គ្រូបង្វឹកបាល់ទាត់ចំនួន ២៥ នាក់មកពីតាមក្លិប និង សមាគមបាល់ទាត់ក្នុងប្រទេសបានបញ្ចប់សិក្សា គ្រូបាល់ទាត់ផ្នែកកាយសម្បទា MA FIFA Fitness Coaching Course 2015 ដែលរៀបចំឡើងដោយសហព័ន្ធកីឡាបាល់ទាត់កម្ពុជា ជាមួយសហព័ន្ធកីឡាបាល់ទាត់អន្តរជាតិ (FIFA) រយៈពេល ៤ ថ្ងៃ នៅមជ្ឈមណ្ឌលនិងសាលាបាល់ទាត់ជាតិបាទី ក្នុងខេត្តតាកែវ។
លោក Pradip Dutta ជនជាតិឥណ្ឌា ជាគ្រូឧទ្ទេសប្រចាំវគ្គនេះ ដោយចាប់ផ្ដើមតាំងពីថ្ងៃទី ២០ ដល់ ២៤ ខែ កក្កដា ឆ្នាំ ២០១។ ការសិក្សាផ្ដោតលើការសិក្សាលើទ្រឹស្ដី និង ការអនុវត្តន៍ផ្ទាល់ របស់សិក្ខាកាមទាំងអស់។ បើតាមសម្ដីរបស់អ្នកជំនាញ វគ្គនេះគឺផ្ដោតទៅលើការថែរក្សាកម្លាំងសម្រាប់កីឡាករ ទាំងក្នុងពេលហ្វឹកហាត់ និង ក្នុងពេលប្រកួត ធ្វើយ៉ាងណាអាចនៅមានកម្លាំងបំពេញការងាររហូតដល់ចប់ការប្រកួត។
ការហ្វឹកហាត់សាច់ដុំ (Gym) កលល្បិចក្នុងការប្រកួត និង ល្បឿនក្នុងការប្រជែងជាមួយគូប្រកួត ក៏ជាប្រធានបទនៅក្នុងវគ្គសិក្សានេះដែរ។ មុនថ្ងៃបញ្ចប់វគ្គ គ្រូឧទ្ទេសបានធ្វើតេស្ដសិក្ខាកាមនីមួយៗ ដើម្បីវាយតម្លៃពីកម្រិតចំណេះដឹង មុននឹងចែកវិញ្ញាបនបត្របញ្ជាក់ការសិក្សាកម្រិតអន្តរជាតិឱ្យម្នាក់មួយច្បាប់។
នេះជាការបញ្ចេញធនធានមនុស្សថ្មីបន្ថែមរបស់សហព័ន្ធកីឡាបាល់ទាត់កម្ពុជា សម្រាប់បណ្ដុះបណ្ដាលគ្រូកាយសម្បទានៅតាមក្លិបក្នុងលីក និង សមាគមកីឡាបាល់ទាត់នៅតាមខេត្ត ឱ្យកាន់តែច្រើនឡើងៗ ដើម្បីបណ្ដុះបណ្ដាលធនធានត្រូវតាមលក្ខន្តិកៈបាល់ទាត់សម័យទំនើបនេះ។
យោងតាមវិបសាយ fifa.com សហព័ន្ធកីឡាបាល់ទាត់អន្តរជាតិ (FIFA) បានផ្ដល់វគ្គសិក្សាផ្នែកបាល់ទាត់មកកម្ពុជា ចំនួន ១០ ផ្សេងៗគ្នា ក្នុងឆ្នាំ ២០១៥ នេះ ហើយនេះជាវគ្គចុងក្រោយក្រោមការបង្ហាត់បង្ហាញដោយមន្ត្រីជំនាញរបស់ FIFA មកពីជនជាតិឥណ្ឌា៕
គ្រូបាល់ទាត់ផ្នែកកាយសម្បទាក្នុងស្រុក ២៥ នាក់បញ្ចប់វគ្គសិក្សាកម្រិត FIFA
0 Comments