កំពង់ឆ្នាំង ៖ ស្ត្រីមេម៉ាយម្នាក់បានស្លាប់ក្នុងពេលគាត់កំពុងដេកលក់ពេលយប់ ដោយសាររថយន្ត២គ្រឿងបុកគ្នាយ៉ាងសាហាវដាច់ទ្រុង ដាច់កាងរប៉ាត់រប៉ាយ ហើយរថយន្តបង្កបានជ្រុលចង្កូតមកបុកផ្ទះតៀមថ្មកាត់ដេររបស់ស្ត្រីរងគ្រោះសង់ផ្ទាល់ដីប៉ើងខ្ទេចអស់។ ហេតុការណ៍នេះបានកើតឡើងនៅវេលាម៉ោង១១និង៤០នាទីយប់ ថ្ងៃទី០២ ខែកុម្ភៈ ឆ្នាំ២០១៥ លើផ្លូវជាត់លេខ៥ ចន្លោះគីឡូម៉ែត្រលេខ៦៦និង៧៦ ក្នុងភូមិខ្នាយកកោះ ឃុំសែប ស្រុកកំពង់ត្រឡាច។
លោកនាយប៉ុស្តិ៍នគរបាលរដ្ឋបាលសែបបានឲ្យដឹងថា ស្រី្តមេម៉ាយរងគ្រោះស្លាប់ដោយគ្រោះថ្នាក់ចរាចរណ៍ខាងលើនេះមានឈ្មោះ ទាំ សារ៉ាត់ អាយុ៣៤ឆ្នាំ រស់នៅក្នុងភូមិស្វាយប្រកាវ ឃុំតាជេស ស្រុកកំពង់ត្រឡាច នាងបានមកជួលតៀមកាត់ដេររបស់អ្នកស្រុកនៅចំណុចកើតហេតុខាងលើ។ សមត្ថកិច្ចបានឲ្យដឹងថា ក្នុងពេលកើតហេតុគេបានឮសូររថយន្តទាំង២បុកគ្នាលាន់ដូចគ្រាប់បែកផ្ទុះ នៅចំណុចកើតហេតុគេឃើញរថយន្តម៉ាកហ្វ៊ុយស្សូ ពាក់ស្លាក់លេខកំពង់ធំ 3A-0220 ពណ៌ស បើកបរពីជើងទៅត្បូងដាច់ទ្រុង និងចង្អើរលើកាប៊ីននៅខាងស្តាំឆ្ងាយពីរថយន្តជាង១០ម៉ែត្រ ឯរថយន្តបានធ្លាក់ក្បាលពីលើថ្នល់នៅខាងឆ្វេងដៃ។ ចំណែកហ្វ៊ុយស្សូភ្លៅ៥ពាក់ស្លាកលេខតាកែវ3A1024 ពណ៌ប៉ៃតងឆ្នូតទឹកប្រាក់ បើកបរពីត្បូងទៅជើងបានដាច់កាងរប៉ាត់រប៉ាយ និងបុកផ្ទះតៀមថ្មកាត់ដេរសង់ផ្ទាល់ដី១ខ្នងប៉ើងខ្ទេចខ្ទីអស់ និងកិនស្ត្រីរងគ្រោះចំមួយកំណាត់ខ្លួនខាងលើស្លាប់ ដែលរូបនាងកំពុងដេកក្នុងផ្ទះ ហើយរថយន្តបង្កធ្លាក់ស្រែចម្ងាយពីផ្ទះជនរងគ្រោះជិត២០ម៉ែត្រ។ ករណីបុកគ្នានេះអ្នកទៅមើលកន្លែងកើតហេតុនិយាយគ្រប់គ្នាថាពិតជាសាហាវណាស់ ក្រោយពេលកើតហេតុរថយន្តទាំងឃ្លាតពីគ្នាជាង១០០ម៉ែត្រ ចំណែកអ្នកបើបបររថយន្តទាំង២បានរត់គេចខ្លួនបាត់ទាំងអស់គ្នា។
ករណីគ្រោះថ្នាក់ចរាចរណ៍នេះសមត្ថកិច្ចបានសន្និដ្ឋានឲ្យដឹងថា បណ្ដាលមកពីការ
បើកបរលឿនពេកនៅផ្លូវបត់កោង ហើយអ្នកបើកបរទំនងជាបើកងោកផងទើបបង្កឲ្យមានគ្រោះថ្នាក់ធ្ងន់ធ្ងរនិងសាហាវបែបនេះ។ ចំណែកអ្នកបើកបរនិងព្រូទាំង៤នាក់ក៏អាចរងរបួសផងដែរព្រោះកញ្ចក់និងកាប៊ីនរថយន្តទាំង២បែកនិងរួញដូចគ្នាខូចខាតធ្ងន់ធ្ងរ។
រថយន្តទាំង២ត្រូវបានសមត្ថកិច្ចនគរបាលចរាចរណ៍ផ្លូវគោកខេត្តជួលរថយន្តស្ទូចដឹកយកមករក្សាទុកក្នុងស្នងការដ្ឋានខេត្ត និងបានវាស់វែងប្លង់កើតហេតុកសាងសំណុំរឿងតាមនីតិវិធី ដើម្បីទុកដោះស្រាយជាមួយភាគីទាំង៣តាមផ្លូវច្បាប់៕
( ឈៀង ថារិទ្ធ )
0 Comments