កំពង់ឆ្នាំង ៖ កាណូតដឹកអុសព្រៃលិចទឹក២គ្រឿងជាង៧ម៉ែត្រគូប រួមនឹងបុរស៤នាក់ជាម្ចាស់អុស ត្រូវបានសមត្ថកិច្ចខណ្ឌរដ្ឋបាលជលផលកំពង់ឆ្នាំងឃាត់ខ្លួននៅពេលធ្វើសកម្មភាពដឹកជញ្ជូនអុសព្រៃលិចទឹកយកមកលក់ដូរធ្វើអាជីវកម្មខុសច្បាប់។ ករណីបង្ក្រាបបទល្មើសនេះបានធ្វើឡើងនៅម៉ោង២និង៣០នាទីរសៀល ថ្ងៃទី១៦ ខែសីហា ឆ្នាំ២០១៥ នៅក្នុងចំណុចព្រែកពាមទន្លា ឃុំពោធិ ស្រុកកំពង់លែង។
លោក សោម ភិរុណ នាយខណ្ឌរដ្ឋបាលជលផលកំពង់ឆ្នាំងជាអ្នកដឹកនាំបង្ក្រាបបទល្មើសនេះបាននិយាយឲ្យដឹងថា ម្ចាស់កាណូតដឹកអុស និងកាប់អុសព្រៃលិចទឹកខាងលើនេះ ១.ឈ្មោះ អ៊ុង ក្រិត អាយុ៣១ឆ្នាំ រស់នៅភូមិត្អូររលំ ឃុំកំពង់ហៅ ស្រុកកំពង់លែង រួមនឹងកម្មករ២នាក់បានកាប់អុសព្រៃលិចទឹកធំៗមានចំនួនប្រមាណ៤ម៉ែត្រគូប នៅចំណុចព្រែកបាយឆៅ ក្នុងភូមិសាស្ត្រឃុំពោធិ ។ ២.ឈ្មោះ ផាន់ ថុន អាយុ៦៣ឆ្នាំ រស់នៅភូមិស្ទឹងសណ្តែក ឃុំកំពង់ហៅ ស្រុកកំពង់លែង បានកាប់ និងដឹកអុសព្រៃលិចទឹកចំនួនជាង៣ម៉ែត្រគូប ពីព្រែកកោះចាប ក្នុងភូមិសាស្ត្រឃុំពោធិ។
លោក សោម ភិរុណ បានឲ្យដឹងទៀតថា ការកាប់ ការដឹកជញ្ជូនព្រៃលិចទឹក គឺជាអំពើល្មើសនឹងច្បាប់ស្ដីពីជលផល ដែលកន្លងមកជនល្មើសច្រើនប្រើវិធីក្រៀវដើមឈើធំៗជាព្រៃលិចទឹកឲ្យងាប់នៅរដូវប្រាំង តាមតំបន់ព្រៃលិចទឹក កន្លែងខ្លះលួចកាប់ព្រៃលិចទឹកពង្រីកយកដីធ្វើចម្ការ ហើយអុសព្រៃលិចទឹកដូចខាងលើនេះភាគច្រើនគឺពួកគេដឹកយកទៅលក់ឲ្យអ្នកឆ្អើរត្រី ឬលក់ឲ្យឡឥដ្ឋ។ ជនល្មើសទាំង៤នាក់ខាងលើ និងវត្ថុតាង ត្រូវបានបញ្ជូនមកសង្កាត់នេសាទកំពង់ឆ្នាំងកសាងសំណុំរឿងចាត់ការតាមនីតិវិធីច្បាប់ស្ដីពីជលផល។
សមត្ថកិច្ចខណ្ឌរដ្ឋបាលជលផលកំពង់ឆ្នាំងបានឲ្យដឹងផងដែរថា កន្លងមក នៅក្នុងឆ្នាំ២០១៤ និង២០១៥ ជនសង្ស័យជាង២០នាក់ ដែលបានលួចកាប់ព្រៃលិចទឹកពង្រីកយកដីចម្ការធ្វើជាកម្មសិទ្ធិ ត្រូវបានសមត្ថកិច្ចជលផល ប្តឹង និងកសាងសំណុំរឿងបញ្ជូនទៅតុលាការខេត្ត ចាត់ការតាមផ្លូវច្បាប់។ ប៉ុន្តែជនសង្ស័យភាគច្រើនមិនត្រូវបានតុលាការចោទប្រកាន់ និងផ្ដន្ទាទោសតាមច្បាប់ឡើយ គឺគ្រាន់តែដាក់ឲ្យស្ថិតក្រោមការត្រួតពិនិត្យរបស់តុលាការតែប៉ុណ្ណោះ។ ទង្វើបែបនេះមិនត្រូវបានជនល្មើសរាងចាលឡើយ និងជាហេតុធ្វើឲ្យជនល្មើសផ្សេៗទៀត នៅតែបន្តលួចកាប់ព្រៃឈើលិចទឹកជាបន្តបន្ទាប់។
ករណីខាងលើនេះ សមត្ថកិច្ចរដ្ឋបាលជលផលស្នើសុំលោកព្រះរាជអាជ្ញាអមសាលាដំបូងខេត្តកំពង់ឆ្នាំង មេត្តាជួយមានវិធានការឲ្យបានម៉ឺងម៉ាត់តាមច្បាប់ផង ដើម្បីជួយទប់ស្កាត់បទល្មើសកាប់បំផ្លាញព្រៃលិចទឹកឲ្យមានការថយចុះ កុំឲ្យកើនឡើង៕
ជលផលចាប់កាណូត២គ្រឿងដឹកអុសព្រៃលិចទឹក មកលក់ធ្វើអាជីវកម្មខុសច្បាប់
0 Comments