ភ្នំពេញ ៖ K.Cement ជុំទី២ សូត្រ ប៊ុនធី-លាស់ យីន-មាស ច័ន្ទមាន និងឱម សំរេចឈ្នះការប្រកួតជម្រុះក្នុងព្រឹត្តិការណ៍ប្រដាល់ដណ្ដើមខ្សែK.Cement សម្រាប់ជុំទី២នៅលើសង្វៀន SEA-TV នាល្ងាចថ្ងៃទី២១ ខែកុម្ភៈ ឆ្នាំ២០១៥ អ្នកប្រដាល់ សូត្រ ប៊ុនធី-លាស់ យីន-មាស ច័ន្ទមាន និង ឱម សំរេចសុទ្ធតែឈ្នះក្នុងការប្រកួតនេះ។
សូត្រ ប៊ុនធី អ្នកប្រដាល់ក្លិបបក្សីស្លាបដែក ដែលការប្រកួតដំបូងរបស់គេឈ្នះ លាស់ យីន ក្លិបសម្រែករាជសីហ៍បង្ក្រាបគ្រឿងញៀននោះ មកដល់ជុំទី២នេះ បានប្រកួតឈ្នះ ឃីម បូរ៉ា អ្នកប្រដាល់ក្លិបរស្មីភូមិគាបខេត្តបន្ទាយមានជ័យទៀត។ នេះជាលើកទី១ហើយ ដែល ប៊ុនធី ឈ្នះ បូរ៉ានៅក្នុងប្រវត្តិជួបគ្នាចំនួន៣លើកកន្លងមកនេះ។ ជ័យជំនះនេះធ្វើឲ្យ២ប្រកួតរបស់ ប៊ុនធី ឈ្នះទាំង២ ប្រកួត ក្នុងខណៈដែល២ប្រកួតរបស់ បូរ៉ា ឈ្នះ១ប្រកួត ចាញ់១មួយប្រកួតនោះ។
លាស់ យីន អ្នកប្រដាល់ក្លិបសម្រែករាជសីហ៍បង្ក្រាបគ្រឿងញៀន ប្រកួតឈ្នះ ជ័យ ប៊ុនសង់ អ្នកប្រដាល់ក្លិបគីសែនមានរិទ្ធិដោយពិន្ទុទាំងប្រផិតប្រផើយ បន្ទាប់ពីប្រកួតគ្នា៥ទឹកពេញនោះ។
ពីរប្រកួតរបស់ លាស់ យីន ឈ្នះបាន១ប្រកួត និង ចាញ់១ប្រកួត ខណៈដែល២ប្រកួតរបស់ជ័យ ប៊ុនសង់ ចាញ់ទាំង២ប្រកួតនោះ។
មាស ច័ន្ទមាន អ្នកប្រដាល់សមាគមប្រដាល់ក្រសួងការពារជាតិផ្ដួលអ្នកប្រដាល់ ណាម ម៉ូរ៉ាក់ ក្លិបពន្លឺសាមគ្គីខេត្តបាត់ដំបងនៅទឹកទី២។ ពីរប្រកួតរបស់ច័ន្ទមាន ឈ្នះទាំង២ប្រកួត និងផ្ដួលគូប្រកួតនៅត្រឹមទឹកទី២ដូចគ្នា។ ចំពោះ២ប្រកួតរបស់ ណាម ម៉ូរ៉ាក់ គឺសន្លប់នៅទឹកទី២ ទាំង២ប្រកួត ។ មួយប្រកួតទៀត ឱម សំរេច អ្នកប្រដាល់ក្លិបទ័ពឆ័ត្រយោង៩១១ បានផ្ដួល ថុល មករា អ្នកប្រដាល់ក្លិបឃ្លាំងមឿងកីឡាឲ្យបោះបង់ចោលការប្រកួតនៅទឹកទី៣ ដោយទាត់មករាឲ្យខូចជើងបន្តការប្រកួតទៀតលែងកើត។ ពីរប្រកួតរបស់ ឪម សំរេចឈ្នះទាំង២ប្រកួត ខណៈដែលពីរប្រកួតរបស់ថុល មករា ចាញ់មុនទឹកទី៥ ទាំង២ប្រកួតនោះ។
ម៉ាត់ ឆ្វេងឈ្នះ គឿម សុវណ្ណឌឿត ឯ សុខ រិទ្ធ ឈ្នះសៀវ សំណាងអ្នកប្រដាល់ម៉ាត់ ឆ្វេង ក្លិបក្រសួងការពារជាតិបានប្រើពេល៥ទឹក ក្នុងការយកឈ្នះ គឿម សុវណ្ណឌឿតក្លិបមោងឫស្សីមរតកគុនខ្មែរលើសង្វៀន SEA-TV នាព្រឹកថ្ងៃទី២២ ខែកុម្ភៈ ឆ្នាំ២០១៥។
ក្នុងការប្រកួត៥ទឹក ពួកគេទាំង២ វាយប្រហារគ្នាទៅវិញទៅមកដោយគ្មានញញើត។ ការវាយចេញរបស់ ម៉ាត់ ឆ្វេង ចំគោលដៅច្រើនជាង តែការវាយចេញរបស់ សុវណ្ណ ឌឿត ក៏មិនអន់ដែរ តែគេហាក់ដូចជាឆេវឆាវបន្តិច។ អ្នកប្រដាល់ទាំង២រូបនេះតែងតែបំពានលើគ្នាដោយវាយបន្ថែមគ្នាក្រោយពេលអាជ្ញាកណ្ដាលឃាត់ជាញឹកញាប់។
ពួកគេប្រកួតគ្នា៥ទឹកពេញតែម៉ាត ឆ្វេងបានទទួលជ័យជំនះលើ គឿម សុវណ្ណឌឿតដោយពិន្ទុទាំងប្រផិតប្រផើយ។ សុខ រិទ្ធ ក្លឹបគីរីដងរែកខេត្តបន្ទាយមានជ័យប្រកួតឈ្នះ សៀវ សំណាងក្លិបអប្សរាគុនខ្មែរដោយពិន្ទុទាំងប្រផិតប្រផើយដែរ។ ៣ទឹកដំបូង សុខ រិទ្ធហាក់ដូចជាវាយសង្គ្រុបលើសៀវ សំណាងរហូត ហើយការវ៉ៃចេញរបស់គេមានប្រសិទ្ធភាពគ្រាន់បើ ឯការវាយចេញរបស់សំណាងក៏ចំគោលដៅបានច្រើនដែរ។ នៅទឹកទី៤ និងទឹកទី៥ សុខ រិទ្ធហាក់ដូចជាដូចជាដកថយ និងការពារច្រើនជាង។ ២ទឹកចុងក្រោយនេះទោះបីសំណាងព្យាយាមយ៉ាងណាក៏ចុងក្រោយគេនៅតែចាញ់ពិន្ទុ សុខ រិទ្ធដដែល។
ចុះពីសង្វៀន សំណាងបានទៅជួបមន្ត្រីផ្គូផ្គងសុំវាយសងសឹកនៅថ្ងៃណាមួយវិញ ហើយមន្ត្រីខាងផ្គូផ្គងបានសន្យាភ្លាមៗថា គេនឹងរៀបចំឲ្យសងសឹក។ សំណាងមិនអស់ចិត្តចំពោះការបរាជ័យទាំងប្រផិតប្រផើយនេះឡើយ។
ឡេះ តើកក្លិបពុទ្ធសេរីវង្ស បានបញ្ចប់ រ៉ាក់ វិឆ័យក្លិបកងពលតូចលេខ៧០មុនស្នូរជួងបញ្ចប់ទឹកទី៥ ដោយវាយមួយកែងឲ្យ វិឆ័យ មានរបួសលើចិញ្ចើមឆ្វេងយ៉ាងធំ ហើយត្រូវគ្រូពេទ្យបញ្ឈប់។
គួរបញ្ជាក់ថា នៅទឹកទី៣ វិឆ័យត្រូវអាជ្ញាកណ្ដាលរាប់៨ម្ដង បន្ទាប់ពីត្រូវ ឡេះ តើកទាត់មួយជើងចំកញ្ចឹង.កនោះ។ យ៉ន វិចិត្រក្លិបទ័ពឆ័ត្រយោង៩១១ ប្រើពេលតែ២ទឹកប៉ុណ្ណោះ ធ្វើឲ្យ ឡូញ វ៉ាន់ឌីក្លិបពន្លឺវិបុលរិទ្ធីខុចជើងឆ្វេង មិនអាចបន្តការប្រកួតបានទៀតនោះ។
ដោយឡែកអ្នកប្រដាល់ ផល ប្រុសខួចក្លិបគីរីវង់សុខសែនជ័យប្រកួតចាញ់ពិន្ទុ ម៉ន ខួចក្លិបការិយាល័យទី៥កងទ័ពជើងគោក។ ចំពោះការប្រកួតជាលក្ខណៈមិត្តភាពអន្តរជាតិ នាល្ងាចថ្ងៃទី២២ខែកុម្ភៈលើសង្វៀនSEA-TVដដែលនេះ អ្នកប្រដាល់ សែន រ៉ាដេតក្លិបអប្សរាគុនខ្មែរបានប្រើកែងផ្ដួលអ្នកប្រដាល់ថៃ Phit Phong Thang ឲ្យសន្លប់នៅទឹកទី៣។
ស្ថានភាពនៃការប្រកួត២ទឹកដំបូង ទោះបី រ៉ាដេតមានប្រៀបជាងក៏ពិតមែន តែគេក៏ទទួលរងនូវការវាយសងពីPhit Phong Thang យ៉ាងចាស់ដៃដែរ។ នៅដើមទឹកទី៣ រ៉ាដេតបែកក្រោមភ្នែកឆ្វេងដោយសារកែងរបស់Phit Phong Thang។ មួយកែងនេះធ្វើឲ្យរ៉ាដេតមានកំហឹងក៏វាយកែងសងវិញធ្វើឲ្យ Phit Phong Thang សន្លប់ក្រោកលែងរួចតែម្ដង។
ផល សោភ័ណ្ឌ អ្នកប្រដាល់ជើងខ្លាំងក្លិបតាឡីដំរីមានរិទ្ធ ឡើងប្រកួតលើកនេះគេជួបសំណាងមិនល្អ ដោយចាញ់ថៃក្នុងទឹកទី១ទាំងមិនអស់ចិត្ត។ ក្នុងការប្រកួតទឹកទី១ ដែលមិនទាន់ដឹងថាអ្នកណាមានប្រៀបជាងនរណានោះ ផល សោភ័ណ្ឌ បានវាយអ្នកប្រដាល់ថៃThy Det ឲ្យដួលអុកគូទលើរេញ ហើយគេក៏ជ្រុលជើងទាត់មួយជើងទៀតចំមុខThy Det ធ្វើឲ្យអ្នកប្រដាល់ថៃរូបនេះសន្លប់ ។ ទោះបីជាការទាត់របស់ សោភ័ណ្ឌនោះ មិនត្រូវចំខ្លាំងប៉ុន្មានក្តី ក៏Thy Det មិនក្រោកបន្តការប្រកួតទៀតដែរ គឺសុខចិត្តដេកដើម្បីស៊ីឡាកយកសោភ័ណ្ឌ ដែលប្រកួតខុសកតិកាប្រកួត។ ទីបំផុត Thy Det ត្រូវបានគេប្រកាសអោយឈ្នះសោភ័ណ្ឌក្នុងទឹកទី១នេះ។
អ្នកប្រដាល់សុខ ធី ក្លិបគីរីដងរែកខេត្តបន្ទាយមានជ័យ ដែលទើបឡើងមកប្រកួតជាលើកដំបូងនៅភ្នំពេញនេះ បានវាយឈ្នះជើងខ្លាំងហ៊ឹម សេរី អ្នកប្រដាល់ក្លិបតាព្រហ្មមានជ័យដោយពិន្ទុ ។ ចំណែក ឃិត ទូច អ្នកប្រដាល់មជ្ឈមណ្ឌលកីឡាខ.ភ.ម ប្រកួតឈ្នះថៃ សាក់សារៈ អ្នកប្រដាល់ក្លិបកងទ័ពជើងទឹកដោយពិន្ទុដែរ។
ឆាយ មាស អ្នកប្រដាល់ក្លិបសំរោងកោងខេត្តបាត់ដំបង ដែលឡើងប្រកួតសង សឹកឆាំ រ៉ែម អ្នកប្រដាល់ក្លិបព្រះខ័នរាជលើសង្វៀនSEA-TVយប់ថ្ងៃទី២២ ខែកុម្ភៈនេះដែរ បានបន្តចាញ់ដោយពិន្ទុម្តងទៀត។
ចំណែក វ៉ាន់ ចាន់វ៉េត អ្នកប្រដាល់ជើងចាស់ក្លិបគីសែមានរិទ្ធ បានវាយឈ្នះ ឯក កៃឈៀង អ្នកប្រដាល់ស្រករក្រោយក្លិបម្កុដរាជសីហ៍ដោយពិន្ទុប្រផិតប្រផើយ។ ក្នុងទឹកទី៣ ចាន់វ៉េត ត្រូវកៃឈៀង វាយបែកឈាមដោយសារកែងរបស់គេ។
ឡុង សំណាង ក្លឹបសាលវ័ន្តកីឡា បានប្រកួតចាញ់ពិន្ទុ ម៉ន ចាន់ដារ៉ា ក្លិបការិយាល័យទី៥ កងទ័ពជើងគោក ខណៈដែល ហឿន សុខលី ក្លិបតាព្រហ្មមានជ័យឈ្នះ គួន សុវណ្ណក្លិបសុភានូមានជ័យដោយពិន្ទុ៕
វិសិទ្ធ
0 Comments