លោក ង៉ិន សុភឿន ស្នងការរងទទួលបន្ទុកចរាចរណ៍សណ្ដាប់ធ្នាប់នៃស្នងការដ្ឋាននគរបាលខេត្តមណ្ឌលគិរីបានឲ្យដឹងថា ក្នុងរយៈពេល៦ខែ ដើមឆ្នាំ២០១៥នេះ គ្រោះថ្នាក់ចរាចរណ៍ទូទាំងខេត្តមណ្ឌលគិរីបានកើតមានចំនួន៣២លើក បើប្រៀបធៀបជាមួយរយៈពេល៦ខែ ដើមឆ្នាំ២០១៤កន្លងទៅ ឃើញថា គ្រោះថ្នាក់ចរាចរណ៍ក្នុងខេត្តមណ្ឌលគិរីមានការថយចុះចំនួន៦លើក ស្មើនឹង១២ភាគ រយ។
ដោយគ្រោះថ្នាក់ចរាចរណ៍ទាំងអស់នេះបានបណ្ដាលឲ្យមានមនុស្សស្លាប់ចំនួន០៤នាក់ ក្នុងនោះរងរបួសធ្ងន់ចំនួន១៦នាក់ ស្រី០៣នាក់ របួសស្រាលចំនួន១៦នាក់ ស្រី០៤នាក់ និងធ្វើឲ្យរថយន្តខូចខាតធ្ងន់០៦គ្រឿង រថយន្តខូចខាតស្រាល០៩គ្រឿង ម៉ូតូខូចខាតធ្ងន់០៨គ្រឿង ម៉ូតូខូចខាតស្រាល០៥គ្រឿង។
លោកស្នងការរងបានឱ្យដឹងថា មន្ត្រីនគរបាលចរាចរណ៍បានចុះធ្វើការត្រួតពិនិត្យការអនុវត្តន៍ច្បាប់ចរាចរណ៍ផ្លូវគោកជាប្រចាំ តាមគោលដៅនីមួយៗ ដោយបានធ្វើការអប់រំផាកពិន័យ អ្នកបើកបរយានយន្តមិនគោរពច្បាប់ចរាចរណ៍បានចំនួន១.១៣០គ្រឿង សរុបទឹកប្រាក់ជូនរដ្ឋបាន ៤.៤៦៩.០០០រៀល (៤លាន៤សែន៦ម៉ឺន៩ពាន់រៀល)។
លោកស្នងការរងបានបន្តថា បើទោះបីអត្រានៃករណីគ្រោះថ្នាក់ចរាចរណ៍មានការថយចុះត្រឹមកម្រិតមួយទាបនៅឡើយក្តី តែមន្ត្រីនគរបាលចរាចរណ៍យើងនៅតែជំរុញ និងពង្រឹងច្បាប់នេះធ្វើការផ្សព្វផ្សាយ ណែនាំជូនបងប្អូនប្រជាពលរដ្ឋទូទាំងខេត្ត ភ្ញៀវទេសចរណ៍ ជាពិសេសបងប្អូនប្រជាពលរដ្ឋជនជាតិដើមភាគតិចព្នងពីទីប្រជុំជនរហូតដល់មូលដ្ឋានឲ្យពួកគាត់យល់ដឹងពីការបើកបរ និងច្បាប់ចរាចរណ៍ផងដែរ ឈានទៅរកការកាត់បន្ថយគ្រោះថ្នាក់ចរាចរណ៍ឲ្យមកនៅកម្រិតទាប៕
គ្រោះថ្នាក់ចរាចរណ៍មានការថយចុះ ក្នុងកម្រិតតិចតួចនៅមណ្ឌលគិរី
0 Comments