ភ្នំពេញ ៖ ប្រជាពលរដ្ឋសំណូមពរ ទៅនាយកដ្ឋានសណ្តាប់ធ្នាប់ នៃអគ្គស្នងការដ្ឋាននគរបាលជាតិ គួរតែមានវិធានការណាមួយ ទៅលើអ្នកបើកបររថយន្តក្រឡុកស៊ីម៉ង់ត៍ របស់ក្រុមហ៊ុន វឌ្ឍនៈ ដែលបានបង្កគ្រោះថ្នាក់ចរាចរណ៍ នៅលើដងផ្លូវបណ្តាលឲ្យមនុស្សស្លាប់ និងរបួសចំនួន២លើកហើយ ក្នុងរយៈពេល ២សប្តាហ៍ប៉ុណ្ណោះ។
ជាក់ស្តែងកាលពីវេលាម៉ោង ៨និង២០នាទីព្រឹក ថ្ងៃទី២៧ ខែកក្កដា ឆ្នាំ២០១៥ រថយន្តក្រឡុកស៊ីម៉ង់ត៍ របស់ក្រុមហ៊ុននេះ បានបើកកៀរបុរសម្នាក់ជាអ្នករត់ម៉ូតូឌុប បណ្តាលឲ្យបាក់ជើងឆ្វេង នៅលើកំណាត់ផ្លូវលំ ស្ថិតក្នុងភូមិភា សង្កាត់ប្រទះឡាង ខណ្ឌដង្កោ រាជធានីភ្នំពេញ។
សមត្ថកិច្ចមូលដ្ឋានបានឲ្យដឹងថា ជនរងគ្រោះមានឈ្មោះ មុំ ទុន ភេទប្រុស អាយុ៤៩ឆ្នាំ មានទីលំនៅភូមិវត្តស្លែង សង្កាត់ពងទឹក ខណ្ឌដង្កោ។ ជនរងគ្រោះជិះម៉ូតូ ម៉ាក ហុងដាឌ្រីម ស៊េរីឆ្នាំ២០០៧ ពណ៌ខ្មៅ ពាក់ស្លាកលេខ ភ្នំពេញ 1V-0729 ធ្វើដំណើរពីកើតទៅលិច។ ចំណែករថយន្តបង្កហេតុ ម៉ាក HINO ពណ៌លឿងលាយស ពាក់ស្លាកលេខ ភ្នំពេញ 5A-0230 បើកបរដោយឈ្មោះ សៀង ស៊ិន ភេទប្រុស អាយុ២៦ឆ្នាំ ស្នាក់នៅក្នុងក្រុមហ៊ុនសួនវឌ្ឍនៈ។
គួររំលឹកឲ្យដឹងដែរថា កាលពីវេលាម៉ោង ៧និង១៥នាទីព្រឹក ថ្ងៃទី២៤ ខែកក្កដា ឆ្នាំ២០១៥ ស្ត្រីម្នាក់ក៏បានស្លាប់ នៅលើកំណាត់ផ្លូវជាតិលេខ២ ភូមិទួលរកាទី១ សង្កាត់ចាក់អង្រែក្រោម ខណ្ឌមានជ័យ ដែលបង្កឡើងដោយរថយន្តក្រឡុកស៊ីម៉ង់ត៍ របស់ក្រុមហ៊ុនវឌ្ឍនៈនេះផងដែរ៕
ប្រជាពលរដ្ឋសំណូមពរនាយកដ្ឋានសណ្តាប់ធ្នាប់ គួរមានវិធានការលើរថយន្ត ក្រឡុកស៊ីម៉ងត៍ក្រុមហ៊ុនវឌ្ឍនៈ
0 Comments