ប៉ោយប៉ែត ៖ ប្រជាពលរដ្ឋជាង៥០នាក់នាំគ្នាផ្ទុះការតវ៉ាទាំងព្រឹក នៅសាលាសង្កាត់ប៉ោយប៉ែតតែម្តង ក្នុងគោលបំណងសុំឲ្យចៅសង្កាត់ខាងលើ រួមទាំងសាលាក្រុងប៉ោយប៉ែតដកលោកមេភូមិព្រៃព្រិចចេញពីតួនាទីជាមេភូមិ ខណៈដែលលោកមេភូមិខាងលើនោះ បានបង្កបញ្ហាអយុត្តិធម៌ជាច្រើនករណីទៅលើប្រជាពលរដ្ឋស្លូតត្រង់កន្លងទៅក្នុងមូលដ្ឋានរបស់ខ្លួនគ្រប់គ្រងសព្វថ្ងៃនេះ។
សូមបញ្ជាក់ថា ហេតុការណ៍ផ្ទុះការតវ៉ានោះ កើតមាននៅក្នុងម៉ោង៨និង១០នាទីព្រឹក ថ្ងៃទី២៣ ខែកុម្ភៈ ឆ្នាំ២០១៥ នៅមុខសាលាសង្កាត់ប៉ោយប៉ែត ស្ថិតនៅក្នុងក្រុងប៉ោយប៉ែត ខេត្តបន្ទាយមានជ័យ ក្រុមតវ៉ាទាំងនោះមកពីភូមិព្រៃព្រិច ស្ថិតក្នុងសង្កាត់ និងក្រុងខាងលើនោះតែម្តង ប៉ុន្តែការតវ៉ាបែបនេះត្រូវបានគេសង្កេតឃើញថា មានប្រជាពលរដ្ឋ និងសិស្សានុសិស្សមួយចំនួន ក៏បានចូលរួមក្នុងការតវ៉ានោះផងដែរ។
តាមការលើកឡើងរបស់ក្រុមតវ៉ាទាំងនោះបានឲ្យដឹងថា លោកស្រីមេភូមិដែលពួកគាត់កំពុងទាមទារឲ្យដកចេញពីតួនាទីនោះ គឺមានឈ្មោះហៅថា ហុក លឿម ភេទស្រី ដែលជាមេភូមិដុះស្លែ រាប់ឆ្នាំមកហើយ ក្រោមការតែងតាំងរបស់ចៅសង្កាត់ និងចៅហ្វាយក្រុងរាប់តជំនាន់ជាច្រើននាក់។ ប្រជាពលរដ្ឋបានបន្តទៀតថា នេះគឺជាលើកទី៤ហើយ ដែលពួកគាត់ធ្វើការតវ៉ាឲ្យថ្នាក់លើដកលោកស្រីមេភូមិខាងលើនោះចេញ បន្ទាប់ពីគេរកឃើញថា មានការបង្កបញ្ហាដ៏លំបាកទៅលើជនរងគ្រោះជាច្រើនករណីទៅលើភាគីបង្ក ដែលជាសាច់ឈាមរបស់អ្នកស្រីមេភូមិនោះ ពេលជនរងគ្រោះទៅតវ៉ាទាមទាររកយុត្តិធម៌ បែរជាមេភូមិរុញទៅថ្នាក់លើឲ្យដោះស្រាយទៅវិញ។ ប្រជាពលរដ្ឋបានលើកឡើងទៀតថា រាល់ភាពអសកម្ម និងភាពអយុត្តិធម៌ទៅលើជនរងគ្រោះជាច្រើនអ្នកកន្លងទៅនោះ ភាគច្រើនគឺគ្មានដំណោះស្រាយជូនពួកគាត់ឡើយ ធ្វើឲ្យជនសង្ស័យរួចផុតពីសំណាញ់ច្បាប់យ៉ាងសុខស្រួលបំផុត ពលរដ្ឋបានសំណូមពរទៅដល់លោកចៅសង្កាត់ និងសាលាក្រុង ជាលើកចុងក្រោយថា បើមិនដកមេភូមិនោះបានទេ ពួកគាត់នឹងទៅធ្វើបាតុកម្មទៅដល់សាលាខេត្តនាពេលដ៏ខ្លីខាងមុខនេះ។
លោក នុត លី ចៅសង្កាត់ប៉ោយប៉ែតបានប្រាប់តំណាងប្រជាពលរដ្ឋជាច្រើនថា រឿងដកមេភូមិនោះ គឺលោកបានចាត់ការទៅសាលាក្រុងដើម្បីមានវិធានការហើយ។ លោកចៅសង្កាត់ ក៏បានបន្ថែមទៀតថា ឋានៈរបស់លោកមិនមានសិទ្ធទៅដកមេភូមិបាននោះទេ វាជាសិទ្ធរបស់សាលាក្រុងជាអ្នកសម្រេច ដូច្នេះលោកបានរាយការណ៍ជូនទៅសាលក្រុងជាអ្នកសម្រេចហើយ ដោយឡែកលោកស្រីមេភូមិ ដែលរងនៅការចោទប្រកាន់នោះ គឺពុំអាចទាក់ទងតាមទូរស័ព្ទបានឡើយ៕
ពៅរី
0 Comments