ចំរើននិយាយថា តាមរយៈផលិតកម្មLegend Tiger នោះ រូបគេប្រាកដជាមានឈ្មោះបោះសំឡេងនិងមានការគាំទ្រច្រើនជាក់ជាមិនខាន ហើយអ្វីដែលធ្វើឲ្យលោកមានសង្ឃឹមទុកជាមុនដូច្នេះ ដោយសារតែបទចម្រៀងក្នុងអាល់ប៊ុមថ្មីនេះ មានទំនុកច្រៀង និងបទភ្លេងមិនចម្លងពីបរទេសនោះឡើយ។ អតីតតារាចម្រៀង Rock លោក ញឹម ចំរើន និយាយបន្តថា ការឈរជើងច្រៀងនៅផលិតកម្មថ្មីនេះវាជាឱកាសមាសមួយសម្រាប់រូបគេ បន្ទាប់ពីស្ងប់ស្ងាត់ពីសិល្បៈអស់រយៈពេល៣ឆ្នាំកន្លងមកនេះ ហើយសង្ឃឹមថានៅពេលបទចម្រៀងរបស់លោកចេញលក់នៅលើទីផ្សារសិល្បៈនោះនឹងមានការគាំទ្រពីទស្សនិកជនផងដែរ។ នៅផលិតកម្មថ្មីនេះដែរ លោកមានបទចម្រៀងបែបយុវវ័យចេញលក់វ៉ុលដំបូងជាច្រើនបទដូចជាបទ «ភាសាដួងចិត្ត»ជាដើម និងបានចេញជាMVផងដែរ។ តារាចម្រៀងវ័យ២៩ឆ្នាំរូបនេះនិយាយទៀតថា អ្វីដែលជាក្តីរំពឹងថ្មីសម្រាប់លោកនោះដោយសំអាងទៅលើផលិតកម្មថ្មីនេះគឺជាផលិតកម្មមួយមានការច្នៃប្រឌិតខ្ពស់ក្នុងការផលិតបទចម្រៀងដោយមិនចម្លងពីគេ និងក៏ជាផលិតកម្មដែលល្បីខាងផលិតស្យ៉តផងដែរ ដូច្នេះការចូលមកជ្រកនៅLegend Tiger នេះវាជាឱកាសថ្មីមួយសម្រាប់រូបគេដែលត្រូវស្ដារប្រជាប្រិយឡើងវិញ។ ម្ចាស់បទ «មិនប្រកាសសង្គាមទេអូន»រូបនេះនិយាយបន្តទៀតថា រូបគេនៅតែតាំងចិត្តមិនច្រៀងបទចម្រៀងណាដែលចម្លងពីស្នាដៃរបស់គេនោះទេ ហើយដោយសារតែប្រកាន់នូវគោលជំហរ ដូច្នេះហើយទើបរយៈពេល៣ឆ្នាំបន្ទាប់ពីផលិតកម្ម Rock ផ្អាកដំណើរការផលិតបទចម្រៀងដែលជាស្នាដៃកូនខ្មែរនោះបានធ្វើឲ្យរូបគេស្ងប់ស្ងាត់ពីសិល្បៈដែរ។ តារាចម្រៀងដែលជាបេក្ខជនជាប់ចំណាត់ថ្នាក់លេខ៣ក្នុងកម្មវិធីRock star របស់ផលិតកម្ម Rock លោកញឹម ចំរើននិយាយលើកឡើងទៀតថា រូបគេបានចូលមកជ្រកក្នុងទ្រនំផលិតកម្មថ្មី Legend Tiger នេះអស់រយៈពេលមួយឆ្នាំហើយ ហើយនេះក៏ជាអាល់ប៊ុមដំបូងសម្រាប់គេផងដែរ។ តារាចម្រៀងញឹម ចំរើនក៏បានសំណូមពរទៅដល់មិត្តយុវវ័យ និងពុកម៉ែបងប្អូនទាំងអស់ដែលស្រឡាញ់វិស័យសិល្បៈចម្រៀងសូមជួយគាំទ្រផង ហើយសង្ឃឹមថា Legend Tiger នឹងជួយរុញច្រានរូបគេឲ្យបានល្បីជាក់ជាមិនខានតាមរយៈស្នាដៃបទចម្រៀង និងទំនុកភ្លេងថ្មីៗដែលនិពន្ធដោយកូនខ្មែរនោះ៕
ឥន្ទ្រីយ៍ទេព
0 Comments