ជាក់ស្ដែង កាលពីយប់ថ្ងៃសៅរ៍ ទី១៨ ខែកក្កដា ឆ្នាំ២០១៥ មានករណីចោរចូលលួចគាស់បន្ទប់ការិយាល័យរបស់វិទ្យាល័យកំពង់ថ្ម លួចបានម៉ាស៊ីនកុំព្យូទ័រចំនួន១០គ្រឿង ហើយលោកចោរបានដឹកជញ្ជូនយកទៅដោយសុវត្ថិភាព ដោយមិនរំខានដល់សមត្ថកិច្ចប៉ុស្តិ៍រដ្ឋបាលកំពង់ថ្ម ស្ថិតនៅឃុំកំពង់ថ្ម ស្រុកសន្ទុក ខេត្តកំពង់ធំ។ សូមបញ្ជាក់ថា ចំណុចទីតាំងដែលក្រុមចោរធ្វើសកម្មភាពលួច នេះ ស្ថិតនៅព្រំប្រទល់ស្រុកបារាយណ៍ និងស្រុកសន្ទុក។
តាមការឲ្យដឹងពីគ្រូប្រចាំសាលាវិទ្យាល័យកំពង់ថ្មបានឲ្យដឹងថា ថ្ងៃចោរចូលធ្វើសកម្មភាព លួចសម្ភារៈការិយាល័យរបស់សាលាវិទ្យាល័យកំពង់ថ្មនេះ គឺជាយប់ថ្ងៃសៅរ៍ ចំថ្ងៃដែលពុំមានមនុស្សយាមកាម ដែលជាថ្ងៃសម្រាក តែមិននឹកស្មានថា ក្រុមចោរទាំងនេះមានជំនាញខាងលួចទ្រព្យសម្បត្តិ និងគាស់ផ្ទះសំបែងប្រជាពលរដ្ឋ បានយកទឹកមេអាស៊ីដចាក់ចោលរន្ធសោ ធ្វើឲ្យសោរលួយធ្លាក់ចេញ ហើយក្រុមចោរទាំងនេះបានប្រមូលសម្ភារៈរបស់សាលាដែលមានតម្លៃទៅដោយរលូន។
លោក ឈុមោះ តុបធារិទ្ធ នាយកសាលាវិទ្យាល័យកំពង់ថ្មបានឲ្យដឹងថា នៅក្នុងបន្ទប់ទុកកុំព្យូទ័រមានចំ២៦គ្រឿង តែចោរយកអស់១០គ្រឿង និងជាអំណោយរបស់ក្រសួងបានចែកឲ្យសម្រាប់បង្ហាត់បង្រៀនសិស្ស ចំណែកសម្ភារៈផ្សេងៗពុំមានបាត់ទេ គាត់បានសំណូមពរឲ្យសមត្ថកិច្ច ជួយស្រាវជ្រាវរកជនសង្ស័យដែលបានយកម៉ាស៊ីនកុំព្យូទ័រទៅលក់ផង ដើម្បីផ្ដន្ទាទោសតាមផ្លូវច្បាប់៕
ចោរលួចគាស់ការិយាល័យវិទ្យាល័យកំពង់ថ្ម លួចកុំព្យូទ័រ១០គ្រឿងដោយសុវត្ថិភាព
0 Comments