កំពង់ធំ ៖ ក្រោយពេលរដូវបិទនេសាទបានឈានចូលមកដល់ ក្រុមអ្នកនេសាទបានលបលួចនេសាទត្រីដោយខុសច្បាប់ ដោយបានប្រើប្រាស់ឧបករណ៍នេសាទដែលត្រូវបានហាមឃាត់ និងត្រូវបាន លោក អេង ជាសាន ប្រតិភូរាជរដ្ឋាភិបាល និងជាប្រធានរដ្ឋបាលជលផល បានដឹកនាំកម្លាំងផ្នែករដ្ឋបាលជលផលផាតសណ្តាយ សង្កាត់រដ្ឋបាលជលផល ពាមបាង និងសង្កាត់រដ្ឋបាលជលផលអន្លង់សំណរ រួមទាំងកងកម្លាំងប្រដាប់អាវុធ ចាប់បានកាណូតដែលកំពុងតែធ្វើ សកម្មភាព ឆក់ត្រជាក់ សកម្មភាពយ៉ាងកាវ ចាប់បានទូកកាណូតតូចធំ ចំនួន ៩ គ្រឿង និងមនុស្ស១១នាក់ ដែលរស់នៅឃុំកំពង់ឃ្លាំង ខេត្តសៀមរាប នៅចំនុច បាក់ដាវ ព្រំប្រទល់៣ខេត្ត សៀមរាប កំពង់ធំ ពោធិ៍សាត់ កាលពីរសៀលថ្ងៃទី ២៣ ខែ កក្កដា ឆ្នាំ ២០១៥។
ប្រតិបត្តិការបង្ក្រាបបទល្មើសនេសាទ សមត្ថកិច្ចបានរឹបអូសបាន មនុស្ស១១នាក់ ទូកកាណូត ៩គ្រឿង ដុំភ្លើងឆក់ ត្រជាក់ចំនួន២គ្រឿង សាច់យ៉ាងកាវចំនួន២គ្រឿង វត្ថុតាងទាំងអស់ត្រូវបាន យកទៅប្រគល់ឲ្យទៅសង្កាត់រដ្ឋបាល ជលផលកំពង់ឃ្លាំង រក្សាទុក ចំណែកមនុស្សត្រូវបានកសាងសំណុំរឿង បញ្ជូនទៅតុលាការ។
លោក យ៉ាន់ វីសាក់ នាយផ្នែករដ្ឋបាលជលផល ផាត់ សណ្តាយ បានឲ្យដឹងថា លោកបានសហការជាមួយសង្កាត់ និងមន្ត្រីក្រោមឱវាទ បង្ក្រាបរាល់បទល្មើសនេសាទខុសច្បាប់ ដែលក្រុមអ្នកនេសាទតែងតែលួចប្រើប្រាស់ ឧបករណ៍នេសាទខុសច្បាប់ រួមទាំងបានធ្វើការផ្សព្វផ្សាយ ស្តីពី ច្បាប់ជលផលដល់សហគមន៍ ដើម្បីឲ្យប្រជានេសាទមានការចូលរួម ក្នុងការទប់ស្កាត់បទល្មើសនេសាទ ក្នុងគោលបំណងចូលរួមថែរក្សាធនធានធម្មជាតិ ជាពិសេសក្នុងរដូវបិទ នេសាទ ត្រីពងកូន។
លោក ប៉ែន វណ្ណរិទ្ធ នាយខណ្ឌរដ្ឋបាលជលផលកំពង់ធំ បានមានប្រសាសន៍ ផ្តាំផ្ញើដល់ ប្រជានេសាទទាំងអស់ កុំប្រើ ប្រាស់ឧបករណ៍នេសាទខុសច្បាប់ ព្រោះធនធានមច្ឆាជាតិទាំងនេះ គឺជារបស់បងប្អូនទេ មិនមែនរបស់សមត្ថកិច្ច ឬក៏ របស់ជលផលដែរ ហើយបើប្រើប្រាស់ឧបករណ៍នេសាទ នូវពេលគេទៅចាប់ បែរជានាំគ្នាភ័យខ្លាច និងមានទោសទៀតផង ចំណែកខណ្ឌរដ្ឋបាលជលផល គ្រោងនិងបញ្ជូនកម្លាំងកម្លាំងសង្កាត់រដ្ឋបាលជលផល ដែលនៅផ្នែកខាងលើ ទៅសហការ ជាមួយសង្កាត់រដ្ឋបាលជលផល ផ្នែកទន្លេសាប ដើម្បីបង្ក្រាបបទល្មើស នេសាទ៕
លោក អេង ជាសាន ដឹកនាំកម្លាំងសមត្ថកិច្ចចម្រុះបង្ក្រាបបទល្មើសនេសាទចាប់បានមនុស្ស១១នាក់ កាណូត៩គ្រឿង
0 Comments