លោក ឈា ប៊ុនរិទ្ធ ក្រុមការងារនាយកដ្ឋានធារាសាស្ត្រកសិកម្ម បានឲ្យដឹងនៅវេលាម៉ោង ១០និង១៥នាទី ថ្ងៃទី២១ ខែកក្កដានេះថា ដោយទទួលបានបទបញ្ជាពីលោករដ្ឋមន្ត្រី ក្រសួងធនធានទឹកនិងឧត្តុនិយម ក្រុមការងារនាយកដ្ឋានធារាសាស្ត្រកសិកម្ម បានសហការជាមួយមន្ទីរធនធានទឹកខេត្តបាត់ដំបង ចុះអន្តរាគមន៍បូមទឹកសង្គ្រោះស្រូវវស្សាជួបគ្រោះរាំងស្ងួតជាង ៣ពាន់ហិកតា ក្នុងស្រុកថ្មគោល និងស្រុកបវេល ខេត្តបាត់ដំបង។
លោកបន្តថា នៅក្នុងជំហានដំបូងនៃកិច្ចអន្តរាគមន៍បូមទឹកសង្គ្រោះស្រូវខាងលើ ក្រុមការងារបានប្រើប្រាស់ម៉ាស៊ីនបូមទឹក ៥៦ សេស ចំនួន ៤គ្រឿង លើ ២ទីតាំង ដោយទីតាំងទី១ ចំនួន២គ្រឿង ស្ថិតក្នុងឃុំខ្នាចរមាស ស្រុកបវេល សម្រាប់បូមយកទឹកពីប្រព័ន្ធប្រឡាយបវេល ទម្លាក់ចូលប្រឡាយលេខ១មានប្រវែង 24km ដើម្បីនាំទឹកមកស្រោចស្រពស្រូវ សរុបចំនួន 2.500 ហិកតា ក្នុងឃុំបន្សាយត្រែង, គោកឃ្មុំ និងឃុំអូរតាគី ស្រុកថ្មគោល និងទីតាំងទី២ ចំនួន ២គ្រឿងទៀត ស្ថិតក្នុងឃុំព្រៃខ្ពស់ ស្រុកបវេល សម្រាប់បូមទឹកពីស្ទឹងបវេលទម្លាក់ចូលប្រឡាយអូរជីក មានប្រវែង ៦km ដើម្បីនាំទឹកមកស្រោចស្រពស្រូវ សរុបចំនួន ៧០០ហិកតា ក្នុងឃុំព្រៃខ្ពស់ និងឃុំល្វា ស្រុកបវេល។
នាយកដ្ឋានធារាសាស្ត្រកសិកម្ម សហការជាមួយមន្ទីរធនធានទឹកខេត្តបាត់ដំបង អន្តរាគមន៍បូមទឹក
0 Comments