ភ្នំពេញ ៖ ស្ថានទូតអាមេរិកនៅរាជធានីភ្នំពេញដោយសហការជាមួយមជ្ឈមណ្ឌលបុប្ផាណា នឹងបញ្ចាំងជាអន្តរជាតិលើកដំបូងនូវភាពយន្តឯកសារថ្មី ដែលមានចំណងជើងថា “វាលពិឃាតរបស់វេជ្ជបណ្ឌិតហាំងង៉ោ” ដែលផលិតដោយអ្នកផលិតភាពយន្តឯកសារអាមេរិកឈ្មោះ Arthur Dong នេះបើតាមសេចក្ដីប្រកាសរបស់ស្ថានទូតអាមេរិកចុះថ្ងៃទី១៧ ខែសីហា ឆ្នាំ២០១៥។
សេចក្ដីប្រកាសរបស់ស្ថានទូត បានឲ្យដឹងថា ការបញ្ចាំងនេះនឹងប្រព្រឹត្តទៅនៅថ្ងៃសុក្រទី២១ ខែសីហា ឆ្នាំ២០១៥ វេលាម៉ោង៥ និង៣០ ល្ងាចនៅរោង Major Cineplex by Cellcard ជាន់ទី២ ក្នុងផ្សាទំនើបអីអន។ ការបញ្ចាំងនេះ គឺសំរាប់តែអ្នកដែលមានសំបុត្រអញ្ជើញតែប៉ុណ្ណោះ។ ការបញ្ចាំងជាបន្ថែមទៀត នឹងបើកអោយសាធារណជនចូលមើលតាមពេលវេលា និងទីកន្លែងមួយចំនួនរួមមាន ថ្ងៃទី ២២ សីហាម៉ោង ៦:៣០ ល្ងាចនៅសាលាបឋមសិក្សាស្មៅខ្ញីហាំងង៉ោខេត្តតាកែវ, ថ្ងៃទី២៥ សីហា ម៉ោង៦ និង៣០ ល្ងាចនៅអង្គការហ្វាពន្លឺសិល្បៈខេត្តបាត់ដំបង, ថ្ងៃទី២៦ សីហា ម៉ោង៦ និង៣០នាទី ល្ងាចនៅមជ្ឈមណ្ឌលខេមរសិក្សា (CKS) វត្តដំណាក់ ខេត្តសៀមរាប, ថ្ងៃទី២៨ ខែសីហា ម៉ោង៣ រសៀលនៅរោងភាពយន្ត Major Cineplex by Cellcard ជាន់ទី២ ក្នុងផ្សាទំនើបអីអនភ្នំពេញ។
តាមសេចក្តីប្រកាសរបស់ស្ថានទូតដដែលបានឲ្យដឹងថា ភាពយន្តឯកសារស្តីពីវាលពីឃាតនេះរបស់វេជ្ជបណ្ឌិតហាំងង៉ោ រៀបរាប់ពីអំពើប្រល័យពូជសាសន៍នៅកម្ពុជាតាមរយៈពាក្យសំដី និងរឿងរ៉ាវរបស់មនុស្សម្នាក់ក្នុងចំណោមមនុស្សល្បីៗជាច្រើននាក់ដែលបានរួចជីវិត។ លោកហាំងង៉ោគឺជាវេជ្ជបណ្ឌិតនិងជាអ្នកសំដែងភាពយន្ត ដែលមនុស្សជាច្រើនបានស្គាល់លោកតាមរយៈការដើរតួជាអ្នកសារព័ត៌មានឈ្មោះ ឌិតប្រននៅក្នុងភាពយន្តវាលពិឃាតដែលផលិតក្នុងឆ្នាំ ១៩៨៤ ដោយការសំដែងរបស់លោកក្នុងភាពយន្តនេះធ្វើអោយលោកទទួលបានរង្វាន់ Academy Award ក្នុងឆ្នាំ ១៩៨៥ ចំពោះការសំដែងបានល្អបំផុតជាតួរង។ លោកហាំងង៉ោបានទៅរស់នៅក្នុងសហរដ្ឋអាមេរិកបន្ទាប់ពីបានរួចជីវិតពីរបបខ្មែរក្រហមហើយបានស្លាប់នៅក្នុងឆ្នាំ ១៩៩៦។
អ្នកសារព័ត៌មានដែលចង់យកព័ត៌មានពីការបញ្ចាំងភាពយន្តឯកសារនេះត្រូវចុះឈ្មោះជាមួយផ្នែកកិច្ចការសាធារណៈរបស់ស្ថានទូតអាមេរិកតាមទូរស័ព្ទលេខ ០២៣ ៧២៨ ២៥៨ ឬតាមអីម៉េល Chreav@state.gov ត្រឹមថ្ងៃពុធទី១៩ ខែសីហា វេលាម៉ោង៥ រសៀល៕
ការបញ្ចាំងភាពយន្តឯកសារ “វាលពិឃាតរបស់វេជ្ជបណ្ឌិតហាំងង៉ោ
0 Comments