កំពង់ឆ្នាំង ៖ យុវជនម្នាក់បានរងរបួសធ្ងន់បាក់ថ្គាម ដោយស្រវឹងមកពីស៊ីការជិះម៉ូតូទៅបុកបង្កាន់ដៃស្ពាន ករណីនេះបានកើតឡើងនៅវេលាម៉ោង១និង៣០នាទីរសៀល ថ្ងៃទី០២ ខែកុម្ភៈ ឆ្នាំ២០១៥ លើផ្លូវលំគ្រួសក្រហម ស្ថិតនៅក្នុងភូមិប្រស្និប ឃុំប្រស្និប ស្រុករលាប្អៀរ។
សមត្ថកិច្ចនគរបាលមូលដ្ឋានបាននិយាយឲ្យដឹងថា ជនរងគ្រោះរូបនោះមានឈ្មោះ ប៉ូយ សឿន អាយុ២២ឆ្នាំ មានទីលំនៅក្នុងភូមិកើតហេតុខាងលើ។ មុនពេលកើតហេតុជនរងគ្រោះរូបនេះបានជិះម៉ូតូម៉ាកស្មាស់ ពណ៌ខ្មៅ អត់ស្លាកលេខ ទៅហូបការគេជាមួយបងប្រុសនៅចុងភូមិ។ ក្នុងពេលហូបការនោះ បងប្រុសបានស្រវឹងដោយឲ្យយុវជនរងគ្រោះឌុបមកផ្ទះមុន លុះពេលឌុបបងប្រុសដាក់ផ្ទះរួចហើយ ជនរងគ្រោះបានជិះម៉ូតូទៅរោងការបន្តផឹកស៊ីទៀត គឺរហូតម៉ោងជាង១រសៀល ពេលគេសាររោង ទើបជនរងគ្រោះបានជិះម៉ូតូមកផ្ទះវិញម្នាក់ឯង ដោយសារតែស្រវឹងស្រាខ្លាំងពេកគេក៏បានជិះម៉ូតូទៅបុកបង្កាន់ដៃស្ពាន បណ្ដាលឲ្យរងរបួសបាក់ឆ្អឹងថ្គាមយ៉ាងធ្ងន់ធ្ងរ។ ចំណែកម៉ូតូបានខ្ទេចមុខមួយកំណាត់។
សមត្ថកិច្ចបានបន្តឲ្យដឹងទៀតថា ជនរងគ្រោះត្រូវបានដឹកទៅសង្គ្រោះព្យាបាលនៅផ្ទះពេទ្យឯកជនមួយក្នុងភូមិ ប៉ុន្តែដោយសារសភាពរបួសធ្ងន់ធ្ងរពេកក៏បានបញ្ជូនជូនមកមន្ទីរពេទ្យខេត្ត ដោយក្រុមគ្រូពេទ្យខេត្តពេលឃើញសភាពរបួសនេះធ្ងន់ធ្ងរ គេក៏បានបញ្ជូនជនរងគ្រោះទៅសង្គ្រោះព្យាបាលនៅមន្ទីរពេទ្យក្រុងភ្នំពេញជាបន្តទៀត៕
( ឈៀង ថារិទ្ធ )
0 Comments