​មនុស្ស​ជាង​២០០​នាក់​ ត្រូវបាន​គេ​រំពឹងថា​នឹង​ស្លាប់​ ក្នុង​ហេតុការណ៍​លិច​ទូក​ដឹក​ជន​អ​ន្តោ​ប្រវេសន៍​

​ក្តីសង្ឃឹម​នៃ​ការស្វែងរក​អ្នក​ដែល​នៅ​រស់​រាន​មានជីវិត​ក្នុង​ហេតុការណ៍​លិច​នាវា ​កាលពី​ថ្ងៃ​ព្រហស្បតិ៍​ បាន​បាត់បង់​ដែល​ក្នុងនោះ​ជន​ចំណាកស្រុក​ប្រមាណ២០០នាក់​ ត្រូវបាន​គេ​​បារម្ភ​ថា ​បាន​លង់ទឹក​ស្លាប់​នៅពេល​នាវា​ជួយសង្គ្រោះ​បាន​អំពាវនាវ​ឲ្យ​មាន​ជំនួយ​ដល់​ទូក​​ជន​ចំណាកស្រុក​ជាច្រើន​ទៀត​នៅក្នុងតំបន់​​ដូចគ្នា​នៃ​សមុទ្រមេ​ឌី​ទែ​រ៉ា​ណេ។

​អភិបាលក្រុង Palermo លោក Leoluca Orlando បាន​ថ្លែងថា “​យើង​កំពុង​មើល​ឃើញ​​​ពី​អំពើ​ប្រល័យពូជសាសន៍​ដែល​បង្ក​ឡើង​ដោយ​​ភាព​អាត្មានិយម​របស់​អឺរ៉ុប​”។ លោក​​បាន​លើក​ឡើង​បែបនេះ​ខណៈ​នាវា​កង​ទ័ព​ជើង​ទឹក​អៀរ​ឡង់ LE Niamh បាន​ចូល​ចត​នៅ​កំពង់ផែ​ដោយ​បាន​ដឹក​មនុស្ស​ប្រមាណ៣៧០នាក់ ដែល​​បាន​​រស់រានមានជីវិត​ពី​គ្រោះមហន្តរាយនេះ​ និង​សព​ចំនួន២៥នាក់​ រួមទាំង​ក្មេង​បីនាក់​ផង​ដែរ។

​លោក Orlando បាន​អំពាវនាវ​ដល់​មេដឹកនាំ​​អឺរ៉ុប​​ឲ្យ​​ធ្វើ​អ្វី​បន្ថែមទៀត​ដើម្បី​ទប់ស្កាត់​គ្រោះមហន្ត​រាយ​ដូចនេះ​ និង​ដើម្បី​អនុញ្ញាត​ឲ្យ​ជន​ភៀស​ខ្លួន​បន្ថែមទៀត​ក្នុង​ការតាំង​ទីលំនៅ​ឡើងវិញ នៅ​ក្នុង​​ប្រទេស​របស់​ពួកគេ​។

​ប៉ូលិស​បាន​និយាយថា ពួកគេ​បាន​ចាប់ខ្លួន​បុរស​ប្រាំ​នាក់​ដោយ​សង្ស័យថា ​បានធ្វើ​ឲ្យ​ទូក​នេះ​ក្រឡាប់​នៅ​ថ្ងៃ​ពុធ ​និង​មាន​តួនាទី​ក្នុងការ​ជួញដូរ​ជន​ចំណាកស្រុក។​

​នាវា​កងទ័ពជើងទឹក​មកពី​អ៊ីតាលី​ និង​អៀរ​ឡង់​និង​ទីភ្នាក់ងារ​មនុស្សធម៌ Medecins Sans Frontieres (MSF) បាន​ជួយសង្គ្រោះ​មនុស្ស​ប្រហែល៤០០នាក់​ ពី​ទូក​នេសាទ​នោះ ​ដែល​ត្រូវបាន​គេ​គិតថា​ បាន​ដឹក​មនុស្ស​រហូតដល់ ៦០០នាក់​ ដែល​ភាគច្រើន​ជា​ជនជាតិ​ស៊ី​រី​ ភៀស​​ខ្លួន​​ចេញពី​សង្គ្រាមស៊ីវិល​ក្នុងប្រទេសរបស់​ខ្លួន។

​ពួកគេ​មិនបាន​រកឃើញ​អ្នក​នៅ​រស់រានមាន​ជីវិត​ទេ​ បន្ទាប់ពី​ស្វែងរក​ពេញ​មួយ​យប់​។ អ្នក​នាំពាក្យ​ឆ្មាំ​សមុទ្រ​បាន​និយាយថា នាវា​របស់​​ប្រទេស​អុីតាលី​ បាន​បន្ត​ស្វែងរក​តំបន់​នោះ​កាល​ពី​ថ្ងៃ​ព្រហស្បតិ៍។

​សោកនាដកម្ម​កាលពី​ថ្ងៃ​ពុធ​នេះ​បាន​កើតឡើង​នៅពេលដែល​ទូក​បាន​ក្រឡាប់​នៅពេល​នាវា LE Niamh បាន​ចូល​ជិត​ដោយសារ​អ្នកដំណើរ​បានធ្វើ​ឲ្យ​ទូក​ម្ខាង​ផ្អៀង​នៅពេល​ឃើញ​នាវា​នោះ។

​រដ្ឋមន្ត្រី​ក្រសួងការពារជាតិ​អៀរ​ឡង់ Simon Coveney ប្រាប់​វិទ្យុ​រដ្ឋ RTE កាលពី​ថ្ងៃព្រហស្បតិ៍​​ថា អ្វីដែល​បានកើត​ឡើង​នៅទីនេះ​គឺ​ដោយសារតែ​ទូក​នោះបាន​ផ្ទុក​លើស​ចំណុះ​ ដូច្នេះហើយ​លក្ខ​ខណ្ឌ​នេះ​បានធ្វើ​ឲ្យ​ទូក​ចាប់ផ្តើម​ចូល​ទឹក​ ហើយ​ផ្អៀង​ទៅមួយ​ចំហៀង​រួច​ក៏​ក្រឡាប់​ និង​លិច​ទាំងស្រុង​នៅក្នុង​ចន្លោះពេល​ពីរ​នាទី​។​

​នាវា​អៀរ​ឡង់​ គឺជា​ផ្នែក​មួយ​នៃ​បេសកកម្ម Triton របស់​សហភាព​អឺរ៉ុប ​ដែល​ត្រូវបានពង្រីក​ ​បន្ទាប់ពី​ជន​ចំណាកស្រុក​រហូតដល់៨០០នាក់​ បាន​លង់ទឹក​ស្លាប់​ក្នុងការ​លិច​នាវា​មួយ​​នៅ​ក្នុង​​ខែមេសា​។

​*តំបន់​ព្រំដែន​ដែល​ពោ​ពេញ​ដោយ​សេចក្តីស្លាប់​

សមុទ្រ​មេ​ឌី​ទែ​រ៉ា​ណេ​ គឺជា​តំបន់​ព្រំដែន​ដែល​ពោ​រពេញ​ដោយ​សេចក្តីស្លាប់​ខ្លាំងជាងគេ​បំផុត​ក្នុង​ពិភពលោក​សម្រាប់​ជន​ចំណាកស្រុក​។ អង្គ​ការ​​អន្តោប្រវេសន៍​អន្តរជាតិ​បាន​ឲ្យ​ដឹង​កាលពី​ថ្ងៃ​អង្គា​រថា នៅក្នុង​ឆ្នាំនេះ ជន​អន្តោ​ប្រវេសន៍​និង​ជនភៀសខ្លួន​ជាង​២,០០០​នាក់​បាន​ស្លាប់​ខណៈពេល​កំពុង​ព្យាយាម​ទៅកាន់​អឺរ៉ុប​តាម​ទូក នេះ​បើ​ធៀប​នឹង​ចំនួន៣,២៧៩នាក់​ក្នុង​អំឡុង​ពេល​ពេញ​មួយឆ្នាំ​កាលពី​ឆ្នាំមុន។

​ទីភ្នាក់ងារ​ជនភៀសខ្លួន​របស់​អង្គការសហ​ប្រជាជាតិ​បាន​និយាយថា អ្នករត់ពន្ធ​មនុស្ស​ដែល​ភាគច្រើន​មាន​មូលដ្ឋាន​នៅក្នុង​ប្រទេស​លី​ប៊ី​ និង​ទទួលបាន​ប្រាក់​រាប់ពាន់​ដុល្លារ​សម្រាប់​ការធ្វើដំណើរ​បាន​បញ្ជូន​ជន​អ​ន្តោ​ប្រវេសន៍​ជាង ៩០,០០០នាក់​តាម​សមុទ្រ​ទៅកាន់​ប្រទេស​អុីតាលី​ នៅ​ឆ្នាំនេះ។

​ការមកដល់​ដ៏​ធំ​ទាំង​នៅក្នុង​ប្រទេស​អ៊ីតាលី​ និង​ក្រិ​ក នៅ​រដូវក្តៅ​នេះ​បាន​បង្ហាញថា ​វិបត្តិ​នេះ កាន់តែ​អាក្រក់​៕
​មនុស្ស​ជាង​២០០​នាក់​ ត្រូវបាន​គេ​រំពឹងថា​នឹង​ស្លាប់​ ក្នុង​ហេតុការណ៍​លិច​ទូក​ដឹក​ជន​អ​ន្តោ​ប្រវេសន៍​