តារាចម្រៀងប្រុសសំឡេងធ្ងន់ធ្លាប់ឆ្លងកាត់ការប្រឡងក្នុងកម្មវិធីThe Voice Cambodia លោក ប៊ុត សីហា បើទោះបីជាពេលមុននេះត្រូវបានទទួលស្គាល់ពីទស្សនិកជនមិត្តយុវវ័យថាជាតារាចម្រៀងសំឡេងពីរោះក៏ពិតមែន តែលោកមិនបានគិតទៅដល់ការរៀបចំឫកពាឱ្យបានសក្ដិសមទៅនឹងអ្វីដែលជាការចង់បានពីមហាជនជាអ្នកគាំទ្រវិញនោះឡើយ។ ផ្ទុយទៅវិញតារារូបនេះ បែរជាបង្ហាញពីឥរិយាបថឫកពាមិនសមរម្យ ហាក់មានភាពឆ្មើងឆ្មៃ រហូតដល់មានមតិរិះគន់ពីភាពមិនសមគួរនេះឡើង។
ថ្មីៗនេះ មានការលើកឡើងពីមជ្ឈដ្ឋានទស្សនិកជនមួយចំនួនជុំវិញការរិះគន់ដោយចំៗទៅលើ តារាចម្រៀងលោក ប៊ុត សីហា ថា ក្រោយពីតារាប្រុសរូបនេះមានឈ្មោះក្នុងវិថីសិល្បៈបន្តិចមកនោះ ស្រាប់តែបញ្ចេញឥរិយាបថខុសប្លែក ដោយសម្ដែងពីកាយវិការ ឫកពាក្រអឺតក្រទម មើលទៅគួរឲ្យស្អប់ទៅលើចំណុចខ្លះៗ។ ម្យ៉ាងទៀត លោកតែងធ្វើអ្វីដោយពុំបានគិតដល់អារម្មណ៍របស់អ្នកដែលនៅជុំវិញខ្លួន។
តាមប្រភពខ្លះបានលើកឡើងថា បើទោះបីជាពេលនេះ លោក ប៊ុត សីហា កំពុងមានឱកាស ចេញមុខក្នុងទីផ្សារសិល្បៈបន្តិចក៏ពិតមែន ប៉ុន្តែទៅថ្ងៃខាងមុខ លោកច្បាស់ជាស្រុតធ្លាក់ចុះមកវិញផងដែរនូវប្រជាប្រិយភាព និងការគាំទ្រ។
ប្រភពខាងលើបាននិយាយបន្តថា ប៊ុត សីហា ត្បិតតែឥឡូវលេចមុខមាត់ក្នុងសង្គមសិល្បៈជា អ្នកចម្រៀង ពុំទាន់មានឱកាសឈោងចាប់បាននូវភាពល្បីល្បាញដូចតារាឯទៀតយ៉ាងនេះក្តី តែបើនៅថ្ងៃខាងមុខ លោកចេះក្ដោបក្ដាប់ឱកាស និងបត់បែនទៅតាមភាពសមគួរ តម្រូវតាមមជ្ឈដ្ឋានខាងក្រៅច្រើនជាងភាពអំនួតរបស់ខ្លួននោះ គឺតារារូបនេះអាចនឹងឈានទៅរកចំណុចកំពូលតារាល្បីឈ្មោះដូចតារារៀមច្បងឯទៀតជាក់ជាពុំខាន។
កម្ពុជាថ្មី មិនអាចស្វែងរកការបកស្រាយពីលោក ប៊ុត សីហា បាននៅឡើយទេ កាលពីរសៀលថ្ងៃទី២០ ខែកក្កដា ឆ្នាំ២០១៥នេះ។ កម្ពុជាថ្មី ស្វាគមន៍ចំពោះការចេញមុខបំភ្លឺពីសំណាក់តារាចម្រៀងចំណូលថ្មីរបស់ផលិតកម្មហង្សមាស លោក ប៊ុត សីហា នៅពេលក្រោយ៕
ប៊ុត សីហា បានល្បីបន្តិចចាប់ផ្ដើមវាយឫក
0 Comments