បើផ្អែកតាមការចុះផ្សាយរបស់បណ្ដាញសារព័ត៌មានក្នុងស្រុកមួយចំនួនកាលពីថ្មីៗនេះបានលើកឡើងថា បើអ្នកសារព័ត៌មានចង់ជួបសម្ភាសន៍តារាចម្រៀងណាមួយនៅក្នុងផលិតកម្មមួយនេះគឺត្រូវទូរស័ព្ទទៅខាងផលិតកម្ម ឬអាចសួរព័ត៌មានពីអ្នកគ្រប់គ្រងផលិតកម្មDiamond Musicដោយផ្ទាល់ជុំវិញរឿងរ៉ាវតារាចម្រៀងរបស់ខ្លួន មិនថាការងារសិល្បៈ ឬជីវិតឯកជនផ្ទាល់ខ្លួននោះទេ។
អ្នកចាត់ការទូទៅប្រចាំផលិតកម្ម Diamond កញ្ញា សឿន សុខលីន បាននិយាយប្រាប់កម្ពុជាថ្មីតាមទូរស័ព្ទនៅព្រឹកថ្ងៃទី២៩ ខែកក្កដា ឆ្នាំ២០១៥នេះថា ចាស បង! បើតាមពិតទៅ គឺខាងផលិតកម្មអត់មានដាក់កំហិត ឬបិទសិទ្ធិពួកគាត់ទេជុំវិញការផ្តល់សម្ភាសន៍ជាមួយអ្នកកាសែត គ្រាន់តែពេលខ្លះទំនងមកពីសាមីខ្លួនរបស់គាត់ផ្ទាល់មិនចង់និយាយក៏ថាបាន ដោយពេលខ្លះគាត់រវល់ ឬមកពីបញ្ហាអ្វីមួយក៏មិនដឹង។
អ្នកចាត់ការទូទៅប្រចាំផលិតកម្ម Diamondវ័យក្មេងរូបនេះបានបញ្ជាក់ថា កន្លងមកក្រុមហ៊ុនធ្លាប់ណែនាំប្រាប់ដល់ពួកគាត់មែនចំពោះរឿងនេះ ប៉ុន្តែមិនបានហាមពុំឲ្យពួកគាត់ផ្ដាច់ការទាក់ទងជាមួយបងៗអ្នកសារព័ត៌មានទេ គឺបើសួរនាំរឿងណាដែលមានពាក់ព័ន្ធជាមួយផលិតកម្មហើយមិនអាចឆ្លើយបាន ត្រូវបង្វែរមកខាងក្រុមហ៊ុនវិញ។
ដោយឡែក សម្រាប់រឿងជាប់ពាក់ព័ន្ធជីវិតឯកជនខាងក្រៅផ្ទាល់ខ្លួនវិញ សាមីខ្លួនមានសិទ្ធិនិយាយផ្ដល់សម្ភាសន៍ឲ្យអ្នកព័ត៌មានបាន ផលិតកម្មគ្មានសិទ្ធដឹង ឬជំនួសតារាណាមួយឡើយ។
កញ្ញា សឿន សុខលីន បានបន្ថែមថា ក្រុមហ៊ុនអត់មានបានហាមអីដល់តារាចម្រៀងរបស់យើងទេ បើកទូលាយក្នុងការនិយាយស្តីរឿងផ្ទាល់ខ្លួនឯកជនខាងក្រៅ។ ខុសតែរឿងរបស់ក្រុមហ៊ុនទេ គឺពួកគាត់ពេលខ្វះមិនអាចចេញមុខនិយាយជំនួយទេ ដោយសាររឿងរបស់ផលិតកម្ម គឺផលិតកម្មជាដឹងច្បាស់។
បើតាមការកត់សម្គាល់ ក្រោយពីបានដំណើរការផលិត និងចេញលក់អាល់ប៊ុមបទចម្រៀងរបស់ខ្លួនលើទីផ្សារបានប៉ុន្មានឆ្នាំមកនេះ ត្រូវបានគេមើលឃើញថា ក្នុងអំឡុងរយៈពេលជាងមួយឆ្នាំចុងក្រោយនេះហាក់មានភាពរីកចម្រើន និងមានការគាំទ្រគួរសម។
ខណៈដែលបច្ចុប្បន្នផលិតកម្មមួយនេះត្រូវបានជ្រើសរើសបញ្ចូលតារាចម្រៀងប្រុស/ស្រីល្បីឈ្មោះមួយចំនួនចូលក្នុងដំបូលខ្លួនដូចជាអតីតតារាចម្រៀងធ្លាប់មានឈ្មោះល្បីនៅសាន់ដេ លោក ជុំ លីណូជាដើម៕
ផលិតកម្មDiamond ច្រានចោលរឿងដាក់បម្រាមតារាចម្រៀងមិនឲ្យជួបសម្ភាសន៍ជាមួយអ្នកកាសែត
0 Comments