ការប្រឡងសញ្ញាបត្រ មធ្យមសិក្សាទុតិយភូមិហៅថា ការប្រឡងបាក់ឌុប ឆ្នាំនេះ នឹងប្រព្រឹត្តទៅនៅថ្ងៃទី២៤ ខែសីហា ឆ្នាំ២០១៥។ បើគិតពីថ្ងៃនេះ ទៅឃើញថា នៅសល់តែមួយខែគត់នោះ នឹងដល់ថ្ងៃប្រឡងហើយ។ តើចំពោះសិស្សជាបេក្ខជនប្រឡងមានការគិតយ៉ាងណា?
សិស្សជាបេក្ខជន ប្រឡង គឺសិស្សដែលបានរៀនចប់ថ្នាក់ទី១២ នៃឆ្នាំសិក្សា២០១៤-២០១៥នេះតែងបានគិតស្រមៃជារឿយៗ ទៅនឹងការងារប្រឡងឆ្នាំកន្លងមកដែលក្រសួងអប់រំយុវជន និងកីឡា មានផែនការចំពោះមុខ គឺតម្រូវទៅតាមគុណភាព ឬសិស្សមានសមត្ថភាព ទើបបានប្រឡងជាប់។ ជាមួយនេះ ផងដែរគេតែងបាននឹកគិតអំពីសកម្មភាព ពេលប្រឡងនោះ គឺតម្រូវឲ្យបេក្ខជនមានការប្រឡងប្រកបដោយយុតិ្តធម៌ ព្រោះបើបេក្ខជនបានប្រឡងជាប់នោះ គឺជាសមត្ថភាព ឬជាតម្លៃនៃចំណេះដឹងរបស់ខ្លួនសុទ្ធសាធតែម្តង។ ផ្ទុយទៅវិញបើបេក្ខជនណាប្រឡងមិនបានជាប់នោះ ក៏វាជាសមត្ថភាពរបស់ខ្លួននៅមិនទាន់មានគ្រប់គ្រាន់ពោលគឺ ពុំមានការពោលពាក្យទម្លាក់កំហុស ទៅខាងណានោះទេ។ ជាពិសេសគឺ មានតែខ្លួនឯង ទេដែលបន្ទោសខ្លួនឯងនោះ។
បេក្ខជនដែលត្រូវ ប្រឡងតែងបានគិតឃើញនិងតែងបាននិយាយគ្នាទៅវិញទៅមកថា ពេលប្រឡងមិនអាចយកឯកសារចូលទៅដោយលួចលាក់បាននោះទេ គឺគ្រប់ល្បិចកលនៃរឿងអយុតិ្តធម៌នៃការប្រឡងរបស់បេក្ខជននោះ នឹងមិនមានការឃ្លាំមើលរំលង ពីអនុរក្សតាមបន្ទប់នោះឡើយ។ បញ្ហាសួរគ្នាជិតខាងក៏មិនបានការសម្លឹងលួចចម្លងតាមគ្នាក៏មិនបានដែរនិយាយរួមថា បេក្ខជនមិនអាចងាកខ្លួនបានក្រៅពីការបំពេញការងារផ្ទាល់ខ្លួននោះទេ។ ជាពិសេសទៅទៀតចំពោះបញ្ហាពុករលួយផ្សេងៗ ទៀតតាមរយៈការទាក់ទងអនុរក្ស ឬរហូតដល់គណៈកម្មការមណ្ឌលនោះក៏មិនអាចប្រព្រឹត្តទៅបានដែរ។ ម្យ៉ាងទៀតចំពោះការរៃលុយពីបេក្ខជនក្នុងពេលប្រឡងតាមមុខវិជ្ជានីមួយៗ ដើម្បីឲ្យអនុរក្សតាមបន្ទប់ធ្វើការធ្មេចភ្នែក ឬបង្កលក្ខណៈ ឲ្យបេក្ខជនចម្លងគ្នា ឬចម្លងតាមឯកសារណានោះក៏មិនបានដែរ។ ទាំងអស់នេះជារឿង ចាស់នៃការប្រឡងកាលពីឆ្នាំមុន ហើយដែលបេក្ខជនប្រឡងតែងគិតថាឆ្នាំនេះក៏វាមិនខុសពីឆ្នាំមុននោះដែរ គឺអ្វីដែលសំខាន់ទៀតនោះឆ្នាំនេះ ជារបត់បន្តដែលមានការបាក់ផ្នត់ និងមានការជ្រួតជ្រាបសុសសាយរួចស្រេចទៅហើយ។ ម៉្លោះហើយឆ្នាំនេះ ពិតជាមានទម្លាប់ល្អជាង ឆ្នាំមុនទៀតផង ពោលគឺ អាចមិនសូវមានភាពរញ៉េរញ៉ៃដូចជាឆ្នាំនៃការកាច់ក្បាលដំបូងនោះទេ។
ទាំងបេក្ខជនប្រឡង និងទាំងសហគមន៍ មាតាបិតាសិស្សតែងបានជ្រួតជ្រាបរឿងនេះ អស់ហើយ ដូចនេះនៅបាំងតែមួយខែគត់ទៀតទេ ដែលត្រូវដល់ថ្ងៃប្រឡងហើយ។ ការប្រឡងឆ្នាំនេះនឹងប្រព្រឹត្តទៅតែម្តងទេ ព្រោះមិនដូចកាលពីឆ្នាំមុនមានការប្រឡង២ដង គឺលើកទី១ផង និងលើកទី២ ផងនោះឡើយ។ ការប្រឡងតែម្តងសម្រាប់ឆ្នាំនេះក៏គេបានទទួលព័ត៌មានថា ក្រសួងអប់រំគ្រោង ចំណាយលើការប្រឡងអស់ចំនួន៣លានដុល្លារទៀតផង។
ទាក់ទងនឹងព័ត៌មានចាស់កន្លងមកនិងព័ត៌មានថ្មីៗ នេះផងតែងធ្វើឲ្យបេក្ខជនដែលត្រូវប្រឡងនាពេលខាងមុខនេះ ត្រៀមខ្លួនប្រឡងឲ្យបានល្អ។ ជាពិសេស គឺសិស្សខំធ្វើការរំលឹកមេរៀនណាដែលជាមុខវិជ្ជាក្នុងការប្រឡងផង និងធ្វើលំហាត់គណិតវិទ្យា រូបវិទ្យា និងគីមីវិទ្យាឲ្យបានច្រើន។ ជាក់ស្តែងគេតែងនិយាយថា សិស្ស ថ្នាក់ត្រូវប្រឡងឆ្នាំនេះមានការភ្ញាក់រលឹក និងខិតខំប្រឹងស្រវាស្រទេញក្នុងការសិក្សាខ្លាំងជាងសិស្សឆ្នាំមុនឆ្ងាយណាស់។ ចំពោះសិស្សខ្លះបានបង្កើតក្លិបសិក្សានៅតាមផ្ទះហើយបានជួយគ្រូទៅបង្ហាត់ដោយការធ្វើលំហាត់ធំៗ សំខាន់ៗ សម្រាប់តម្រូវទៅនឹងការប្រឡងតែម្តងគឺ ដើម្បីបានសម្រេចជោគជ័យនៃការប្រឡងជាប់ជាស្ថាពរនាចុងឆ្នាំសិក្សានេះ៕
ជិតដល់ពេលប្រឡង ហើយតើ!
0 Comments