ភ្នំពេញ ៖ អ្នកប្រដាល់ រឿង សោភ័ណ្ឌ ក្លិបម្កុដរាជសីហ៍ប្រើពេលតែ២ទឹកប៉ុណ្ណោះ ផ្ដួលអ្នកប្រដាល់ ថៃ Thanawut Paosupab ឲ្យបោះបង់ការប្រកួតលើសង្វៀនTV3 ល្ងាចថ្ងៃទី២២ ខែកុម្ភៈ ឆ្នាំ២០១៥។ Thanawut Paosupab បោះបង់ការប្រកួតនេះ ដោយសាររបូតសន្លាក់ស្មាស្ដាំប្រកួតបន្ទាប់ពីរឿង សោភ័ណ្ឌទាត់មួយជើងត្រូវយ៉ាងដំណំនោះ។
អ្នកប្រដាល់ថៃរូបនេះ ចាញ់ប្រៀប សោភ័ណ្ឌតាំងពីទឹកទី១ម្ល៉េះ ហើយមកដល់ទឹកទី២ សោភ័ណ្ឌទាត់ចេញច្រើនធ្វើឲ្យអ្នកប្រដាល់ថៃរូបនេះលើកដៃរង បណ្ដាលឲ្យរបូតស្មានៅពាក់កណ្ដាលទឹកទី២ប្រកួតលែងកើតតែម្ដង។
ពុទ្ធ ហ៊ុចក្លិបពុទ្ធ សេរីវង្ស បានប្រើជង្គង់យកឈ្នះអ្នកប្រដាល់ជនជាតិអ៊ីតាលីឈ្មោះ Davin Parenti ឲ្យចុះចាញ់នៅទឹកទី៤។ អ្នកប្រដាល់ជនជាតិអ៊ីតាលីរូបនេះមានកណ្ដាប់ដៃល្អវាយចេញធ្ងន់ និងចំគោលដៅពេញៗទៀតផង។ បើក្រៅពី ពុទ្ធ ហ៊ុចប្រហែលជាត្រូវដេកដោយសារកណ្ដាប់ដៃរបស់អ្នកប្រដាល់អ៊ីតាលីនេះបាត់ទៅហើយ តែពុទ្ធ ហ៊ុចដែលមានមុខរឹងនោះ គេមិនត្រឹមតែមិនវង្វេងប៉ុណ្ណោះទេ តែគេទាត់សងវិញយ៉ាងចាស់ដៃ។
នៅទឹកទី៤ ពុទ្ធ ហ៊ុច បញ្ចេញជង្គង់បានយ៉ាងល្អអុកចំពោះ និងចុងដង្ហើម Davin ធ្វើឲ្យអ្នកប្រដាល់អ៊ីតាលីរូបនេះបង្ខំចិត្តចុះចាញ់តែម្ដងទៅ។ ចំពោះការប្រកួតមិត្តរួមជាតិវិញ កន ចន្ថា អ្នកប្រដាល់ក្លិបក្រសួងការពារជាតិ ប្រកួត ចាញ់ លួន សុខខេង អ្នកប្រដាល់ក្លិបអាស៊ីកីឡាដោយពិន្ទុ។ ពីរនាក់នេះ វាយស៊ីសងគ្នាពេញប្រាំទឹកតែម្តង ទម្រាំដឹងឈ្នះចាញ់នេះ។
កន ចន្ថា ដែលមានកណ្ដាប់ដៃលឿន រហ័ស បានសន្ធាប់ទៅទៅលើ លួន សុខខេង ប៉ុន្តែមិនបានធ្វើឲ្យ សុខខេងខ្លាចញញើតឡើយ ផ្ទុយទៅវិញ សុខខេងដែលមានការប៉ិនប្រសប់ខាងកណ្ដាប់ដៃនេះដែរ បានវាយសងវិញធ្វើឲ្យ ចន្ថាលែងសូវហ៊ានរំលោភផ្ដេសផ្ដាសទៀត។
លួន សុខខេង គេបានវាយទៅលើ កន ចន្ថា ចំគោលដៅច្រើនជាង ទើបចប់ការប្រកួតគេឈ្នះពិន្ទុនោះ។ ឈាន រស្មី អ្នកប្រដាល់ក្លិបរាជសីហ៍បង្ក្រាបគ្រឿងញៀនខេត្តរតគិរីប្រកួតចាញ់សល់ ប៊ុនអ៊ីម អ្នកប្រដាល់ក្លិបកុសលកីឡា។ ពីរនាក់នេះ ក៏ប្រកួតគ្នាយ៉ាងតឹងតែងដែរ ទម្រាំដឹងឈ្នះចាញ់នេះ។ សល់ ប៊ុនអ៊ីម គេប្រើកណ្ដាប់ដៃវាយទៅលើឈាន រស្មី ហើយរស្មីបានប្រើជើងទាត់ លាយកណ្ដាប់ដៃវាយសងលើប៊ុនអ៊ីមវិញ តែដោយសារកណ្ដាប់ដៃ ប៊ុនអ៊ីមខ្លាំងជាង និងវាយចំចំណុចសំខាន់ច្រើនជាងនោះ ធ្វើឲ្យគេមានប្រៀបឈ្នះលើរស្មី។
ចំណែក ឡុង សុភ័ស្ស អ្នកប្រដាល់ក្លិបសាលវ័ន្តកីឡា បានវាយឈ្នះ អ៊ុង កុសលអ្នកប្រដាល់ក្លិបតាព្រហ្មមានជ័យដោយពិន្ទុ បន្ទាប់ពីប្រកួតគ្នាប្រាំទឹកពេញនោះ៕
វិសិទ្ធ
0 Comments