ផ្សារធំថ្មី ត្រូវបានគេចាត់ទុកថា ជាសំណង់បេតិកភណ្ឌប្រវត្តិសាស្ត្ររបស់ទីក្រុងភ្នំពេញ នៃព្រះរាជាណាចក្រកម្ពុជា។ ដោយសារតែមានសភាពចាស់ទ្រុឌទ្រោមនោះ ផ្សារធំថ្មីក៏ត្រូវបានធ្វើការជួសជុលឲ្យមានសោភ័ណភាពឡើងវិញ ស្ថិតក្នុងគម្រោងរបស់ទីភ្នាក់ងារអភិវឌ្ឍន៍បារាំង(AFD) ក្នុងទំហំទឹកប្រាក់ប្រមាណ៤,៥លានអឺរ៉ូ ដោយប្រើរយៈពេលនៃការជួសជុលចាប់ពីខែមករា ឆ្នាំ២០០៩រហូតដល់ឆ្នាំ២០១១ ទើបរួចរាល់ជាស្ថាពរ និងបានបើកសម្ពោធដាក់ឲ្យប្រើប្រាស់ជាផ្លូវការ កាលពីថ្ងៃទី២៥ ខែឧសភា ឆ្នាំ២០០១ ក្រោមអធិបតីភាពរបស់លោក កែប ជុតិមា និងលោក Christian Connan ឯកអគ្គរដ្ឋទូតបារាំងប្រចាំកម្ពុជា។
មន្ត្រីអភិបាលរដ្ឋាករស្វយ័តផ្សារធំថ្មីបានឲ្យដឹងថា ផ្សារធំថ្មីត្រូវបានសាងសង់ឡើងតាំងពីខែសីហា ឆ្នាំ១៩៣៥មកម្ល៉េះ និងបានបញ្ចបើកការស្ថាបនានៅខែមិថុនា ឆ្នាំ១៩៣៧ ដែលមានលោក Jean duboir ជាជនជាតិបារាំង ជាអ្នកគូរប្លង់ និងសាងសង់ឡើងដោយក្រុមហ៊ុនឥណ្ឌូចិនសាយហ្កន។ ចាប់តាំងពីពេលនោះមក ផ្សារធំថ្មីក៏ចាប់ផ្ដើមប្រែក្លាយទៅជាមជ្ឈមណ្ឌលពាណិជ្ជកម្មដ៏មានសារៈសំខាន់សម្រាប់ទីក្រុងភ្នំពេញ ក្នុងអំឡុងទសវត្ស៣០ ដល់ទសវត្ស៧០។ ជាបន្តបន្ទាប់ ផ្សារធំថ្មីក៏ត្រូវបានចាត់បញ្ចូលជាសម្បត្តិបេតិកភណ្ឌប្រវត្តិសាស្ត្រនៃរាជធានីភ្នំពេញ ដោយបានរួមចំណែកជាពិសេសក្នុងការលើកស្ទួយនូវសោភ័ណភាពទីក្រុង បង្កើតមុខរបរជូនប្រជាជន ជាទីកន្លែងសម្រាប់ដោះដូរផ្នែកសេដ្ឋកិច្ច ក៏ដូចជាចូលរួមដល់វិស័យទេសចរណ៍ជាតិផងដែរ។
លោក តាំង សុចិត្រគ្រឹស្នា ប្រធានមន្ទីរទេសចរណ៍រាជធានីភ្នំពេញបានមានប្រសាសន៍ថា បច្ចុប្បន្នផ្សារធំថ្មីបានក្លាយទៅជាកន្លែងបណ្ដុំនៃវិស័យសេដ្ឋកិច្ច និងវិស័យទេសចរណ៍ជាតិ ហើយជារៀងរាល់ថ្ងៃគេសង្កេតឃើញមានប្រជាពលរដ្ឋ ក្រុមអាជីវករ និងភ្ញៀវទេសចរបរទេសចេញចូលផ្សារដែលជាសរសៃឈាមដ៏សំខាន់នៃទីក្រុមភ្នំពេញនេះជាហូរហែ តាំងពីព្រលឹមទល់យប់។ នៅទីនោះ(ផ្សារធំថ្មី)គេឃើញមានដាក់តាំងលក់នូវមុខទំនិញគ្រប់ប្រភេទប្រកបទៅដោយភាពទាក់ទាញ និងមានរបៀបរៀបរយមានដូចជា សំលៀកបំពាក់ ផលិតផលធ្វើអំពីសូត្រខ្មែរ វត្ថុអនុស្សាវរីយ៍ធ្វើអំពីឈើ ឬលោហធាតុផ្សេងៗ គ្រឿងមាស ប្រាក់ គ្រឿងអេឡិចត្រូនិក រួមទាំងរបស់របរប្រើប្រាស់ផ្សេងៗទៀត..។ល..។ ហើយដោយសារតែផ្សារនេះមានដាក់លក់នូវទំនិញសព្វសារពើយ៉ាងដូច្នេះទើបបានធ្វើឲ្យជនបរទេសមានចំណូលចិត្ត និងមិនអាចរំលងបាននៃការមកទស្សនា ក៏ដូចជារកទិញទំនិញនៅផ្សារធំថ្មីនោះ។
ប្រធានមន្ទីរទេសចរណ៍រាជធានីភ្នំពេញបានបន្ថែមឲ្យដឹងទៀតថា ផ្សារធំថ្មី គឺជាជម្រើសទី១របស់ភ្ញៀវទេសចរបរទេសដែលបានធ្វើដំណើរចូលមកទស្សនាប្រទេសកម្ពុជា បន្ទាប់ពីផ្សារទួលទំពូង និងផ្សាររាត្រី មាត់ទន្លេនោះ ដូច្នេះហើយ ដើម្បីផ្ដល់នូវភាពកក់ក្ដៅសម្រាប់ជនបរទេសចម្រុះជាតិសាសន៍ចូលមកទស្សនា និងរកទិញឥវ៉ាន់ផ្សេងៗនៅផ្សារធំថ្មីទីក្រុងភ្នំពេញនោះ ខាងមន្ទីរពាក់ព័ន្ធ ជាពិសេសគណៈគ្រប់គ្រងផ្សារសហការជាមួយអភិបាលរដ្ឋាករស្វយ័តផ្សារធំថ្មីដាក់ឲ្យមានកម្លាំងសន្តិសុខ ប៉ូលិសជួយសម្រួលសណ្ដាប់ធ្នាប់របៀបរៀបរយ និងការពារសុវត្ថិភាពជូនប្រជាពលរដ្ឋ អាជីវករ ជាពិសេសជនបរទេសដែលជាភ្ញៀវទេសចរចូលមកទស្សនា និងទិញផលិតផលផ្សេងៗនៅផ្សារធំថ្មីនេះយ៉ាងយកចិត្តទុកដាក់បំផុត។
សូមបញ្ជាក់ជូនដែរថា គំនូសប្លង់មេផ្សារធំថ្មីសាងសង់ឡើងតាមម៉ូដ Art Deco សម័យអាណានិគម ដែលមានទីតាំងនៅចំកណ្ដាលទីក្រុងភ្នំពេញនៅក្នុងឆ្នាំ១៩៣៧ ដូច្នេះទើបបានជាធ្វើឲ្យផ្សារមួយនេះមានសភាពលេចធ្លោជាងសំណង់នានា ដែលមាននៅទីក្រុងភ្នំពេញ។ ផ្សារធំថ្មីត្រូវបានសង់ឡើងមានរំលេចចេញជាស្លាបបួន គ្របដោយដោមនៅចំកណ្ដាលដោយនៅក្នុងស្លាបទាំងបួននេះ យើងឃើញមានការដាក់តាំងលក់នូវរបស់របរមានដូចជាឧបករណ៍អេឡិចត្រូនិកសំលៀកបំពាក់ នាឡិកា កាបូប វត្ថុបុរាណ ក្រមា និងសូត្រខ្មែរ គ្រឿងមាសគ្រឿងប្រាក់ជាដើម៕
ភ្ញៀវទេសចរបរទេសដែលចូលមកប្រទេសកម្ពុជា តែងតែមិនរំលងផ្សារធំថ្មី
0 Comments