សមត្ថកិច្ចនគរបាលចរាចរណ៍ក្រុងកំពង់ឆ្នាំងបាននិយាយឲ្យដឹងថា ជនរងគ្រោះទាំង៥នាក់ ជាឪពុកម្ដាយ និងកូន ក្នុងនោះបុរសជាឪពុកមានឈ្មោះ សេង សៀ អាយុ៥០ឆ្នាំ ម្ដាយឈ្មោះ ឡង់ សុអឿន អាយុ៤៣ឆ្នាំ កូនស្រីបងឈ្មោះ សេង គឹមលៀង អាយុ១៦ឆ្នាំ ប្អូនស្រីឈ្មោះ សេង គឹមអេង អាយុ៧ឆ្នាំ ទាំង៤នាក់រងរបួសស្រាល ចំណែកកូនប្រុសឈ្មោះ សេង គឹមសាន អាយុ១០ឆ្នាំ បានរងរបួសធ្ងន់។ គ្រួសារខាងលើនេះមានទីលំនៅភូមិជ្រៃបាក់ ឃុំជ្រៃបាក់ ស្រុករលាប្អៀរ។
ករណីនេះ មុនពេលកើតហេតុ ជនរងគ្រោះខាងលើបានជិះម៉ូតូម៉ាកហុងដាវ៉េវ ពណ៌.សក្រហម គ្មានស្លាកលេខ ក្នុងដំណើរពីត្បូងមកជើង លុះមកដល់ចំណុចកើតហេតុ បានជ្រុលទៅប៉ះបុកដៃចង្កូតកង់សិស្សម្នាក់ពីក្រោយ ហើយបានច្រឡោតដួលបាក់.ក ម៉ូតូ បោកមនុស្សដួលដេកពេញថ្នល់ បណ្ដាលឲ្យរងរបួសធ្ងន់ និងស្រាល ចំណែកសិស្សសាលាជិះកង់នោះមិនបានរងរបួសនោះទេ។
ក្រោយពេលកើតហេតុ ជនរងគ្រោះទាំង៥នាក់ ត្រូវបានលោកអនុសេនីយ៍ឯក មុយ អ៊ីម មន្ត្រីនគរបាលចរាចរណ៍ក្រុងកំពង់ឆ្នាំងបើករថយន្តស៊ីរ៉ែនរបស់នគរបាលដឹកទៅសង្គ្រោះនៅមន្ទីរពេទ្យខេត្ត ដោយសារតែរថយន្តពេទ្យមកយឺតពេក។ ដោយឡែកមធ្យោបាយធ្វើដំណើរទាំង២ត្រូវបាននគរបាលដឹកទៅរក្សាទុកនៅអធិការដ្ឋាននគរបាលខេត្ត ដើម្បីកសាងសំណុំរឿងដោះស្រាយតាមនីតិវិធីច្បាប់៕
ជិះម៉ូតូគ្នា៥នាក់ ទៅបុកដៃកង់ពីក្រោយ រងរបួសធ្ងន់ និងស្រាល
0 Comments