ភ្នំពេញ ៖ វង្ស ណយ អ្នកប្រដាល់ជើងខ្លាំងនៃសមាគមប្រដាល់ក្រសួងការពារជាតិ លើកនេះវាយឈ្នះអ្នកប្រដាល់ថៃSingha Thorn Ngoy ត្រឹមតែពិន្ទុប៉ុណ្ណោះ តែឡៅ ស៊ីណាត អ្នកប្រដាល់ក្លិបកងពលតូចទ័ពឆ័ត្រយោង៩១១ បានផ្ដួលអ្នកប្រដាល់ថៃPirabkao ក្នុងទឹកទី៣ក្នុងកម្មវិធីប្រដាល់លក្ខណៈមិត្តភាពអន្តរជាតិខ្មែរ-ថៃខារ៉ាបាវ នៅលើសង្វៀនស្ទឹងមានជ័យ នាយប់ថ្ងៃអាទិត្យ ទី២២ ខែកុម្ភៈ។ Singha Thorn Ngoy អ្នកប្រដាល់ថៃនេះ គេមិនអន់នោះទេ ដោយបានវាយ វង្សណយ ឲ្យបែកឈាមចិញ្ចើមខាងឆ្វេង និងរាប់៨ម្តងក្នុងទឹកទី៣ ដោយសារកែងរបស់គេនោះ។ តែយ៉ាងណា វង្ស ណយ គេក៏បានសងកែងទៅវិញក្នុងទឹកទី៣ដដែលនេះដែរ ធ្វើឲ្យអ្នកប្រដាល់ថៃ Singha Thorn Ngoy បែកឈាមចិញ្ចើមខាងឆ្វេងធំគួរសមដែរ។
ដំបូងនឹកស្មានថា វង្ស ណយ សន្លប់ក្នុងទឹក៣នេះហើយ ក្រោយពីSingha Thorn Ngoy វាយកែងឆ្វេងត្រូវសៀតផ្កា ហើយដួលដេកលើរេញនោះ ប៉ុន្តែក្រោយអាជ្ញាកណ្ដាលរាប់ដល់៨ គេក៏ងើបបន្តការប្រកួតបានទៀត។ វង្ស ណយ បានយកប្រៀបឈ្នះលើថៃវិញក្នុងការប្រកួតទឹកទី៤ និងទឹកទី៥ ខណៈដែល Singha Thorn Ngoy គេរាងស្រុតធ្លាក់ចុះកម្លាំង ហើយដកថយគេចពីការវាយប្រហាររបស់ វង្ស ណយនោះ។ ទោះបីត្រូវរាប់ម្តងក៏ដោយ ក៏ វង្សណយនៅតែឈ្នះ Singha Thorn Ngoy ដោយពិន្ទុក្រោយបញ្ចប់ការប្រកួតប្រាំទឹកនោះ។
ចំណែក ឡៅស៊ីណាត អ្នកប្រដាល់ជើងខ្លាំងកម្ពុជាក្លិបកងទ័ពឆ័ត្រយោង៩១១ បានប្រើពេលតែបីទឹកប៉ុណ្ណោះ ផ្ដួលអ្នកប្រដាល់ថៃឈ្មោះ Pirabkao ឲ្យបោះបង់ការប្រកួតក្នុងទឹកទី៣។ Pirabkao ដែលចាញ់កម្ពស់ ស៊ីណាតនោះ ពីរទឹកដំបូងគេវាយទំនងជាខ្លាំងដោយមិនខ្លាចកែង និងជង្គង់របស់ស៊ីណាតឡើយ ហើយថែមទាំងបញ្ចេញកណ្ដាប់ដៃដាល់មុខ ស៊ីណាត ត្រូវច្រើនដៃថែមទៀត។ តែក្រោយចូលដល់ទឹកទី៣ ពេលដែល ស៊ីណាតសម្រុកវាយវិញនោះ គេហាក់ដូចជាបាត់ម្ចាស់ការ បណ្តោយឲ្យ ស៊ីណាតដាល់ត្រូវមុខ និងចាប់អុកជង្គង់ជាច្រើនជង្គង់ បណ្ដាលឲ្យដួលលែងក្រោកតែម្តង។ សង្វៀនរោងសៀក អ៊ុង ស៊ីណា អ្នកប្រដាល់ក្លិបសុភានូមានជ័យ បានប្រកួតឈ្នះ យ៉ាមឡយអ្នកប្រដាល់ក្លិបរស្មីកុមារកំព្រាដោយពិន្ទុ ក្នុងការជួបគ្នាលើសង្វៀនរោងសៀកទល់មុខរដ្ឋសភា កាលពីល្ងាចថ្ងៃអាទិត្យ ទី២២ ខែកុម្ភៈនេះដែរ។
ពីរនាក់នេះ ប្រកួតគ្នាក្នុងលក្ខណៈតឹងតែងបំផុត ដោយសារតែ ស៊ីណា ទាបជាង យ៉ាម ឡយ ពិបាកចូលជិត។ តែយ៉ាងណា ស៊ីណា នៅតែព្យាយាមចូលវាយ យ៉ាម ឡយមុនជានិច្ច មិនទុកឱកាសឲ្យ យ៉ាម ឡយ វាយមុននោះទេ។ ដោយសារតែបែបនេះ បានធ្វើឲ្យ ស៊ីណា មានប្រៀបឈ្នះលើ យ៉ាមឡយសឹងតែគ្រប់ទឹក។ ចប់ការប្រកួតប្រាំទឹកពេញនោះ អ៊ុង ស៊ីណា គេបានទទួលជ័យជំនះដោយពិន្ទុលើយ៉ាមឡយ។
ប្រាក់ ស៊ីណាត អ្នកប្រដាល់ក្លិបតាឯកដំបងដែកមានរិទ្ធ បានផ្ដួល ឈុន បញ្ញា អ្នកប្រដាល់ក្លិបរ៉ាហាប់ស្វាយប៉ាក ឲ្យសន្លប់ក្នុងទឹកទី៣។ ឈុន បញ្ញា ត្រូវ ស៊ីណាតចាប់អុកនឹងជង្គង់ចូលពោះទឹកបណ្ដាលឲ្យដួលសន្លប់លែងក្រោក ធ្វើឲ្យ ស៊ីណាត ឈ្នះក្នុងទឹកទី៣។
អ្នកប្រដាល់ជើងខ្លាំង ឡុង សុវណ្ណឌឿន បានវាយចាញ់អ្នកប្រដាល់ស្រករក្រោយ សូយ យក្សតឿ ក្លិបពោធិជ័យកីឡាដោយពិន្ទុ ក្រោយពីប្រកួតគ្នាប្រាំទឹកពេញនោះ។ ជាលើកទី១ហើយ ដែលឡុង សុវណ្ណឌឿន វាយចាញ់អ្នកប្រដាល់ស្រករក្រោយបែបនេះ។ ពីដំបូង គេបាននឹកស្មានថា សូយ យក្សតឿ មិនអាចទប់ជាមួយ ឡុង សុវណ្ណឌឿន បាននោះទេ តែផ្ទុយទៅវិញ សុវណ្ណឌឿន ចាញ់យក្សតឿទៅវិញ។ សូយ យក្សតឿ គេសម្រុកវាយទៅលើ សុវណ្ណឌឿន មិនដកដៃឡើយ ដែលធ្វើឲ្យសុវណ្ណឌឿន មានឪកាសតិចតួចបំផុតក្នុងការវាយតបតទៅលើសូយ យក្សតឿនោះ។ ដោយសារតែយ៉ាងនេះហើយទើបចប់ការប្រកួត៥ទឹក យក្សតឿ ឈ្នះ សុវណ្ណះឌឿនដោយពិន្ទុ។
ងួន គា អ្នកប្រដាល់ក្លិបតាឡីដំរីមានរិទ្ធ ដែលឡើងសងសឹក ជុន សាវុធ អ្នកប្រដាល់ក្លិបពោធិជ័យកីឡានោះ គេធ្វើមិនបានសម្រេចនោះឡើយ។ ក្រោយបញ្ចប់ការប្រកួតប្រាំទឹក ងួន គាចាញ់សាវុធដោយពិន្ទុដូចពីលើកមុនដែរ។ សង្វៀនបាយ័នបឹងស្នោ ឯម លីថូ អ្នកប្រដាល់ក្លិបឫទ្ធីពោធិសែនជ័យដែលជើងខ្លាំងជើងចាស់ ដែលត្រូវគេផ្គូផ្គងឲ្យជួបប្រកួតជាមួយ រឿម វណ្ណះ អ្នកប្រដាល់សមាគមកីឡាប្រដាល់ក្រសួងការពារជាតិនោះ បានវាយចាញ់លីថូដោយពិន្ទុ។
ពីរនាក់នេះ បានជួបគ្នាលើសង្វៀនបាយ័នបឹងស្នោ នាល្ងាចថ្ងៃអាទិត្យ ទី២២ ខែកុម្ភៈ។ ក្នុងការប្រកួតទឹកទី៣ ពួកគេទាំងពីរបានវាយប្ដូរកណ្ដាប់ដៃ និងកែងគ្នាទៅវិញទៅមកដែលធ្វើឲ្យ លីថូ ត្រូវអាជ្ញាកណ្ដាលរាប់៨ ដោយសារត្រូវកែងបករបស់ រឿម វណ្ណះ ដួលលើរេញនោះ។
តែការវាយកែងបករបស់ វណ្ណះនេះ គឺខុសទៅនឹងកតិកាប្រកួត ដែលនៅពេលអាជ្ញាកណ្ដាលស្រែកឲ្យឈប់ហើយ ប៉ុន្តែ រឿម វណ្ណះនៅតែវាយទៅលើលីថូនោះ។ អាជ្ញាកណ្ដាលក៏បានពិន័យវណ្ណះ ដោយឲ្យចៅក្រមទាំង៥រូបដកពិន្ទុ វណ្ណះ។
រឿម វណ្ណះ គេវាយទៅលើលីថូ មានលក្ខណៈកាចយកតែមែនទែនតែម្តង តែភាគច្រើនវាយតែខ្យល់ប៉ុណ្ណោះ ខុសពីលីថូគេវាយចេញតិចមែន ប៉ុន្តែគេវាយត្រូវចំគោលដៅល្អ បានច្រើនជាងវណ្ណះ ម្ល៉ោះហើយទើបចប់ការប្រកួត ឯម លីថូ ឈ្នះ រឿម វណ្ណះដោយពិន្ទុ។ សរ សី អ្នកប្រដាល់សមាគមកីឡាប្រដាល់ក្រសួងការពារជាតិ ដែលប្រកួតជាមួយ ម៉ូ រដ្ឋា អ្នកប្រដាល់ក្លិបព្រៃទទឹងខេត្តបាត់ដំបងនោះ គឺបានត្រឹមស្មើពិន្ទុគ្នាតែប៉ុណ្ណោះ។
ពួកគេពីរនាក់នេះ វាយច្រាសគ្នាទៅវិញទៅមកប្រាំទឹកពេញតែម្តង ដែលចប់ការប្រកួតគ្មានអ្នកឈ្នះ គ្មានអ្នកចាញ់ គឺស្មើគ្នា។ តាមពិតអ្នកប្រដាល់ សរ សី គេវាយចេញបានច្រើនជាង ម៉ូ រដ្ឋា តែរាល់ការវាយចេញរបស់គេមិនសូវចំគោលដៅល្អ ទើបបានត្រឹមស្មើយ៉ាងនេះ ហើយណាមួយអ្នកប្រដាល់ ម៉ូ រដ្ឋា លើកនេះគេប្រកួតល្អផងដែរ។
គិន សំបូរ អ្នកប្រដាល់ក្លិបភារម្យគុនខ្មែរបានប្រើពេលតែពីទឹកប៉ុណ្ណោះក្នុងការផ្ដួលយកឈ្នះសល់ អាវិន អ្នកប្រដាល់ក្លិបកុសលកីឡា។ នេះជាលើកទី២របស់ គិន សំបូរ ដែលវិលមកសង្វៀនវិញ ហើយផ្ដួលយកឈ្នះលើដៃគូក្នុងទឹកទី២នោះ។ កាលពីលើកទី១ គេបានផ្ដួល ផល សីហា ក្លិបសុភានូមានជ័យក្នុងទឹកទី២ដែរ។
ចំណែក កីឡាការិនី បូរី ស្រីភ័ណ្ឌ ក្លិបបុរីគុនខ្មែរ ប្រកួតឈ្នះកីឡាការិនី វី ស្រីឆាយ ក្លិបនាគមានជ័យដោយពិន្ទុ បន្ទាប់ពីតស៊ូគ្នាប្រាំទឹកពេញនោះ៕
វិសិទ្ធ
0 Comments