ពិធីនេះមានការចូលរួមពីលោក គោស៊ុំ សារឿត អភិបាលខេត្តបន្ទាយមានជ័យ លោក សួនបវរ អភិបាលរងខេត្ត លោក អ៊ី ឡុង សមាជិកក្រុមប្រឹក្សាខេត្ត លោកស្រី ព្រំ ស៊ីណា ប្រធានមន្ទីរផែនការខេត្ត និងមន្ត្រីថ្នាក់ខេត្ត ស្រុក ឃុំ និងសមត្ថកិច្ចជាច្រើននាក់ទៀត។
លោកស្រី ព្រំ ស៊ីណា បានឡើងធ្វើបទបង្ហាញអំពីឯកសារព័ត៌មាន ស្ថានភាពពិន្ទុវិស័យថាពិន្ទុវិស័យថ្នាក់ខេត្តមាន៩វិស័យ ៖ ភាពក្រីក្រ កសិកម្ម អាជីវកម្ម អប់រំ សុខភាព ភាពងាយរងគ្រោះ បរិស្ថាន រដ្ឋបាលសន្តិសុខ និងយេឌ័រ។
លោកស្រីបានបន្តថា វិស័យទាំង៩នោះមានជាតារាងពិន្ទុ តាមបណ្ដាវិស័យសម្រាប់ខេត្ត និងក្រុង/ស្រុកក្នុងខេត្ត វាជាឧបករណ៍ប្រើប្រាស់សម្រាប់ការរៀបចំផែនការអភិវឌ្ឍន៍ និងកម្មវិធីវិនិយោគ៣ឆ្នាំ រំកិលប្រចាំឆ្នាំរបស់ខេត្តក្រុង/ស្រុកសម្រាប់ផ្សារភ្ជាប់ជាមួយនឹងកម្រងឯកសារព័ត៌មាន ស្ថានភាពខេត្ត ដែលបានផលិតចេញពីទិន្នន័យមូលដ្ឋាន ឃុំ/សង្កាត់ CDB ដែលមេភូមិស្មៀន ឃុំ/សង្កាត់ ធ្វើការស្រង់ជារៀងរាល់ឆ្នាំ។
លោកស្រីបន្តថា រាល់តម្លៃសូចនាករក្នុងសមាសភាគវិស័យនិមួយៗ ត្រូវបានគណនាពិន្ទុដោយផ្អែកលើទិន្នន័យគោលគ្រប់ពិន្ទុសម្រាប់សូចនាករទាំងអស់មានភាពខុសគ្នាតាមទិសដៅរៀងខ្លួន។
លោក គោស៊ុំ សារឿត បានមានប្រសាសន៍ក្នុងកិច្ចប្រជុំនោះដែរថា ឯកសារព័ត៌មានស្ថានភាព ស្ដីពីពិន្ទុវិស័យនេះ វាមានសារសំខាន់ណាស់សម្រាប់វិស័យទាំង៩នេះ វាអាចផ្ដល់លទ្ធភាពឲ្យយើងបានឃើញអំពីចំណុចខ្លាំង និងចំណុចខ្សោយក្នុងវិស័យនិមួយៗរបស់ខេត្ត និងស្រុក/ក្រុងដោយប្រៀបធៀបទៅស្រុក/ក្រុងផ្សេងៗនៅក្នុងខេត្តបន្ទាយមានជ័យយើងនេះ៕
ប្រជុំផ្សព្វផ្សាយ ស្ដីពីឯកសារព័ត៌មាន ស្ថានភាពពិន្ទុវិស័យ ដល់មន្ត្រីថ្នាក់ខេត្ត
0 Comments