លោក ឧត្តមសេនីយ៍ទោ អ៊ុក ហៃសីឡា ប្រធាននាយកដ្ឋានស៊ើបអង្កេត អនុវត្តន៍នីតិវិធី នៃអគ្គនាយកដ្ឋានអន្តោប្រវេសន៍ បានឲ្យដឹង ថា នៅវេលាម៉ោង ៩និង៣០ ព្រឹកថ្ងៃ២១នេះថា ជនជាតិវៀតណាមប្រុសស្រី ចំនួន៣៣នាក់ ត្រូវនាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ ធ្វើការ បណ្តេញចេញទៅប្រទេសវៀតណាមវិញតាមច្រកទ្វារអន្តរជាតិក្អមសំណ។
លោកបន្តថា ការបណ្តេញជនជាតិវៀតណាមចំនួន ៣៣នាក់បន្ថែមទៀត ចេញពីកម្ពុជា នេះពេលនេះធ្វើឡើងក្រោយពី សមត្ថកិច្ច នៃអគ្គនាយកដ្ឋានអន្តោប្រវេសន៍ បានចុះត្រួតពិនិត្យរដ្ឋបាលនៅតំបន់ មួយចំនួននៅក្នុងរាជធានីភ្នំពេញខេត្តរតនគីរី និង ខេត្តព្រះសីហនុកាលពីពេលកន្លងមក ដោយបានឃាត់ខ្លួនជនជាតិ វៀតណាមទាំងនោះ រស់នៅ និងធ្វើការដោយមិនមានលិខិតស្នាមត្រឹមត្រូវ (អត់ច្បាប់)។
ដោយឡែកជនជាតិវៀតណាមនិងជនជាតិចិនដទៃទៀត រកឃើញមានលិខិតស្នាម ត្រឹមត្រូវ សមត្ថកិច្ច ធ្វើការអប់រំ និងណែនាំ ដោយសុំឲ្យជនបទេសដែលស្នាក់នៅនិងធ្វើការសុំច្បាប់ និង គោរពច្បាប់ ប្រទេសកម្ពុជា បើពុំនោះទេ សមត្ថកិច្ច និងចាត់វិធានការដោយពុំលើកលែងឡើយ។ហើយ ប្រសិនបើ សមត្ថកិច្ច រកឃើញមានជនជាតិណា មិនមានសៀវភៅការងារ ត្រូវផាកពិន័យថវិកាចូលរដ្ឋចំនួន៥០ម៉ឺនរៀលសម្រាប់ជនជាតិបរទេសម្នាក់។
យោងតាមរបាយការណ៍របស់នគរបាលអន្តោប្រវេសន៍បានបញ្ជាក់ថា ចាប់តាំងពីឆ្នាំ២០១៤រហូតមកដល់បច្ចុប្បន្ន រួមទាំងការចុះត្រួតពិនិត្យនៅមជ្ឈមណ្ឌលកោះពេជ្រផងគឺបានរកឃើញជនជាតិវៀតណាមខុសច្បាប់សរុបចំនួន២៣០០នាក់ហើយ និងបានឃាត់ខ្លួនជនបរទេសដែលមកស្នាក់នៅខុសច្បាប់នៅទឹកដីកម្ពុជាចំនួន៤៣សញ្ជាតិសរុបជាង៣០០០នាក់ ហើយត្រូវបានបណ្ដេញចេញទៅប្រទេសដើមវិញ៕
ជនជាតិវៀតណាម៣៣នាក់ផ្សេងទៀត ត្រូវបានបណ្ដេញចេញពីកម្ពុជា
0 Comments