ភ្នំពេញ ៖ យុវជនម្នាក់ត្រូវបានសមត្ថកិច្ចប៉ូលិសខណ្ឌទួលគោកធ្វើការឃាត់ខ្លួនបានជាក់ស្តែងក្នុងខណៈពេលដែលយុវជនម្នាក់នេះជិះម៉ូតូម៉ាកស៊ីរូស ពណ៌ខ្មៅ១គ្រឿង ធ្វើសកម្មភាពឆក់ទូរស័ព្ទដៃពីនារីជាសិស្សម្នាក់បានសម្រេចនៅពេលកំពុងជិះម៉ូតូតាមដងផ្លូវ ហើយនៅពេលនារីរងគ្រោះស្រែកចោរៗ ទើបត្រូវប៉ូលិសជួយអន្តរាគមន៍ចាប់ខ្លួនបានតែម្តង។
ហេតុការណ៍នេះបានកើងឡើងកាលវេលាម៉ោង១៧និង១០នាទីល្ងាច ថ្ងៃទី២៣ ខែកុម្ភៈ ឆ្នាំ២០១៥ ស្ថិតតាមបណ្តោយផ្លូវ២៨៧ កែងផ្លូវ៥៦៦ ក្នុងសង្កាត់បឹងកក់២ ខណ្ឌទួលគោក។ ជនសង្ស័យម្នាក់នេះត្រូវបានសមត្ថកិច្ចប៉ូលិសប្រាប់អោយស្គាល់ឈ្មោះ រិទ្ធ ប៊ុនមិនា ភេទប្រុស អាយុ ២១ឆ្នាំ មុខរបរមិនពិតប្រាកដ ស្នាក់នៅផ្ទះលេខ១០ ផ្លូវ៥៧៨ សង្កាត់បឹងកក់ទី២ ខណ្ឌទួលគោក។ ចំណែកជនរងគ្រោះត្រូវបានគេស្គាល់ឈ្មោះ សេង សុហ្វីយ៉ា ភេទស្រី អាយុ១៨ឆ្នាំ មុខរបរសិស្ស ស្នាក់នៅសង្កាត់បឹងកក់ទី២ ខណ្ឌទួលគោក។ ក្នុងការឃាត់ខ្លួនជនសង្ស័យម្នាក់នេះប៉ូលិសដកហូតវត្ថុតាងមួយចំនួន ក្នុងនោះរួមមាន ទូរស័ព្ទ អាយហ្វូន៥មួយគ្រឿងជារបស់ជនរងគ្រោះ បានប្រគល់ជូនជនរងគ្រោះវិញ ម៉ូតូម៉ាក yamaha siruisពណ៌ក្រហម ពាក់ស្លាកលេខ ភ្នំពេញ 1BN 0212 មួយគ្រឿង ជារបស់ជនល្មើសជិះធ្វើសកម្មភាព។
មន្ត្រីប៉ូលិសផ្នែកព្រហ្មទណ្ឌខណ្ឌទួលគោកបានឲ្យដឹងថា នៅមុនពេលកើតហេតុជនរងគ្រោះបានជិះម៉ូតូមួយគ្រឿងម៉ាកស្កុបពីពណ៌ស ស៊េរី២០១៥ គ្មានស្លាកលេខ ចេញពីសាលារៀនក្នុងគោលបំណងត្រឡប់ទៅផ្ទះវិញ។ លុះជិះម៉ូតូមកដល់ចំណុចកើតហេតុក៏បានលើកទូរស័ព្ទនិយាយបណ្ដើរជិះម៉ូតូបណ្ដើរ ហើយស្របពេលនោះក៏ស្រាប់តែមានជនសង្ស័យ២នាក់ជិះម៉ូតូមកអែបក្បែររួចធ្វើសកម្មភាពឆក់យកទូរស័ព្ទដៃពីជនរងគ្រោះបានសម្រេចតែម្តង។ តែក្នុងករណីនោះត្រូវបានជនរងគ្រោះស្រែកចោរៗទើបត្រូវប៉ូលិសដែលល្បាតក្បែរនោះជួយអន្តរាគមន៍ចាប់ខ្លួនបានតែម្តង។
បច្ចុប្បន្នជនសង្ស័យរូបនេះ ត្រូវបានឃុំខ្លួនជាបណ្ដោះអាសន្ននៅអធិការដ្ឋាននគរបាលខណ្ឌទួលគោក ដើម្បីកសាងសំណុំរឿងបញ្ជូនទៅកាន់តុលាការចាត់ការតាមផ្លូវច្បាប់៕
ស្រីរ័ត្ន
0 Comments