកន្លែងលក់សាំងដប បណ្ដាលឲ្យដួលប្រកាច់ប្រកិន ត្រូវចាប់បានម្នាក់ភ្លាមៗ និង៣នាក់ទៀតគេចខ្លួនបាត់។
ហេតុការណ៍នោះបានកើតឡើងកាលពីវេលាម៉ោង១៩និង៤០នាទីយ ថ្ងៃទី០២ ខែកុម្ភៈ ឆ្នាំ២០១៥ នៅចំណុចខាងមុខសាលាពេទ្យផ្លូវមុនីវង្ស ក្នុងសង្កាត់ស្រះចក ខណ្ឌដូនពេញ។ មន្ត្រីនគរប៉ុស្តិ៍ស្រះចកបានឲ្យដឹងថា ជនសង្ស័យដែលឃាត់ខ្លួនបានម្នាក់មានឈ្មោះ ថេង ធារ៉ា ភេទប្រុសអាយុ២២ឆ្នាំ មុខរបរជាងដែក ស្នាក់នៅសង្កាត់ទួលសង្កែ ខណ្ឌឫស្ដីកែវ ត្រូវដកហូតម៉ូតូជិះធ្វើសកម្មភាពមួយគ្រឿងម៉ាកស្មាស់ ពណ៌ខ្មៅ ពាក់ស្លាលេខភ្នំពេញ ១CU៦៩៩១ និងបក្ខពួក៣នាក់ទៅមានឈ្មោះ អា ជា អាហេង និងអាគួង ដែលមានអាយុប្រហែល២០ឆ្នាំ។ ចំណែកជនរងគ្រោះឈ្មោះ សុង ចិន្តា ភេទស្រី អាយុ២១ឆ្នាំ មុខរបរនិស្សិត ស្នាក់នៅសង្កាត់ច្បារអំពៅ ខណ្ឌច្បារអំពៅមិនបាត់បង់អ្វីឡើយ ព្រោះតាមយកកាបូបពីជនល្មើសបានមកវិញ។
ប្រភពព័ត៌មានបានបន្តទៀតថា នៅមុនពេលកើតហេតុជនរងគ្រោះបានជិះម៉ូតូម៉ាក ICONចេញពីសាលាជាតិគ្រប់គ្រង ដោយមិត្តប្រុសបើកម៉ូតូមួយគ្រឿងទៀតតាមពីក្រោយក្នុងបំណងត្រឡប់ទៅផ្ទះ លុះពេលបើកមកដល់ចំណុចខាងមុខសាលាពេទ្យ ស្រាប់តែមានជនសង្ស័យចំនួន៤នាក់ជិះម៉ូតូ២គ្រឿងតាមឆក់យកកាបូបស្ពាយរបស់ជនរងគ្រោះដែលទុកនៅចន្លោះម៉ូតូពេលឆក់បានសម្រេច ហើយព្យាយាមបើករត់ ដោយខណៈនោះជនរងគ្រោះនិងមិត្តប្រុសនាំគ្នាបើកម៉ូតូដេញតាមដោយស្រែកថា ចោររហូតដល់ផ្លូវរថភ្លើងម្តុំទួលសង្កែពេលនោះ ជនល្មើសបានបើកម៉ូតូទៅបុកសាំងដបដែលគេដាក់តាំងលក់នៅចិញ្ចើមផ្លូវបណ្ដាលឲ្យដួលប្រកាច់ប្រកិន ត្រូវបានប្រជាពលរដ្ឋជិតខាងចាប់ម្នាក់ភ្លាមៗព្រួតគ្នាវាយស្ទើរស្លាប់សំណាងល្អបាននគរបាលមូលដ្ឋានប៉ុស្តិ៍ស្រះចកទៅដល់ជួយអន្តរាគមន៍ឃាត់ទាន់ពេល។ ចំណែកជនរងគ្រោះក៏យកកាបូបស្ពាយរបស់ខ្លួនបានវិញក្នុងពេលនោះផងដែរដោយមិនបាត់បង់អ្វីឡើយ។
សមត្ថកិច្ចបញ្ជាក់ថា ជនសង្ស័យដែលឃាត់ខ្លួនកំពុងតែកសាងសំណុំរឿងបញ្ជូនទៅតុលាការ។ ចំណែកបក្ខពួកដែលនៅសេសសល់កំពុងស្រាវជ្រាវចាប់ខ្លួនបន្តទៀត៕
រស្មី
0 Comments