ក្រុមឆ្មាំសមុទ្របានរឹបអូសយកកូកាអីុនមានទម្ងន់១២,០០០ផោន (៥,៤០០គីឡូក្រាម) ពីអ្នករត់ពន្ធ៤នាក់ស្ថិតនៅលើនាវាមួយគ្រឿង ដែលអណ្ដែតនៅលើផ្ទៃទឹកតែត្រឹមពាក់កណ្ដាលនៃ តួនាវាទាំងមូល នេះជាការលើកឡើងដោយទីភ្នាក់ងារនេះកាលពីថ្ងៃពុធ។
នាវាដែលលេចអណ្ដែតឡើងជាលើកដំបូងចម្ងាយប្រមាណ២០០ម៉ៃល៍ (៣២០គីឡូម៉ែត្រ) នៅភាគខាងត្បូងម៉ិកស៊ីកូ ផ្ទុកទៅដោយថ្នាំញៀនប្រភេទនេះមានទម្ងន់ដល់ទៅ១៦,០០០ផោន ប៉ុន្ដែខណៈពេលដែលនាវានោះកំពុងត្រូវបានសណ្ដោងនោះ បែរជាលិចស្រឹមទៅវិញ។ នៅពេលនោះ ក៏មានថ្នាំញៀនប្រមាណ៤,០០០ផោនត្រូវបាត់បង់ទៅដែរ។ ការរឹបអូសត្រូវបានធ្វើឡើងកាលពីថ្ងៃទី១៨ ខែកក្កដា គឺជាការដឹកជញ្ជូនតាមប្រភេទនាវាពាក់កណ្ដាលខ្លួនអណ្ដែតលើផ្ទៃទឹកដ៏ធំជាងគេបង្អស់ត្រូវចាប់បាននៅក្នុងប្រវត្ដិសាស្ដ្ររបស់ឆ្មាំសមុទ្រ។
នាវានោះមានបណ្ដោយប្រវែង៤០ហ្វូត (១២ម៉ែត្រ) ត្រូវបានចាត់ទុកថា មិនអាចទាញយកឡើងមកវិញបានទេ បន្ទាប់ពីរងការលិចលង់។ អង្គភាពឆ្មាំសមុទ្របាននិយាយថា ធ្លាប់មានការហាមប្រាមនាវាធុននេះ ដល់ទៅ២៥គ្រឿងមកហើយនៅតំបន់ភាគខាងកើតមហាសមុទ្រប៉ាសីុហ្វិក ចាប់តាំងពីខែវិច្ឆិកា ឆ្នាំ២០០៦មក។
ប្រភេទនាវាមុជទឹកទាំងនេះត្រូវបានគេរចនាឌីហ្សាញសម្រាប់តែការរត់ពន្ធថ្នាំញៀនពេលដែលវាពន្លិចខ្លួនទៅក្នុងទឹកនោះ វាជារឿយៗគ្រាន់តែឲ្យឃើញត្រឹមតែកន្លែងអ្នកបញ្ជាបើកបរ និងបំពង់កែវឆ្លុះ ដែលបន្លឹមពីលើផ្ទៃទឹកតែប៉ុណ្ណោះ។ នាវាប្រភេទទាំងនោះមានការពិបាក ជាពិសេសក្នុងការរកឃើញ និងហាមឃាត់ផងទៅទៀត។ នេះជាការលើកឡើងពីក្រុមឆ្មាំសមុទ្រ៕
AFP
ឆ្មាំសមុទ្រសហរដ្ឋអាមេរិករឹបអូសយកបានកូកាអ៊ីន មានតម្លៃ១៨១លានដុល្លារ
0 Comments